Lij Canyangh, boux mehmbwk bingzciengz Myauzcuz Lungzlinz Gak Cuz Swciyen ndeu, baengh miz yiedcingz, aeu gij maesei caetsaek Myauzcuz siuq hwnj baengzva bae, siuq ok geu dem geu buhvaq minzcuz gyaeundei、lumj miz sengmingh nei, daengxheij gyaeundei cungj deng lwgfwngz de suglienh gaemguenj dwk. Labnyumx、siuqva、daemj baengzndaij doenghgij dinfwngz de gaemdawz neix, neiyungz lai dangqmaz, miz lizsij vwnzva Myauzcuz cien bi, mbouj gvaqmauh saekdi siuq ok gij gwndaenj ngoenznaengz、gij hozdung guhhong、gij lijyiz fungsug caeuq gij saenqyiengj beixnuengx Myauzcuz Lungzlinz lo.

Yahdaiqcoj Lij Canyangh mingz heuhguh Vangz Yez. Aenvih daih haenx mehmbwk Myauzcuz mbouj rox saw, ndigah gyoengqde cijndaej hag daemjrok、siuqva、labnyumx, daihdaih doxcienz. Daxmeh Lij Canyangh mingz heuhguh Yangz Canghsiu, yienzlaiz youq Mbanjniuzgyah Cunh Sajyij Yienh Anhlungz Sengj Gveicouh, doeklaeng haq bae Ranzlij Mbanj- lungzsaj Cunh Lunglaiz Cin Yahcah Lungzlinz Guengjsae. Daih coj Ranzlij dwg vunz Bwzmyauz, daxbuz dwg vunz Cinghsuijmyauz, daxmeh dwg vunz Hungzdouzmyauz, gap baenz le ranz comz vunz Bwzmyauz、vunz Cingh- suijmyauz、vunz Hungzdouzmyauz youq doxcaez ndeu. Neix hix hawj Lij Canyangh hag rox le gij dinfwngz siuqva Myauzcuz sam cungj neix. Caemhcaiq, Lij Canyangh daj iq couh hainduj maij siuqva, ndaej daxbuz caeuq daxmeh oenqyuem, de hag rox le haujlai dinfwngz siuqva cienzdoengj Myauzcuz.

Mwh lij oiq, de yawjraen haujlai bandoih okrog bae dajgoeng ra cienz, de caemh naemj bae haujlai baez gvaq, hoeng, vihliux hawj gij dinfwngz Myauzcuz ndaej swnjcienz roengzbae, de caeuq doenghbaez doxlumj, youq seiz ndaejhoengq, haenqrengz hag siuqva, de couhdwg yienghneix baengh song faj fwngzmbaeu siuqva, siuq aen loqsiengj bonjfaenh, gangjok gij siengjmuengh gyaeundei ciuhvunz bonjfaenh.

Hungzdouzmyauz miz haujlai cungj siuq, lumjbaenz siuqcihcib、siuqcihmij、siuqbaengzvaj……Doenghgij neix cungj dwg gij fuengfap siuqva Myauzcuz ciuhgeq cienz roengzdaeuj. Hungzdouzmyauz maij yungh saek ndinggeq guh saekdaeuz, saekloeg、saekhenj、saeko doenghgij saek neix dwg saek bengxdaiq, caemhcaiq dap saek iugouz itdingh aeu youh moq youh rongh, hawj lwgsau Myauzcuz daenj hwnj ndang bae couh lumj dujva nei gyaeundei.

Lij Canyangh naeuz: “Gij siuq Myauzcuz daegbied gangjgouz dox- daengh、lai yiengh、ronghsien gyaeu- ndei, cujyau yungh daeuj sieng hwnj hozbuh、daeuxbuh、genbuh、dinvunj buhvaq bae, caemh ndaej aeu daeuj siuq guh daehbeq、daehcienz doenghgij doxgaiq neix. Geu buhgwnz gyaqcienz baengz bingzciengz ndeu, geu vunj yungh baengzndaij bingz- ciengz guh baenz ndeu, baez sieng hwnj gij siuq Myauzcuz, couh bienq ndaej ronghsien lwenqda, gyaqcienz hwnj baenz bak boix.”

