Youq Gih Yinzminz Yihyenz ywbingh duenh seizgan de, mbwq le gou maij byaij riengz henz Dahyunghgyangh yawj vunz ep bya youz raemx, miz geij mbat lij byaij hwnj gwnz Giuzdauzyenz bae yawjngonz gij gingjsaek song hamq. Mbouj rox mbouj nyinh gvaq ndaej sam ndwen, gou gyaez hwnj aen singz daengx bi vamoq angj hai neix.

Mwh lij iq couh rox Namzningz dwg dieg soujfuj Guengjsae raeuz, hix dingqnyi bouxlaux lwnh aen singz neix miz hojceh、feihgih doeng daengz Baekging, lij naeuz youq ranzmbanj naenghci bae gizde haet bae haemh cij daengz, danghnaeuz dwg naengh ruzfeiz swnh Dahyougyangh bae daengz gizde aeu song ngoenz ne. Doiq gou boux doekseng youq ndaw luegbya daeuj gangj, Namzningz couh lumj Sanghaij、Baekging nei liz gou gig gyae.

Siengj mbouj daengz bi 1985, gou gauj ndaej hwnj Cunghyangh Minzyen Guengjsae Sawcuengh Daconhbanh. Mwhde aen ban neix dwg youq Vujmingz Gvangjsih Sawcuengh Yozyau haiban, dieg de dep gyawj Namzningz, neix couh hawj gou miz gihvei bae Namzningz youzlangh lo. Haihag mbouj nanz bungz daengz cietgozging cuengqgyaj sam ngoenz, yienghneix gou baez daih’it ndaej dieb haeuj diuz gai Namzningz.

Gwqhaenx youq Vujmingz naengh banci bae Namzningz hix suenq fuengbienh lo, yienznaeuz song dieg liz ngamq miz 40 geij goengleix, hoeng roen gaeuq aeu hopheux Byagaufung, daengz Namzningz yaek yungh bae aen cungdaeuz ne.

Geij ngoenz de gou daengx ngoenz caeuq doengzhag okdaeuj youzlangh guhcaemz. Gwqhaenx dieg ndeiyouz Namzningz geq hwnjdaeuj ngamq miz Yinzminz Gunghyenz、Dungvuzyenz、Byacinghsiu、Nanzhuz Gunghyenz geij dieg neix. Dieg ceiq nauhyied couhdwg gvaengh gyawj Cauzyangz Gvangjcangz geij diuz gai lo, gizde miz bakhuq daihlaeuz、miz gaigiuzgaq、miz roenbyaij laj gai, fanj- dauq ranghdieg Langjdungh baihde lij dwg dieg fwz dieg reihbyaek. Yienz- naeuz baihnamz Dahyunghgyangh lij miz geij diuz gai, hoeng gizde vunz- youz gig noix byaij daengz, hix nanzgvaiq song hamq ngamq miz aen Yunghgyangh Daihgiuz hawj vunz ci baedauq. Mwhde Yunghgyangh Daih- giuz hix dwg dieg yinx vunz bae yawjngonz ndeu, ndwn youq gyaeuj giuz yawj ci baedauq song hamq，roxnaeuz yawj gij ruzfeiz con gvaq laj giuz hix dwg gienh saeh mizyinx ndeu.

Lij geiq ndaej cigunghgyauh mwhde mbouj miz gunghdiuz, seizhah naengh youq ndaw mbouj geij nanz couh hawj vunz hanh conh hanh lae. Gou roxnyinh mwhde aen laeuz ceiq sang ceiq gyaqciq suenq hwnjdaeuj dwg Yunghgyangh Fanden daengj youq gyaeuj giuz, haujlai vunz baeznduj daeuj Namzningz cungj maij byaij daengz gizde yawjngonz aen byauhci duh Namzningz neix. Laj goekreiz gyaeuj giuz miz geij dan bang vunz ingj siengq couhdwg dawz de caeuq diuz dah guh beigingj, gij seng’eiq gyoengqde ndei lai lo. Gwqhaenx Sihyanghdangz Gih baihde yienznaeuz miz hagdangz lai, mbouj- gvaq cawzhai gvaengh hagdangz, gizyawz hix lumj dieg Langjdungh nei dauqcawq dwg doengh reihbyaek. Mwhhaenx gyang haw Namzningz lij miz yiengh ci ndeu baenz raq baenz doih gig miz daegsaek, youq gwnz haw baenz gij gingjsaek ndeu, gij ci neix couhdwg danci. Vah youh gangj doxdauq, aen nienzdaih de yaek cawx aen danci ndeu hix gig mbouj yungzheih ha!

Bizyez le dauq diegcoj gunghcoz, geij bi mbouj ndaej haeuj Namzningz. Bi 1991, Dahnuengx gou gauj ndaej haeuj Gvangjsih Sawcuengh Yozyau. Bide 9 nyied soengq de bae yozyau bauqmingz gvaq le, gou youh haeuj Namzningz bae youz. Gek ndaej geij bi, fodfwd roxnyinh Namzningz bienq ndaej beij gaxgonq seuqcingh gyaeundei lo, laxlawz dwg vih angqcoux Daengx Guek Minzyinvei youq Namzningz haibanh caeuq Swcigih laebbaenz 30 hopbi, cungh- yangh roengz ngaenz hawj Namzningz cang gyaeu coux hek, daegbied dwg aen gunghcwngz Minzcuz-Cauzyangz Vanzgyauhgyauz guh baenz, neix hawj Namzningz hainduj miz yiengh baij- daeuz hawsingz ciuhneix lo. Mbouj- gvaq, hawj gou yaenqsiengq ceiq naek dwg diuz Rijcauzyangz youh uq youh haeu, de hawj yienghsiengq Namzningz doek daemq haujlai.

