Cietcaemzgvej Bouxcuengh, youh heuhguh Cietyahgoep, dwg gij fungsug vunz ciuhgeq Bouxcuengh baiqfug duzgoep louz roengzdaeuj haenx. 2006 nienz 5 nyied 20 hauh, cietcaemzgvej Bouxcuengh ndaej gozvuyen baecinj liedhaeuj buek daih’it guekgya gaep feihvuzciz vwnzva yizcanj mingzloeg.

Cietcaemzgvej vueddoengh hwng youq Dunghlanz Yen ranghdieg song henz Dahhoengz couhdwg Ginhguz、Bahcouz、Cangzgyangh、Aidung、Dunghlanz、Cangzloz、Dadungz daengj yanghcin doengh mbanj Bouxcuengh; caemhcaiq, Denhngoz Yen Luzbaiz Cin Nazdung Cunh、Yinzbangj Cunh，Bahmu Yangh Banjmoh Cunh, Nanzdanh Yen Vuzai Cin Nadi Cunh, doengh mbanj caeuq Dungh- lanz Yen doxlienz neix hix hwng guh aen vueddoengh neix. De dwg aen vueddoengh gvenq ndawbiengz doenggvaq caeq、haem duzgoep daeuj yawh ndwenngoenz、gouz bouxvunz caeuq doihduz hwngvuengh、fwn swnh raemx ndei. Ngoenzciet daj ndwen- cieng coit hainduj, guh geijlai nanz ne gak dieg mbouj doengz, mbangj dwg 5 daengz 7 ngoenz, mbangj dwg ndwen ndeu bae. Mbanj ndeu dandog guh hix ndaej, geij aen mbanj doxgap guh hix baenz.

Mboengq gvaq ciet, gyoengqvunz daenj hwnj buhvaq gyaeundei minz- cuz bonjfaenh, aeu caeq duzgoep guhdaeuz, roq laz hoenx gyong, heuh beixnuengx seiqfueng daeuj, angq comz giz ndeu, eu fwen goksasa. Vueddoengh cietcaemzgvej daihgaiq faen baenz ra duzgoep、youz mbanj ciengq duzgoep、caeq duzgoep、haem duzgoep、niemhgvaq daengj.

Ra duzgoep. Ndwencieng coit gwn ngaizcaeux gvaq le, vunzhung lwgnyez baenz gyoengq baenz bang bae gyaeujreih gyangnaz ra duzgoep. Ciuq laehgvenq aeu ra song duz, duz goeng ndeu duz meh ndeu. Ra ndaej le gyau hawj boux gaemguenj vued- doengh cang haeuj ndaw mboengqcuk bae, liuxle goemq ndei cug ndei, caiq yungh ceijraiz nem gvaq baihrog bae.

Youz mbanj ciengq duzgoep. Ra ndaej duzgoep le ngoenz daihngeih, gyoengq bouxcoz couh ram duzgoep bae cunz moix ranz ndaw mbanj lo, youz bouxsae doeg sawhohfuk, maq- muengh ranzcawj bi moq yiengh- yiengh hab hoz, loekcuk maj maengh, haeuxgwn rim ranz.

Caeq duzgoep. Ndwencieng cib- haj, youq dieggaeuq mohduzgoep seiqhenz baek hwnj gij ceijfan haj saek sang haj roek mij haenx, liuxle baij hwnj huqcaeq, hoenx nyenz hoenx gyongnaeng, saxcaeq duzgoep.

Haem duzgoep. Ngoenz haem duzgoep gak dieg mbouj doengz, hoeng cungj dwg youq ndwencieng ngeihhaj daengz ndwenngeih cocaet mboengq neix. Gij yizsi haem duzgoep hix mbouj doengz, gveihmoz miz hung miz iq, Bahcouz Yangh Mbanjbyayingh Dunz guh gij yizsi ceiq hoenghhwd, moix baez cungj miz baenz cien vunz camgya, vueddoengh neiyungz hix gig fungfouq. Ngoenz haem duzgoep, gwn ngaizcaeux gvaq le, caj ndaw mbanj yiengj gvaq sam baez“bauqdeih”, gyoengq bouxcoz couh gwed hwnj seiq aen nyenz bae gwnz bosang henz mbanj hoenx, daengz banhaemh cij maranz. Gyanghaemh daengx mbanj bouxsai mehmbwk bouxlaux bouxcoz cungj comz youq laj ceijfan, guh yizsi haem duzgoep.

Niemhgvaq. Haem duzgoep gax- gonq, dawz seihaiz(goet) duzgoep bi’gvaq ok gonq, yawj gij saek de, ciuq vunz naeuz ndok henj couhdwg naeuz bineix rumz swnh fwn ndei, ndaej haeux rim ranz; ndok hau couhdwg mbwn rengx, ndaem haeux mbouj baenz, hoeng ndaem faiq couh fungsou; ndokndaem dwg gomiuz、vunz caeuq doihduz cungj miz bingh miz cai. Neix liuxle, youz bouxgeq ndeu doeg sawcaeq, haem duzgoep moq.

Linghvaih, vueddoengh lij miz eu fwen、bungq gyaeqnyumxsaek、dwkgyangq、 minzsug biujyienj、guh’angq ndawbiengz、 hoenx nyenz daengj. Mbangj dieg lij miz daenj mauhngeg duzgoep yienj goengsaenz、yahsaenz、ciengginh duzgoep caeuq doenghboux saenzlingz wnq, faenbied diuq yienj gak cungj foux.