Doenghsuen Mingzsw raemx umj bya, bya ing raemx, dinghcubcub ninz youq laj ndit, lumjbaenz cingq guh aen fangzhwnzloq heuswdswd ndeu.

Gwnzmbwn, nditndat rongh- nyannyan; lajdeih, seiqlengq heu- suemsuem, henjrwgrwg, hoengzfifi. Gou youq ngoenz seizcou mbwngvengq heiqseuq ndeu, hix daeuj daengz Doenghsuen Mingzsw youzbyaij, sik- haek deng gij gingj ndei dangqnaj dawzyinx lo, caensaed roxnyinh ndang soeng sim sangj, couh lumj duzrwi yawjraen vamoq nei, diemzsubsub ndoetgwn mbouj cuengq.

Yamq haeuj bakmbanj, dangqnaj couhdwg diuz dah sawdikdik ndeu. Sokdah dingz rim ruzyouz. Gou ngamq naengh ndei, ruzyouz couh menhmenh vad bae. Muengh gvaq baihnaj, diuz dah iq ngutngut ngeungeu lae bae mbouj raen gaenqdah. Ndit cik mienhraemx, raemxlangh migmyan- myan, lajraemx duzbya baenz bang baenz roix, riengz aen ruz bongh baefifi, lumjbaenz yinx loh bouxhek daj gizgyae daeuj haenx bae youz diuz dah de. Raq rumz iq he ci daeuj, hawj vunz ndang seuq heiq swnh. Mbaet caw sup gaemz heiq ndeu, lumjbaenz mup haeuj haeuxgok rangfwdfwd, ngiengx gyaeuj yawj bae, baihnaj baenz doengh haeuxgok henjrwgrwg, ndongqmyigmyig lumjbaenz mbaw damjhenj. Ndaw naz, geij boux vunzguhnaz cingq gungj hwet gvej haeux, gyoengqde deih mbouj deih enj hwet ngiengx gyaeuj, aeu sujbaq mbaeumbengmbeng uet hanh, fajnaj lumj dujva langhhai, riunyumnyum, ndawsim dangq gwn dangzoij nei diemzsisi.

Sawqmwh, miz sing fwen daj hamq dah cienz daeuj. Swnh sing ngonz bae, caenh raen laj gocuk mwncupcup haenx ndwn miz song boux canghfwen, bouxsai bouxmbwk. Songde daenj baenz dauq buh Bouxcuengh moqsaksak, lumj ndaw denyingj《Liuz Sanhcej》Ahniuz caeuq Liuz Sanhcej doiq fwen nei, mwngz cam gou dap, sing goksadsad, rwenz daemj byonghmbwn. Mwngz dingq, baihneix eu “nuengx lumj va gwnz giuz, beix baenz biuz gyang haij; gwnz giuz va giet caij, biuz gyang haij sanq bae.” Baihde hoiz “beix lumj go faex hung, hwnj byonghmbwn sohsuem, nuengx nanz ndaej bae duengh, hoz siengj ndwi ndaej aeu.” Dahsau dauj- youz nyoengxcoi gyoengq hekyouz caeuq songde doiqfwngz, caenh raen goenglaux 60 lai bi ndeu, em’em song coenz, doq ndwn hwnjdaeuj, bak aj fwen ok: “Gofaex youq bak gamj, gou yaek yamq bae faenz, miz vunz hah rox caengz, gou bae faenz ndaej mbouj?” …… Daihgya deng gij fwen dwggyaez ndeiriu neix daeuq ndaej riuhaha. Gij roeg henz dah hix deng ndwet dwk bek fwed mbinfofo, duzbya ndaw raemx yat ok mienh- raemx bongjcadcad. Daihgya lij hoz- ngah siengj dingq, hojsik aenruz gaenq vaij gvaqbae lo. Caeklaiq dauqcawq gingj ndei yawj mbouj liux. Gou cingq da mbouj rox yaep coh song henz dah ngonz bae, sawqmwh miz bang bit ndeu ingj haeuj lwgda gou daeuj. Gyoengqbit humx baenz aen hop, youq gwnz raemx youz bae youz dauq, gij yiengh cwxcaih raixcaix. Miz song duz bit daegbied daeuq vunz, song duz de yaep he cup bak, yaep he youh aeu hoz doxheux, lumj song boux youx nei doxndiep doxgyaez. Gou gag roxnyinh geizheih, nanzdauh duzbit hix dingq ndaej rox gij fwen vunz, dingq ndaej doenghsim le, nyaenx mbouj ndaej habsim hab’eiq couh doxumj doxnem?

Aen ruz ndonj gvaq geij diuz giuz iq, dangqnaj sawqmwh gvangq- langlang, ngiengx gyaeuj muengh gyae, baenz goengq baenz goengq bya sang ngiengxngwdngwd, heu- suemsuem. Mizmbangj lumj duzvaiz, cingq cengj ek rag cae; mizmbangj lumj duzfw, cingq numqnene nodbyaij; goengq bya haenx couh lumj goeng vunzlaux ndeu, naj riunyumnyum muenghyawj doenghnaz, lumjbaenz gig rimhoz gij lwglan de saedceij gvaq ndaej fungcuk、an’onj. Ceiq geizheih dwg, goengq bya ndeu lumj aeu fouj bag baenz nei bingzcubcub, gwnz datbya yaenq miz sam duz max, duz maxmeh he cingq daiq song duz maxlwg cwxcaih gwn nywj. Maxmeh ngiengx gyaeuj iet hoz, lumjbaenz doiq song duz lwg naeuz:“Menhndei gwn, gizneix nywj daihbaj.”

