Gij dinfwngz doqcauh gij gencuz faex Dungcuz youq Sanhgyangh Dungcuz Swciyen riuzcienz. Bi 2006 5 nyied 20 hauh, gij dinfwngz doqcauh gij gencuz faex Dungcuz ndaej Gozvuyen baecinj, liedhaeuj buek daih’it guekgya gaep feihvuzciz vwnzva yizcanj mingzloeg. Doengh- yiengh faex Dungcuz aeu dingdah、laeuzgyong guh daibyauj, baugvat doumbanj、laeuzgyong、ranzyouq、dingdah、Sazdangz daengj.

Doumbanj Dungcuz dwg aeu faex doqcauh baenz. Doengh mbanj Dungcuz miz geijcib daengz bak lai ranz, doumbanj de daihgaiq gvangq 1.6 mij baedauq, sang 3 mij baedauq. Mbanj haemq hung dou- mbanj couh guh lai hung di, cang hix lai ndei di. Youq mbanj Dungcuz, gij yiengh doumbanj giz doxlumj lai giz mbouj doengz noix, gak miz funggek. Doumbanj miz dounaj、douswix、dougvaz sam aen roxnaeuz dounaj、doulaeng、douswix、dougvaz seiq aen. Guh geijlai aen aeu yawj mbanj hung’iq、 roen geijlai daeuj dingh.

Laeuzgyong Dungcuz aeu haem go faex hung guh saeudaeuz, guhbaenz yiengh aendap, daengjhwnj youq gyang mbanj Dungcuz. Laeuz- gyong dwg doengh ranz hung ndaw hoengq ndeu, ndawde dan miz saeuqfeiz、aendaengq、gyongfaex, mbouj miz gij doenghyiengh ranz- yungh wnq, hoengqhangqhangq, aen laeuz neix mbouj hawj bouxlawz gag yungh. Ciuq dauhleix daeuj gangj, doenghyiengh hung mbouj ndaej luenh yungh, ndigah cungj youq seiz miz saeh daegbied cijndaej cingqsik yungh laeuzgyong.

Doengh ranzyouq mbanj Dung- cuz aeu laeuzgyong guh cungqgyang, cug caengz sanqhai bae, humx baenz gyoengq gencuz hung roxnaeuz iq. Laeuz Dungcuz itbuen guh sam caengz, caengz ceiq laj youq gwnz namh, haemq mbaeq, aeu daeuj coq aen doiqrin daem haeux、doengh- yiengh hongdawz、 fwnz nyangj， humx ciengx doihduz daengj; caengz daihngeih hawj vunz youq, miz saeuqfeiz、aenrug、laelaeuz daengj; caengz daihsam itbuen coq haeux gwn, lij miz doenghgij doenghyiengh saedceij mbouj gingciengz yungh, couh lumj aen cang ndeu.

Dingdah youh heuhguh giuz- roqluengq、giuzdiengz, ndaej hawj bouxgvaqroen ndoj fwnrumz, hix caemh dangguh doumbanj, engqgya dwg giz vunzmbanj yietnaiq doxcomz gangjgoj. Baez daengz ciet hung, beixnuengx mbanj wnq daeuj dox- comz, daengx mbanj vunz comz youq gyaeujgiuz, daenj buhvaq ndei couxhek, eu fwenlaengzroen, gingq laeujdaihhek, doxdax diuq fouxvenz, neix yienh’ok fungcingz minzcuz noengzna. Aen dingdah ceiq hung hix ceiq okmingz couhdwg Guengjsae Sanhgyangh Mbanjmajanh Giuz- cwngzyangz, gaq youq gwn Dah- linzhih, gungh raez 78 mij, miz song aen daiz sam aen doen haj aen laeuz.

Ranzsazdangz, hix heuhguh miuhyahcoj; daihbouhfaenh laeb youq henz buenz laeuzgyong, caeuq laeuz- gyong doxlienz baenz rangh ndeu. Ranzsazdangz miz song cungj: Cungj ndeu dwg doenghgij daiz aeu rin- ndaek laebaenz, seiqhenz humx ciengz; cungj ndeu dwg ranz caez- cienz, lumj aen miuh ndeu, miz ciengz humx haeuj.

Doenghgij gencuz neix mbouj- danh yienghsiengq ndeiyawj, vanzlij ndaej haenh baenz dinfwngz gag miz. Daengx aen gencuz mbouj yungh saek swnj dingdiet, hoeng cauh ndaej youh maenh youh onj, doxswnj doxciep ndaej laemj ndei, miz gij gyaciz gunghyi caeuq yisuz sang dangqmaz.

Doenghboux canghdoq ndaw- biengz Dungcuz cauh laeuz、giuz caeuq ranzyouq ne dandan baengh limjfaexcuk guh cik, baengh gij“saw saemaeg” guh dajsuenq mai giz, yungh gij hongdawz canghdoq caeuq faexmoeg itbuen bae doqcauh ok laeuz、giuz gak cungj gak yiengh、yienghsiengq ndeiyawj, doq ndaej ngamj, cauh ndaej ndei, cungj hawj vunzlai haenh gyoekgyoek bae.