Gaxgonq sam bi, Swcwngz、Lozlouz、Gyahyouz 3 aen yanghcin Lingzyinz Yen Baksaek Si gungh miz 7 aen mbanj 680 ranz 3010 vunz neix vut gungz duet mauh hojndoq bae lo, boux daiqroen vut gungz couhdwg Van Cungzsang boux cunhcihsuh Mbanj- lungjcau dangdieg neix.

Van Cungzsang mboujdan dwg boux vunz Lingzyinz bonjdieg, hix dwg boux giyezgyah dangdieg gungganq okdaeuj ndeu. Gvaqbae cibgeij bi seizgan, de daj boux okrog bae dajgoeng bienqbaenz boux ndaem caz, daj boux ndaem caz bienqbaenz boux lauxbanj, daj boux lauxbanj bienq- baenz boux cunhcihsuh, gij gojgaeq de daj daiqlingx gij ranzgungzhoj aen mbanj ndeu daengz daiqlingx gij ranzgungzhoj rangh dieg ndeu vut gungz baenz miz gaenq cienz baenz vahndei.

Daj Daegdajgoeng Bienqbaenz Daihlauxbanj

Bi 1978, Van Cungzsang youq Mbanjlungjcau Lingzyinz Yen okseng. Gizneix caeuq mbanj rin mbanj bya doxlumj, ciuhciuh daihdaih caj mbwn gwn raemx, youq ndaw geh rin vat ra gijgwn.

Van Cungzsang roengzrengz doegsaw, laebceiq byaij ok mbanj bya hojndoq. Mwh ndaej 16 bi, aenvih daxmeh baegnaiq lai baenzbingh guh mbouj ndaej hong, ndaw ranz bienq ndaej engqgya hoj lo, Van Cungzsang dangguh daeglwg daih’it mbouj miz banhfap laebdaeb doegsaw, cijndei mbouj bae hagdangz lo, dauq ranz guhhong dawz hwnj mbaqrap naek ndaw ranz.

Lwgnyezrauh 16 bi, guh ndaej gijmaz? Cat youzcaet、dienhhanh、coih cimozdoz……Bi 1995, de riengz daxboh bae daengz Yihungz Gozyingz Cazcangj, daj boux ndaem caz、boux coemhfeiz、boux haeuj cang, guh daengz banhcangj、cehgenh cujyin……

Daeg mbauq ngwn neix yungh 3 bi seizgan, sugrox ganqleix suencaz caeuq gij dinfwngz gyagoeng mbawcaz liux, Lingzcunh Cazcangj goq de guh fucangjcangj. Ndaej de daiqlingx, cazcangj yied guh yied ndei, haujlai baez aeundaej gij ciengjhung gozci. Bi 2005, Van Cungzsang danghwnj cangjcangj lo.

Bi 2010, Lingzcunh Cazcangj venj baiz cienjnyiengh, Van Cungz- sang bungzdaengz genjleh lizhai roxnaeuz louz roengzdaeuj. Dangh- naeuz aeu ciepfwngz cazcangj, 600 fanh maenz cienzcienjnyiengh bae gizlawz aeu? Danghnaeuz aeu lizhai, couh dangq dwg vut gij goengrengz cibgeij bi bae lo, aeu daj gyaeuj guh moq. Van Cungzsang mbouj simlaemx vutvak bae, de caeuq mbiengj cienj- nyiengh doxyaeng gonq, ceng’aeu baen geiz hai cienzcienjnyiengh, liuxle caeuq boux ndaem caz doxyaeng, si cawx mbawcaz moq, gaijgez aen vwndiz cienz riuzdoengh mbouj doh.

Van Cungzsang ndaej ciepfwngz Lingzcunh Cazcangj lo. Bi 2013, Lingzcunh Cazcangj canh ndaej 200 fanh maenz cienz, Van Cungzsang canh ndaej “doengj gim daih’it” ciuhvunz bonjfaenh. De byaij hwnj diuzroen cauhnieb moq, douzcienz 300 fanh maenz soucawx Gozyinh Cazcangj, hai Lingzcunh Cazyez aen faencangj daihngeih; douzcienz 200 fanh maenz soucawx Gauhlusanh Cazcangj, hai Lingzcunh Cazyez aen faencangj daihsam……

Bi’gvaq, Gvangjsih Lingzcunh Cizdonz laebbaenz caemhcaiq venj baiz sangsi, Van Cungzsang danghwnj daihlauxbanj lo.

Daj Daihlauxbanj Bienqbaenz Boux Ganbu Ndaw Mbanj

“Van lauxbanj yaek dauqma guh boux ganbu ndaw mbanj lo!” Bi 2013, Mbanjlungjcau riuzcienz aen siusik yienghneix.

Bihaenx, vih gaijgez gij vwndiz “gij naengzlig song daiq” gihcwngz cujciz mbouj ak, Lingzyinz Yenveij gietdingh cingj buek bouxak lajmbanj ndeu guh bouxbangfwngz dangjcihbu suhgi ndaw mbanj.

“Gou mwhhaenx haeuj dangj gaenq ndaej 14 bi lo, dangjcujciz ciuheuh, gou mbouj miz leixyouz mbouj han’wngq.” Van Cungzsang naeuz.

Guh ndaej bi ndeu roengzdaeuj, vunzmbanj ceiq maij yungh geij cih saw neix daeuj bingzgyaq Van Cungz- sang, neix couhdwg: Lauxsaed souj- saenq、aensim goengcingq、maenh’ak. Bi 2014 ndwen 4, cunh “song veij” vuenh gaiq, Van culij bienqbaenz Van cihsuh lo.

