Mulaujcuz dwg vunz saujsu minzcuz gih raeuz gag miz, cietyihfan dwg ciet conzdungj Muzlaujcuz gag miz, aen ciet neix vunz Mulaujcuz gouz saenz muengh dajndaem ndaej sou lai、vunz youq ndaej onj ndei. Aen ciet neix doenghbaez aeu“doeng（vunzlai Mulaujcuz caemh cojcoeng ndawde nga ndeu heuhguh“doeng”）”guh aen danhvei doxlwnz banh, laebdaeb guh 3 daengz 5 ngoenz. Ciuq gij swhliux mizgven ndawde geiq, cietyihfan cienz daengz seizneix gaenq miz 500 lai bi.

Doenghgij neiyungz daeuz ndaw hozdung cietyihfan miz haidaiz（an daiz: baij doengzcuk、cang yieng、coq noh doihduz; bouxsaedauh baiq seiqfueng、cingj goengcauz）、cingz saenz（coq 12 yiengh byaekcai; youz bouxsaedauh gingq cingj gak duzsaenzlingz）、diemj doihduz（coq 36 duz bitgaeq; youz bouxsaedauh gaj duz gaeq(bit) ndeu; youq gwnz gyanghongh gaj mou、gaj bit gaeq）、yuenq duzsaenzlingz（coq 12 yiengh byaeknoh; cingj duzsaenzlingz gwn）、ciengq duzsaenzlingz（ciengq haenh ciuhvunz nem goenglauz moix duzsaenzlingz）、biujyienj（ciuq gij daegdiemj gak duzsaenzlingz bae ciengq、yienj; vunzmbanj youq song henz hemq“hwzhaz”dajheiq）、gap bing（bouxsaedauh haeb byoengq gaiq rouj gaeqboux, dawz lwed rwed coq doengh “duzvaiz”“duzmou”aeu maenzhoengz、lwgbiek guh haenx、riengz haeuxcid caeuq vanjlaeuj; moix boux camgya saxcaeq cungj gwn gaemz laeujlwedgaeq ndeu; vunzlai dawz doengh “duzvaiz”“duzmou”aeu maenz、lwgbiek guh haenx vanzlij riengz haeuxcid bae ranz coq youq gwnz daizbaed）、 soengq duzsaenzlingz（soengq Liengz Giuj（boux guencinghseuq henhoh leih’ik Mulaujcuz, vunzlai gig gyaez））daengj.

Youq ngoenz cietyihfan haenx, ndaw mbanj Mulaujcuz gak ranz cungj hek rim bae, gyoengq beixnuengx minzcuz daj geijcib leix gyae daeuj hohfuk, camgya gij hozdung ngoenzciet neix, nauhyied dangqmaz.

Seizneix, cietyihfan gaenq baenz ngoenzciet conzdungj vunzlai Mulaujcuz gyoaen dangj caeuq cwngfuj gvensim、gyoaen cojcoeng、angqhoh fungsou、gouzbaiq bingzonj、gyaepaeu minzcuz doxgiet cinbu nem fazcanj.

2006 nienz 5 nyied 20 hauh, ginggvaq Gozvuyen baecinj, ciet- yihfan Mulaujcuz ndaej lied haeuj daih’it buek guekgya gaep feihvuzciz vwnzva yizcanj mingzloeg, neix hawj aen ciet miz daegsaek Mulaujcuz noengzna neix ndaej ndeindei henhoh caeuq swnjcienz roengzbae.

Lozcwngz Mulaujcuz Swciyen youq 2009 nienz 11 nyied 28 hauh gawjbanh le daih’it gaiq“Cung- guek·Lozcwngz Ciet Vwnzva Yihfan Mulaujcuz”, seizhaenx vunz cien vunz fanh comz youq giz ndeu doengzcaez angqhoh fungsou. Vunzlai dieg Mulaujcuz diuq foux fungsou, ciengq go’gyoaen, gop hwnj haeux mak, dawz gij yienghsiengq fungcingz Yihfan baijok hawj vunzlai yawj, gij singgo angqvauvau cienz doh seiqfueng.

Daj 2014 nienz 9 nyied 1 hauh doxhwnj, Lozcwngz Mulaujcuz Sw- ciyen saedhengz《Diuzlaeh Gagguenj Lozcwngz Mulaujcuz Swciyen》, ndawde cieng daihbet gij gvidingh daplaeng daihhajcib seiq diuz gvidingh: Moix bi liggaeuq ngoenz laebdoeng dwg ngoenz cietyihfanh, cuengqgyaj ngoenz ndeu.