De ndwn youq gwnz aendaiz lingxciengj aen doxdax dajveh huq cauhmoq “funghvuengz gim” hoih gaicawx gunghyibinj daengx guek gaiq daih 53, song fwngz bungj ciengjbaiz, naj riunyumnyum.

De couhdwg Vangz Siufwnh, boux mehmbwk baez daihnduj raen aendomq couh maij hwnj aendomq ndeu, gvan de mingzcoh heuhguh Liuz Canghleij, dwg boux cungjginghlij Aen Gunghswh Mizhanh Vwnzva Aendomq Diengzsiuyin Si Cingsih.

Bi 1984 ndwen 2, Liuz Canghleij youq lajmbanj Liuzcwngz Sanhdungh ranz bouxndangcanz ndeu okseng. Bi 2009 satbyai, ginggvaq vunzsug gaisau, madaengz Cingsih Sinfazlij guhhong, baez di baez di boiz gij cienz daigvanj banghag liux, aen davaih daxboh goj yw ndei lo, de couh cawx ranz baenzranz, song gvanbaz couh youq aensingz henzguek gvaq hwnj gij ndwenngoenz cwxcaih onjdingh.

Dwen daengz gij yienzfaenh song gvanbaz Liuz Canghleij caeuq aendomq, aeu daj baez gihvei dingj- lingz ndeu gangj hwnj cij ndaej. Haujlai bi gaxgonq miz ngoenz ndeu, Liuz Canghleij daiq mehyah de bae Giucouh guhcaemz, mehyah de maij aendomq fwngzguh Giucouh neix dangqmaz, cungj sij mbouj ndaej cuengq fwngz. Yawj mehyah baenz- neix maij, ngoenz haenx, Liuz Canghleij couh cawx hawj mehyah song aen domq daiq ma ranz. Daj ngoenz haenx hwnj, song gvanbaz youq doxcaez gangjgoj, ciengzseiz gangjgangj couh gag gangj daengz aendomq lo. Baez ndaej hoengq, mehyah couh ra cimmae ma hag siuq guh aendomq. Cungj naeuz maij boux vunz ndeu couh maij daengz gij de maij, Liuz Canghleij couhdwg cungj vunz yienghneix, vihliux haeujcoengh gij gyaezmaij mehyah, leihyungh gij bonjfaenh caixhangz, dajveh aenbouq gwnz muengx daih’it ciuhvunz bonj- faenh, cienmonz yungh daeuj gai gij domq mehyah gag siuq guh haenx.

Aenvih gij domq Cingsih miz daegsaek minzcuz naekna, hawj vunz roxnyinh saenzmaed dangqmaz, aen- bouq gwnz muengx ngamq hai mbouj geijlai nanz couh miz vunz cawx domq lo, ngamq hainduj gij domq mehyah gag siuq guh haenx lij doh gai, hoeng riengzlaeng miz vunz cawx lai le, gij domq mehyah gag siuq guh haenx couh mbouj doh gai lo. Aenvih aendomq gizgiz cungj dwg yungh fwngz bouxvunz ma guh liux, gij gocwngz siuq guh aendomq saepsoiq dangqmaz, aen domq gai cibgeij maenz ngaenz couh aeu yungh seiq haj ngoenz cij guh ndaej baenz, mehyah fwngz riengj baenz ngoenz baenz hwnz siuq guh hix mbouj doh vunz cawx. Vihliux gaijgez aen vwndiz mbouj doh gai, Liuz Canghleij hainduj buenq aendomq lo, de youq dieggoek aendomq Cingsih——Giucouh baenz ranz baenz ranz bae soucawx aendomq, camhseiz hoizrwnh le aen vwndiz mbouj doh gai.

Bi 2013 ndwen 11 ngoenz 11, Liuz Canghleij swz gij hong gungh- gvang giyez cienzhong ndaej haemq lai haenx bae, aeu ok gij cienzrom bonjfaenh sojmiz nem 10 fanh maenz ngaenz caeuq beixnuengx baengzyoux ciq haenx cucwz aen giyez daengx guek dandog aeu aendomq guh cujyau ginghyingz yezvu——Aen Gunghswh Mizhanh Vwnzva Aendomq Diengz- siuyin Si Cingsih.