Ngamq hainduj guh cihsuh, aeu gaijgez aen vwndiz ndaw mbanj mbouj doeng roen. Gij cienz aen hanghmoeg “it saeh it yaeng” ceng’aeu ndaej lo, hoeng vunzmbanj ok mbouj ndaej 15% gij cienz bouhfaenh aeu gagcouz haenx.

Van Cungzsang seizneix ndwn okdaeuj lo, gag ok cienz demh. Doeklaeng, Van Cungzsang youh demh 100 lai fanh maenz cienz coih roensuijniz 23 goengleix, gaijgez aen vwndiz ca mbouj geijlai 2000 vunz haeujok hoj; daiqdaeuz hwnjguh daemzraemxgwn 6000 lizfanghmij, aen vwndiz 10 aen mbanj 420 vunz gwn raemx hoj ndaej gaijgez lo……

Baenzlawz guh cijndaej hawj ndaw mbanj 100 ranz 320 vunz vut gungz, dwg gij saeh hung ndaw sim Van Cungzsang. Ngamq guh ganbu ndaw mbanj, lwgda de couh yawj coh gij bya Mbanjlungjcau, geh rin mbanjbya neix gig hab goywdoj sengmaj. Bi 2013, Van Cungzsang cujciz vunzmbanj ndaem goywdoj. Aenvih saenq de, vunzmbanj nyienh aeu ok gij reihnaz ndaw ranz, gyonj ndaej 1000 moux, gyau hawj de leix.

Fwngz bungj dab sawhezyi nanwtnwt ndeu, Van Cungzsang rox- nyinh diuzrap gwnz mbaq naek- gywggywg. Youq doenghbaez, conq reihnaz ndaw geh rin haenx, moix moux souhaeuj mbouj mauhgvaq geijcib maenz cienz. Ranzgungzhoj naemj mbouj daengz, Van Cungzsang cix yungh gij cienzco bingzyaenz moix moux 300 maenz cienz bae co aeu, lij cingj gyoengqde gyahaeuj hozcozse, youq ndaw hozcozse guhhong ra cienz, byaibi lij miz faenhoengz dem.

Aen Loqsiengj Caezcaemh Baenz miz Boux Ganbu Ndaw Mbanj

Aen mbanj ndeu baenz miz caengz doh. Aeu Mbanjlungjcau guh gizhaidin, de yaek hawj engq lai ranzgungzhoj caeuqfaenh haeuj ndaw hwngfat canjnieb bae.

Bi 2015, 2500 moux suencaz aen faencangj daih’it Lingzcunh Gungh- swh deng Van Cungzsang faen baenz haujlai faenh, soengq hawj 128 ranz ranzgungzhoj mbanjbya Swcwngz Cin、Lozlouz Cin、Gyahyouz Cin guh guenjleix mbouj aeu cienz. Doengz- seiz, doenghgij ranzgungzhoj neix lij aeundaej gij huq guhhong caeuq son dinfwngz mbouj aeu cienz, gij gyaqcienz mbawcaz moq gai hawj gunghswh haenx moix gaen lij lai gvaq hangzgyaq maenz cienz ndeu dem. Mbouj geijlai nanz, de youh aeu Gozyinh、Gauhlusanh song aen caz- cangj gungh 2000 moux suencaz neix “soengq” hawj vunz lo, mbiengj ndaej faenbied dwg gij ranz- gungzhoj Mbanjbingzlinz、Mbanj- ansieng、Mbanjyanghlij、Mbanjbanz- yenz, cienzhong caeuq gij cienzhong aen faencangj daih’it doxlumj.

“Vut gungz cungj baengh Van cungj liux.” Lij Canghcunz vunz ndaem caz Mbanjbulinz Lozlouz Cin neix naeuz, bonjfaenh aenvih ndaw ranz miz sam boux lwgnyez doegsaw, diuzrap ndaw ranz naek lai bienq ndaej hojndoq. Van Cungzsang “soengq” hawj ranz de 30 moux suencaz le, song gvanbaz de moix ndwen mbaet mbawcaz souhaeuj 5000 lai maenz cienz, gyahwnj gij cienz hohleix gocaz seiz daengx maj, moix bi souhaeuj mauhgvaq 5 fanh maenz cienz.

Van Cungzsang miz loqsiengj engq hung. Dep bya baengh bya, mbanjbya gij ceiq mbouj lau noix haenx couhdwg rin. Bi 2017, de yiengq ndaw yienh daezok, leihyungh gij ginghci goenggya 6 aen cunh dangdieg, moix aen cunh douzcienz 30 fanh maenz, Lingzcunh Cizdonz douzcienz 200 lai fanh maenz, doxgap laebbaenz aen cangj liuhrin cizdonz. Aen genyi neix ndaejdaengz dangjveij、cwngfuj dangdieg doengzeiq lo.

Seizneix, aen cangj liuhrin gaenq guhhong, caemhcaiq yauqik gig ndei.“Bi 2018 gij moegbiu leihyinh aen cangj liuhrin dwg 150 fanh maenz cienz.” Van Cungzsang naeuz, gij cienz canh ndaej haenx yaek ciuq song faenh 10% boiz dauq hawj 6 aen cunh, moix bi moix aen cunh yaek demgya 5 fanh maenz cienzgoenggya, doengzseiz, aen cangj liuhrin ndaej daezgung 50 aen gangvih hawj gij ranzgungzhoj miz goengrengz guh hong henzgyawj.