Bi Yanghgangj dauqma ndaw rungj guekcoj, lwgnyez gou hix hainduj roxyiuj lo, swnh Nanz-Gunh Dietloh duenh Namzningz daengz Bwzswz ngamq hai doeng, bide ngamq cuengq sujgyaj, gou daiq daengx ranz vunz naengh hojceh daeuj youz Namzningz Dungvuzyenz. Dingqnyi naeuz Langjdungh baihde hainduj haifat lo, baezde gou daegdaengq gag naengh cigunghgyauh bae gvaehyawj hop ndeu. Dahraix, roen song mbiengj gij ndoi namhhenj gaenq deng vat bingz, gak cungj gyaq sang dawz daeuj daengj ranzlaeuz dauqcawq ndwn youq. Da raen cij dwg caen, Gyanghnanz Gih caeuq Sihyanghdangz Gih gizde hix ciemhciemh haigoeng hwnjdaeuj, Namzningz yaek aeu miz bienqvaq hung lo. Mwhde gou haeujsim yawj, gwnz haw Namzningz danci bienq noix lo, fanjdauq rim gai cungj dwg ci mozdoz yiengjsasa, gvaiq mbouj ndaej vunz an coh Namzningz guh “aen singz gwih youq gwnz ci mozdoz”.

Dieb haeuj sigij moq, gou engq haeujsim gij bienqvaq Namzningz, densi、bauqceij、gwnz vangj ngoenz- ngoenz baudauj Namzningz hwnj guh gak cungj hanghmoeg hung: Mieng- cauzyangz Gaijguh、Minzcuz Gvangj- cangz Cauxguh、Nanzhuz Gunghyenz Canggyaeu、Yunghgyangh Ngeih Giuz Sam Giuz Gunghcwngz、Cuzhih Lizgyauh Gunghcwngz、Langjdungh Gicehcan、Vanzsingz Gauhsuz Hanghmoeg、Veicanj Cunghsinh Hanghmoeg、Vujsieng Gvangjcangz Gunghcwngz、Gyanghbwz Dadau Gunghcwngz、Bwzsah Dadau Gungh- cwngz、Vandaz Gvangjcangz、Nanzhuz Suidau Gunghcwngz、Namzningz Daihgiuz、Namzningz Gihcangz Moq doenghgij hanghmoeg hung neix, ndaej yungh coenz vah ciuhgeq “fodfwd gyanghwnz rumzcin daeuj, doenghgo faexleiz va hausak” daeuj beij gangj yiengh bienqvaq Namzningz di hix mbouj gvaqbouh, couhdwg baengh gij hanghmoeg gunghcwngz hung neix, Namzningz bienq gyaeu lo, yinx gij vunz daj guekcoj seiq fueng bet baih comz daeuj, yinx Cungguek-Dunghmungz Bozlanjvei ciengxlwenx youq neix haibanh, caemhcaiq Lenzhozgoz hawj Namzningz an aen coh “aen singz ceiq hab vunz youq”.

Ginggvaq lai bi fazcanj, Namz- ningz daj gaxgonq gij dieg iq mbe hung daengz ngoenzneix miz 7 aen gih. Gaxgonq hamj Dahyunghgyangh ngamq miz aen giuz dog, seizneix miz lai aen giuz lo, vunzyouq hix mauhgvaq 750 lai fanh. Gij vunz caemh youq aen singz neix miz haujlai minzcuz, gyoengqde daj guekcoj gak dieg comz daeuj cawx ranz guh seng- eiq. Gak cuz beixnuengx doxhuz caemh youq, caezsim cauxlaeb baenz aen ranz hung ndeu, vihneix Namzningz Si ndaej aen coh “daengx guek minzcuz doxgiet cinbu cauxguh sifan si”.

Swnh raq rumz gaijgwz hailangh ci le 40 lai bi, ngoenzneix Namzningz gaenq bienqbaenz dieg “byongh singz mbaw heu byongh singz laeuz” ndeu, Langjdungh baihde laeuz sang lumj ndoeng rangz nei, hawj vunz ngiengxgyaeuj bae muengh. Haujlai vunz ndaw singz haeujok gaenq dwg hai ciiq bonjfaenh. Seizneix gangj daengz Namzningz, hawj vunz mboujdan siengj daengz de dwg dieggyaeu daengx bi vamoq angj hai ndeu, vanzlij siengj daengz song yiengh lajbiengz rox doh dem: Namzningz Gozci Minzgohcez caeuq Cungguek-Dunghmungz Bozlanjvei!

Ngoenzneix, laj aen singz gyaeundei neix gaenq miz didez doeng lo, seiqhenz miz gauhdez caeuq gauhsuz goengloh hop, miz roenraemx doeng daengz Cuhgyangh Sanh- gozcouh baihde, vanzlij miz feihgih mbin coh Dunghnanzya gak guek dem. Bi’gvaq de cang ndaej engq gyaeundei maez vunz daeuj angqcoux Gvangjsih Bouxcuengh Swcigih laebbaenz 60 hopbi.

Gou maqmuengh daengzcog baengh roengzrengz daih haifat ranghdieg Bwzbuvanh caeuq Vujsieng Sinhgih, Namzningz itdingh hawj vunzbiengz daiq daeuj yiengh moqsag ndeu, bienqbaenz naedcaw youq baihnamz guekcoj fat ok ndongq- lwenq.