Ciethah, youh heuhguh “cietciengqhah”, “hah”、 “ciengqhah”, eiqsei couhdwg eu fwen, de dwg aen cietfwen Ginghcuz ciuhgeq couh cienz roengzdaeuj ndeu.

Ciethah cujyau youq Guengjsae rangh dieg Ginghcuz comzyouq louzhengz. Seiz gvaq ciethah gak dieg mbouj doengz, Vanveij、Vuhdouz song dauj dwg youq liggaeuq loeg nyied cocib banh, Daujsanhsinh dwg youq liggaeuq bet nyied cocib banh, doengh mbanj henz haij cix dwg youq ndwencieng ngeihcib haj hauh banh. Yienznaeuz seiz gvaq ciet mbouj doengz, hoeng ngoenzciet yienghlawz guh caeuq guh gijmaz cix doxdoengz.

Gij lizsij youzlaiz ciethah cienzgangj miz haujlai cungj, ndawde haemq miz daibyauj dwg lajneix song cungj: Ciuhgeq miz boux sienfwen ndeu madaengz sam aen dauj Ginghcuz neix daeuj, doenggvaq cienz fwen fatdoengh vunzlai hwnj- daeuj caeuq doenghgij funghgen apbik doxhoenx. Gij fwen de hawj vunzlai gig gamjdoengh. Doeklaeng, vih geiqniemh de, vunzlaeng laeb- baenz le “dingzhah”, dinghseiz youq dingzhah eu fwen cienz fwen, cugciemh bienqbaenz fungsug. Aen gangjfap wnq dwg, ciuhgeq gyaeraez, youq din Ndoibwzlungzlingj henz- mboek haij Bwzbuvanh, miz duz iucing sipndangj hungloet ndeu, gwn vunz baenz gvenq bae. Miz boux saenz ndeu ndaej rox le, couh daeuj gizneix vih beksingq cawzhaih. Boux saenz ok geiqmaeuz gaj raemj duz sipndangj baenz sam gyaengh, hawj gyoengqde swnh raemx lae baenz Vanveij、Vuhsanh、Sanhsinh “sam aen dauj Ginghcuz”, henzgyawj beksingq youh ndaej an’onj gvaq saedceij lo. Yienghneix vunz Gingh- cuz couh gungq boux saenz neix baenz “dingh haij daihvuengz”, laeb miuh saxcaeq de, moix bi cungj daeuj henz haij bae ciep “dingh haij daihvuengz” daeuj gwn caeq, gij hozdung neix couh bienqbaenz ciethah lo.

Banh ciethah itbuen aeu sam ngoenz. Geizgan daj laep daengz rongh, eu fwn diuq foux mbouj dingz. Vunzlai gak minzcuz seiqhenz hix comz daeuj angqhoh. Ciethah youq gyang dingzhah gawjbanh. Dingzhah laeb youq henz mbanj, aeu faex- ndei guhbaenz, maenhndongj youh ndeiyawj. Gyang ding dingzhah laeb miz congznaengh, gwnzde gungq saenzvih daengx mbanj caez gungq (lumj “dingh haij daihvuengz”) caeuq saenzvih goengcoj.

Ciengqhah hozdung faenbaenz geij hot: Daih’it dwg coux saenz, ngeih dwg caeq saenz, sam dwg haeujdaiz dingq hah. Ciengqhah dwg ciethah ndawde hot ceiq youqgaenj ndeu, yungh seizgan hix ceiq nanz.

2006 nienz 5 nyied 20 hauh, aen ciethah Ginghcuz, youz Gvangjsih Bouxcuengh Swcigih Dunghhingh Si bauq haenx, ndaej gozvuyen baecinj liedhaeuj buet daih’it guekgya gaep feihvuzciz vwnzva yizcanj mingzloeg.

2009 nienz, Ciethah Ginghcuz Caeuq Cihnamz Vwnzva Ginghcuz Conzcwngz Yenzgiu Cunghsinh youq Gvangjsih Fangzcwngzgangj Si cingqhangq venjbaiz laebbaenz. Hong yenzgiu cunghsinh cujyau couh dwg baujhoh caeuq cienzswnj guekgya gaep feihvuzciz vwnzva yizcanj——Ciethah Ginghcuz caeuq Cihnamz vwnzva Ginghcuz lo.

Ciethah dwg ngoenzciet ceiq youqgaenj Ginghcuz, de ropcomz yienh’ok le gij vwnzva Ginghcuz baugvat saenqyiengj、saenqniemh、cingsaenz caeuq gamjcingz lienz- daengz yaem’wenq vujdauj yisuz daengj, cungfaen gangjlwnh le vunz Ginghcuz gij cingzgamj daegdiemj.