“Sou coh baihlaeng yawj.” Dah daujyouz fwngz vix raeblaeng rangh bya haenx cam naeuz, “sam goengq bya haenx raen gvaq lwi?” Daihgya itseiz ngeizngwdngwd, doxcim myaeg- myaeg. “Neix dwg sam goengq bya yaenq youq gwnz youzbiuq haenx.” O! Caen dwg bw. Dingq daujyouz baez naeuz, gou cij ndaej geiq hwnjdaeuj, caenh maezsim ngonzyawj gij gingj- saek gyaeundei dangqnaj, cungj lumz gij saeh youzbiuq neix lo. Yienzlaiz dozsiengq sam goengq bya neix, ndaej yaenq youq gwnz youzbiuq fathengz gvaq, senqsi okmingz lo, haujlai vunz cingq dwg vih gij bya okmingz neix daeuj Doenghsuen Mingzsw youzyawj. Seizneix caenda ndaej raen gij yienghsiengq, hawj vunz geijlai sim- angq ho! Gou vaiqvit yaengx aen soujgih, laebdaeb ingj geij mbaw siengq guh louzniemh.

Lij ngah yawj caengz gaeuq, aenruz couh dep hamq lo. Yamq hwnj sokdah, raen haujlai vunz doxcaenx youq henz dah baij ndang ingj siengq, gou geizheih bae yawj, caenh raen gizhaenx baek miz gaiq baiz ndeu sij naeuz “Gizdieg goepingj《Vah Cenhguz》”. Gou sikhaek hix sim diuqbubbub, byaengqda muengh bae, gizgyae, bya sang bya daemq doxin doxbaengh, ndit daengngoenz daj gwnzmbwn lamzsuemsuem haenx cik roengzdaeuj, ndongqbyambyam, lumj bouxsien gwnz bya cingq coh lajbiengz vanq roengz fanh diuz sienqgim, doenghnaz gvangqmiengmieng haenx, yaepyet doq bienqbaenz nywj heu、haeux henj、va nding, lumj fuk man valoekloek he bingzcupcup mbehai daengz henz dah. Ngonz ndaw dah, mbouj rox dwg goengqbya fouz youq ndaw raemx, roxnaeuz raemxdah lae youq gwnz bya? Caen hawj vunz ngeiz dwg ndang youq diegsien, gou lumj mwnh lumj fiz, ndang fouzbyoeng- byoeng couh dangq din caij gwnz fwj.

Gou lij daj ndaw bak dah daujyouz rox daengz, 20 bi gaxgonq, lij miz geij bouh densigi denyingj cozbinj hix dwg youq gizneix goepingj. Lumjbaenz 《Niuzlangz Sihnij》《Laeuj Dwg Mbanjcoj Get》《Canghyw Banh Biengz》《Cangh- ywdoj》cungj youq gizneix aeu gij gingjsaek neix guh beigingj. Caen dwg “va rang yinx rwi mbaet, raemx gip ciu bya douh”.

Gou riengz diuz roen iq ngutngut ngeungeu henz dah menhmenh byaij bae. Youzbyaij youq ndaw bya heu raemx saw neix, sawqmwh roxnyinh lumjbaenz youq gizlawz raen gvaq. O! Gveilinz. Byaij youq Doenghsuen Mingzsw, gou lumjbaenz byaij youq diegsien Gveilinz.

Youq Mingzsw, gou lij dingqnyi cit goj gyaeundei ndeu. Cienznaeuz, haujlai nanz gonq seiz, Namzhaij miz duz lungziu ndeu, aenvih hozhaenz gij gingjsaek Gveilinz, couh cangguh yiengh vunz, daengz Gveilinz youz- yawj. Mwh dauqma, de guh sezswd, dawz duenh byaraemx Gveilinz ndeu sukiq le, yo youq ndaw daeh, yienzhaeuh gwih fwj ma baihnamz, yaek daiq ma Namzhaij. Byawz liuh, gij saeh neix deng Nyawhvuengz Daihdaeq rox lo, Nyawhvuengz Daihdaeq couh baij duzbyaj okdaeuj, aeu fouj bag dai duzlungz. Duzlungz baez dai, duenh byaraemx ndaw daeh de couh doek roengzdaeuj, ngamjhab doek daengz gwnz dieg Mingzsw, ndigah, gij gingjsaek byaraemx Mingzsw couh lumj gij Gveilinz nei gyaeundei lo.

Gij cienznaeuz neix yienznaeuz dwg vunz bien okdaeuj, mbouj dwg saeh caen, hoeng, de dwg gij siengj- muengh gyoengqvunz, geiqdak le gij simnyienh gyoengqvunz gyaezmaij gij doxgaiq gyaeundei haenx. Doenghsuen Mingzsw, bya heux raemx, raemx geuj bya, dauqcawq seuqsadsad, caem- rikrik. Mwngz ndwn youq gizneix, couh lumj cimq youq ndaw suenva, cimq youq giz diegsien, caeuq byaij youq gij byaraemx Gveilinz nei, ngah youq lumz dauq.

Diegmbanj Bouxcuengh, gizgiz cungj dwg byaraemx Gveilinz!