Bi 2018, Duh’anh Yauzcuz Swciyen mboujduenh gyalai gij ligdoh hwnjguh gij gunghcwngz vwnzva bangfuz vwnzva leih minz, hawj vwnzva lajmbanj bang doi cinjcing vut gungz, hawj gij aeuyungh cingsaenz saedceij ngoenz lai gvaq ngoenz vunzlai lajmbanj habhoz.

Cuknek hwnjguh giekdaej sezsih, gung aendieg hawj vunzlai guh vwnzva hozdung. Seizneix, daengx yienh 19 aen yanghcin cungj hwnjguh miz aen fuengzcamh doglaeb 400 bingzfanghmij doxhwnj, boiq miz bouxguenjleix vwnz- va、 gya cawx dennauj、 sezsienggih、aen’ingjsiengq， mbangj doih yienjheiq honghoengq boiq miz yinhyangj、daeng daengj sezsih; miz 10 aen ranz vwnzva hozdung gaep mbanj 100 bingzfanghmij doxhwnj; hwnq miz 40 aen dieg lienhndang dijyuz gaep mbanj, hawj vunzlai miz dieg guh vwnzdij hozdung.

Gyagiengz hwnjguh aendoih vwnz- va, daezsang gij rengzhoengh vwnzva hozdung vunzlai lajmbanj. Aen yienh neix gaenxmaenx laebbaenz aendoih yienjheiq lajmbanj, daengz seizneix daengx yienh miz 300 lai aen, 4000 lai vunz. Vih daezswng gij suijbingz vwnzva hozdung lajmbanj, bi 2018 aen yienh neix banh le aen ban diuqfoux、aen ban ciengqgo、aen ban son’gyauq fwen daengj lai loh son’gyauq vwnzyi yezvu daengz 500 lai vunzbaez.

Gaenxmaenx haiguh vwnzva hoz- dung roengz mbanj, hawj gij heiqfaenh vwnzva lajmbanj hoenghhwd. Bi 2018 aen yienh neix cujciz Lahlez Cin daengj 5 aen doih yienjheiq honghoengq, yungh gak minzcuz doxndei doxbang huzndei hwngfat guh neiyungz, gag bien gag yienj cezmuz, haiguh roengz mbanj cunzdauq yienjok 100 lai ciengzbaez, fungfouq le gij cingsaenz saedceij vunzlai gak cuz.

Ca ndei “sam gvanj camh ndeu ranz ndeu” haicuengq mbouj aeu cienz, bang doi haiguh vwnzva bangfuz leih lwgminz. Aen yienh neix dawz yienh duzsuhgvanj、vwnzva’gvanj、bozvuzgvanj、camh vwnz- va cunghab yanghcin、ranzsaw nungz- gyah daengj dieg goenggungh vwnzva haicuengq mbouj aeu cienz. Bi 2018, aen yienh neix hoizguh benqgohgyau denyingj Vahcuengh 45 bouh bae lajmbanj cunzdauq cuengqingj 300 lai ciengzbaez, bouxyawj daengz 8 fanh lai vunzbaez.

(Lanz Fuzgvanh)