“Vangjdoxlienz+” seizdaih moq cap fwed hawj densangh lo, gij cwngcwz bangfuz densangh guekgya caeuq gij saehnieb Liuz Canghleij ngad ok feizmbaw. Bi 2015, Cingsih Si aeundaej aen yienh guhyiengh denswj sanghvu haeuj lajmbanj, giekdaej hwnjguh ndaejdaengz laebcaez lo. Aen Gunghswh Mizhanh Vwnzva Aendomq Diengzsiuyin Liuz Canghleij daih’it seizgan capyouq Aen Cungsim Fugsaeh Denswj Sanghvu, baengh cwngfuj gungganq caeuq dajveh senhconz binjbaiz, gyahwnj Liuz Canghleij gag gaenxmaenx camgya gak cungj hozdung siugai, yaepyet, mingzdaeuz aendomq hoenghhwdhwd, mingzcoh cienz doh ndaw guek rog guek. Bi 2016、2017, Liuz Canghleij caijsoq ndei ndaej hwnj aen daizheiq aen vanjvei lienzvuen ndwencieng Cunghyangh Densidaiz caeuq camgya aen daihhingz hozdung “veh bangxdat Byaraiz” youq Dujwjgiz bauq feihyiz. Aendomq lij ndaej dangguh gij huq geiqniemh gonqlaeng soengq hawj Yauz Mingz、Daigoz Sihlinzdungh gunghcuj daengj doengh boux miz- mingz ndaw guek rog guek neix, ndaej bouxhek gak gyaiq gyaezmaij.

Daj “aen ranziq laepngau” buen baedaengz aen ranzgunghcangj youh gvangq youh ronghsag, gij vanzging caeuq dieg guhhong ndaejdaengz cienjbienq ndei, song gvanbaz Liuz Canghleij miz le gihvei cuengq fwngz daihdamj guh, gij hwngfat aen gunghswh miz le roennaj gvangqlangh. Gij huq aendomq cawz gai bae doh daengz daengx guek le, lij gai bae daengz Daigoz、Vwnzlaiz、Feihlizbinh、Meijgoz doenghgij guekgya neix, gij soqliengh gai okbae goj bi lai gvaq bi, bi 2017 gungh gai ndaej 140 lai fanh maenz ngaenz, daengz seizneix gaenq gai ndaej mauhgvaq 200 fanh maenz ngaenz.

“Gwn raemx naemj goekraemx”, Liuz Canghleij youq seiz leihyungh gij huq minzcuz Cingsih canh ndaej cienz, mbouj lumz hoizbauq lwgminz Cingsih, gaenxmaenx yiengjwngq iuheuh, saedhengz densangh caeuq banggungz cingcinj doiqciep, camgya banggungz gunggeng, ngeng coh bae ranzgungzhoj soucawx aendomq. Vihliux hawj gij caetliengh aendomq ranzgungzhoj guh haenx habgek, Liuz Canghleij leihyungh aenranz son- gyauq cungsim fugsaeh goenggungh guh le 3 baez son’gyauq miz 65 vunz camgya, mauhgvaq 200 baez daiq mehyah bae daengz ranzgungzhoj hawj gyoengqde siuq aendomq, gaem fwngz son gyoengqde siuq aendomq. Seiz- neix, diengzsiuyin moix ngoenz cingj 5 boux mehdajsiuq, lij caeuq 30 lai ranz ranzgungzhoj laeb dangjan laeb gaj Giucouh、Ginhlungz、Dunghli daengj doengh aen mbanj neix ciem dinghdan, hawj vunzgungzhoj youq bakdou ranz miz hong guh doengzseiz moix vunz bingzyaenz moix bi demsou 6000 maenz ngaenz baedauq.

Geij bi neix daeuj, Aen Gungh- swh Mizhanh Vwnzva Aendomq Diengzsiuyin Liuz Canghleij gonq- laeng aeundaej le bouxdingjvah yienghsiengq aendomq Cingsih、 daudwz mozfan lauxsaed soujsaenq Si Cingsih、“cib aen densangh ndei” Si Baksaek daengj doenghgij mingzdaeuz ndei neix, Liuz Canghleij hix ndaej Cingsih Si Yinzminz Cwngfuj bingz baenz gaiq daih’it “cib boux bouxcoz maenh’ak Cingsih”, gij domq siuqdoi mehyah de siuq guh haenx youq aen doxdax dajveh huq cauhmoq “funghvuengz gim” hoih gaicawx gunghyibinj daengx guek gaiq daih 53 aeundaej ciengjgim “fungh- vuengz gim”, bi 2018 ndwen 11 camgya aen hanghmoeg dajsiuq bi 2018 Gvangjsih gaiq daih’it “sim mehmbwk coh dangj seizdaih moq laebgoeng” mehmbwk doxdax din- fwngz guhhong aeundaej mingz daihngeih, bi 2018 Aen Gunghswh Mizhanh Vwnzva Aendomq Diengz- siuyin ndaej dingh baenz “aen ceh- genh banggungz”.

Saenq Liuz Canghleij youq ndwenngoenz ngoenzlaeng, itdingh caeuq mehyah de doxcaez, daiq daengx ndang mingzdaeuz miznaj caeuq aen cwngheuh “aen cehgenh banggungz”, angqyangz laebdaeb roengzbae, daiqdoengh engq lai vunz cauh ok diendeih engq gvangq.

（Cau Dungjyij raiz Dahdingz hoiz）