Cawz siuqva le, Lij Canyangh lij rox guh baengzndaij、labnyumx doenghgij dinfwngz cienzdoengj Myauzcuz neix dem. Guh baengzndaij dwg gij hongfwngz ceiq gihbwnj. Daih’it aeu ndaem ndaij, ndwenngeih hainduj ndaem. Ndwencaet daengz ndwenbet sou naeng ndaij, guh baenz mae’ndaij. Ginggvaq haujlai bouh cijndaej cang hwnj aensaj bae, gatsat daemj baenz baengzndaij. Labnyumx dwg yungh gij baengzndaij daemj baenz haenx veh okdaeuj, yungh gaiq benjfaex ndeu hanj bingz le, aeu roengz aen laepiq bae, dwk bingz yungh danqfeiz menhmenh cawj gienghlab baenz, liux le cij yungh bitlab baez bit baez bit diemj hwnjbae, lab diemj liux le cijndaej aeu roengz ndaw aen ganglab bae nyumx. Nyumx caet baez le, yungh raemx cawj hawj gienghlab duet okdaeuj, giz saekhau couhdwg diemjlab, giz saek ndaem’o couhdwg romj.

Youq ndaw Aen Gunghswh Buhvaq Minzcuz Lij Canyangh diegyouq yienhsingz Lungzlinz haenx, baij miz haujlai huq Lij Canyangh guh, gij siuq fungsug ndwenngoenz Myauzcuz、buhvaq minzcuz, yiengh- yiengh gyaqciq gyaeundei, yawj ndaej ok gij dinfwngz de ak dangqmaz, hawj vunz nyaenx mbouj ndaej haenh naeuz gwnz daiz faen cung ndeu, laj daiz cib bi goengrengz. Dauqyawj diuzloh ganhoj 30 lai bi, gij dinfwngz cienzdoengj Myauzcuz hawj Lij Canyangh roengzsim haeujyinx, vih de haenqrengz buekguh, hawj de daj meh guhsiuq bingzciengz youq Mbanj- myauz ndaw rungh ndaw bya okseng ndeu menhmenh majhung baenz bouxswnjcienz gij siuq Myauzcuz、bouxbaujhoh huqbauj minzcuz.

Bi 2014 ndwen 9 《Siuq Maesei Labnyumx Benhmyauz》《Siuq Dahsau Myauzcuz Bwzmyauz》《Ndangdaenj Siuqva Su’myauz》 gij cozbinj lab- nyumx、siuqva Lij Canyangh neix faenbied aeundaej aen ciengjdoengz “ciengj hongmbwn Bazgvei”、ciengj cozbinj maenhndei、ciengjdoengz; bi 2015 youq ndaw doxdax buhvaq ceiq gyaeundei ciet diuqbo Myauzcuz Lungzlinz, aeundaej “aen ciengjgim buhvaq cienzdoengj ceiq gyaeundei” Hungzdouzmyauz、“aen ciengjmaenh- ndei buhvaq cauhmoq” Bwzmyauz; bi 2017 gij buhvaq Myauzcuz de cauh- guh haenx aeundaej aen ciengjngaenz “ciengj hongmbwn Bazgvei” aen langhbaij cozbinj gunghyi meijsuz Guengjsae; bi 2018 gij cozbinj labnyumx、siuqva de aeundaej mingz daihsam aen langhbaij cozbinj minzcuz Gvangjsih Yisuz Yozyen.

Dangguh bouxswnjcienz gij ndangdaenj cienzdoengj Myauzcuz gaep swcigih feihvuzciz vwnzva yizcanj, Lij Canyangh roxyiuj diuzrap gwnz mbaq hungnaek, de maqmuengh gij siuq Myauzcuz miz geij cien bi lizsij haenx youq Mbanjmyauz Lungzlinz daihdaih doxcienz, ronghsag lwenqda, hawj daihlaeng dawzyinx.

(Veiz Ginyuz raiz Dahdingz hoiz)