Aen sigij gaxgonq 80 nienzdaih cogeiz, raq rumzcin gaijgwz hailangh bongj doh guekcoj diegdeih, Cungguek gwnzlaj vunz hauxseng roxnaeuz vunz cungnienz cungj gaenxmaenx un saw gauj daihhag, doeg daihhag bienq- baenz haujlai vunz baenz ciuhvunz maqmuengh caeuq gyaepgouz ho.

Seizhaenx, Daegmingz gauh- cungh sathag le, hix yunghsim camgya gauhgauj, hoeng, faensoq okdaeuj le, Daegmingz ca song faen cij ndaej hwnj cunghconh, siengj caiq un saw bi dem, hoeng bohmeh youq ndawranz guh hongreih daiq dwgrengz lo, hix mbouj caiq miz ngaenz bangbouj de lo. Saedcaih mbouj miz banhfap le, Daegmingz cijndaej dauqma mbanj- ranz.

Hoeng, mbanjranz Daegmingz lueg laeg bya sang, doengh aen bya sang haenx goengq rangh goengq, gwnz bya lienz faex cungj gig noix ndaej majhung. Ndaw mbanj mbouj miz nazraemx, reih hix gig noix, ngoenzlaeng yaek guh maz hong daeuj ciengx bak bonjfaenh ne? Nanzdauh caen aeu hwnj bya bae raemj fwnz gai ciengx bak ma?

Cingq mbouj rox yaek baenzlawz guh seiz, Daegmingz dingqnyi ndaw souhyinhgih boq naeuz, Haijnanzdauj gag laebguh sengj le, ginghci hwngfat ndaej gig vaiq, yaek aeu haujlai vunz bae guhhong, vunz gak dieg hix nyoengx bae Haijnanzdauj ra hong. Baenzneix, Daegmingz naemj bae naemj dauq le, couh siengj bae gizde ra hong guh. Hoeng, de mbouj gag okdou gyae gvaq, bohmeh hix mbouj miz geijlai ngaenz. Daegmingz cij- ndaej hwnj haw bae ra lauxsae caeuq doengzhag ndei doxyaeng, iu doengz- hag ndei caez doxbuenx bae Haij- nanzdauj ra hong guh. Cingqngamj, miz song daeg doengzhag hix siengj bae. Yienghneix, sam vunz couh dox- buenx naengh heiqci vuenh naengh ruz buet bae daengz Haijnanzdauj lo.

Aenvih daengx guek gak dieg cungj miz vunz nyoengx daeuj, bouxboux nyinhnaeuz Haijnanzdauj ngamq laeb sengj, haengjdingh miz haujlai hong caj vunz bae guh. Gizsaed mbouj dwg yienghneix, Daegmingz sam vunz ra bae ra dauq, cienq gwnz cienq laj, caiq aenvih gyoengqde ngamq gauhcungh sathag, cijndaej youq ndaw gunghcangj roxnaeuz giyez iq ra ndaej hong guh. Daegmingz couh youq ndaw gungh- cangj cauhguh boiqgienh fansa, guh ndaej gienh ndeu hawj di cienz, gij ngaenz hong daengz ndwen byai caez fat. Guh ndaej lai gienh couh ndaej ngaenz lai. Daegmingz ngamq haeuj gunghcangj seiz, faen caeuq dahsau heuhguh Dahlienz caemh cuj ndeu, song vunz dox boiqhab caez guh.

Dahlienz dwg vunz bonjdieg lajmbanj, gauhgauj seiz hix dwg cengca saek cib faen mbouj ndaej bae doeg daihhag. Seizhaenx, rogguek miz haujlai giyez daeuj lajmbanj Haij- nanzdauj banh gunghcangj, yiengh- neix guh mboujdan ndaej gyangq- daemq cienzhong, lij ndaej noix cienzgoek dem. Ndaw ranz Dahlienz baengh co diegnamh hawj gunghcangj, mbouj yungh geijlai nanz couh bienqbaenz “hohfanhmaenz” lo. Seiz- haenx, youq daengx guek daeuj gangj, “hohfanhmaenz” couhdwg suenq ranz miz cienz, hix dwg vunz fouqmiz lu. Hoeng, Dahlienz daj lij iq couhdwg dahsau roxsoq gaenx guhhong ndeu, de mbouj haengj youq ndawranz ndwi, couh haeuj ndaw gunghcangj daeuj dajgoeng. Aiq dwg yienzfaenh daengz luba, Dahlienz cingqngamj caeuq Daegmingz faen daengz doengz aen cehgenh ndeu, cehgenh cujyin youh faen song vunz guh cuj ndeu.

Daegmingz caeuq Dahlienz mboujdan rox yawj sawgangjmingz cauhguh boiqgienh fansa, hix gig haengj cam saefouh, youh daegbied gaenx doenghfwngz, song vunz cauhguh boiqgienh fansa youh boiq- hab ndaej gig ndei. Daegmingz da raeh fwngz vaiq, Dahlienz saeqsim fwngz riengj, song vunz guh gienh baenz gienh, gig noix miz guh yaez guh ak. Yienghneix, song boux moix ndwen cungj ndaej cienzhong beij bouxwnq lai baenz boix, lauxbanj hix gig haengjheiq song boux de.

Daegmingz caeuq Dahlienz mboujdan youq guhhong seiz doxgap ndaej ndei, bingzseiz song vunz gangjgoj hix dawzbanj raixcaix. Dah- lienz youh haengj daiq Daegmingz dauqcawq bae ngonzyawj gij gingjsaek Haijnanzdauj, Daegmingz mboujlwnh Dahlienz bae gizlawz hix cungj haengj riengz laeng bae. Couh yienghneix, ndwenngoenz gig vaiq couh gvaqbae bi ndeu lo, Daegmingz caeuq Dahlienz ngoenzngoenz caez guhhong, song vunz ngaeuz caeuq ingj cungj liz mbouj ndaej lo.

Miz ngoenz ndeu, yaek daengz seiz roengzban, Dahlienz sawqmwh doiq Daegmingz naeuz:“Gomingz, haemhneix cingj mwngz be ndaw ranz gou gwn haeuxcaeuz ba?” Gangj sat le, Dahlienz lij gag najhoengz hwnj- daeuj.

Ndawsim Daegmingz sikhaek raeujrubrub, hix riengjret han naeuz:“Ndei ha, gou couh riengz mwngz bae.”

Bohmeh Dahlienz yawjraen miz hek daeuj ranz, hix yiedcingz dakdaih Daegmingz, gyoengqde roxnyinh Daegmingz vunz baenzmbauq youh roxsoq, ndawsim hix gig maij Daeg- mingz.

Daegmingz hix gig siengj daiq Dahlienz baema mbanjranz hawj bohmeh de yawjyawj, hoeng, youh roxnyinh ndawranz bonjfaenh gungz- hoj lai, mbouj miz saenqsim, geij baez siengj haibak iu Dahlienz bae mbanjranz bonjfaenh guhcaemz, hoeng baezbaez cungj mbouj gamj gangj okbak daeuj.

Gaenh cieng seiz, Daegmingz caeuq Dahlienz fwngz yien fwngz youq gwnz roen youzbyaij, Dahlienz doq byaij doq doiq Daegmingz naeuz:“Gou siengj riengz mwngz bae ndaw ranz mwngz gvaqcieng.” Gangj sat, hix mbouj caj Daegmingz hoizdap, Dah- lienz fwngz ndeu baez baet diuz mengqraez bonjfaenh, fwngz ndeu lijdwg gaem ndaet gij fwngz Daeg- mingz dwk.

Daegmingz sikhaek roxnyinh gij eiqsei Dahlienz, hoeng, Daegmingz lijdwg ngeixvaeg yaep ndeu le cij yaengyaeng han naeuz:“Lienznuengx, mbanjranz gou caen gungzhoj raixcaix. Gou okdou seiz, ngoenz goengfaen cij dij 8 faen ngaenz, ngamq gaeuq cawx bau ‘densi’ baiz iencaij ndeu. Hix ndaej yienghneix gejnaeuz, boux guhhong ak ndeu, daengx bi guhhong souhaeuj mbouj daengz 400 maenz ngaenz. Mbanjranz gou hai da muenghyawj gvaqbae, daengx benq cungj dwg ranznaez, danghnaeuz ranz lawz miz aen danci ndeu roxnaeuz miz aen souhyinhgih ndeu couhsuenq ranz fouqmiz lo. Gou couhdwg aenvih ndawranz gungzhoj lai, cij buet okdaeuj dajgoeng bw, mwngz nyienh baenz ciuhvunz gaen gou gwn haemz souh hoj ha?” Daegmingz caen mbouj nyaenx hawj Dahlienz baenz ciuhvunz riengz bonjfaenh gvaq saedceij gungzhoj, engq sij mbouj ndaej Dahlienz lizhai bonjfaenh, cijndaej cengq mbei dwk byoengq gyadaej bonjfaenh hawj Dahlienz nyi, yawjyawj Dahlienz lau mbouj lau.

（caengz sat）