“Ciengjgim mingz daih’it, Duenz Habciengq Sih’wnh Guengjsae Cung- guek!”

Bingzsaemj ngamq gangj sat, fat ciengj yienhciengz sikhaek nauhyied hwnjdaeuj. Aen doih duenz habciengq yezyiz daj Guengjsae Bingzgoj Yen daeuj neix, aeundaej mingzdaeuz ceiq sang “rangh ndeu loh ndeu·ciengqgok daengzcog” 2018 Majlaizsihya gozci Vazyinz habciengq doxdax.

“Dwg gij minzcuz cij dwg gij seiqgyaiq, Duenz Habciengq Sih’wnh dou vihmaz ndaej byaij ok douguek byaijcoh seiqgyaiq, couhdwg aenvih gij lizsij gyaeraez、gij vwnzva goekdaej naekna fwenleux Bouxcuengh hawj gij saenqsim caeuq rengz cukgaeuq hawj dou.” Donzcangj Duenz Habciengq Sih’wnh Nungz Minjgenh naeuz.

Neix dwg aen duenz habciengq baenzlawz ndeu? Gyoengqde youh yienjciengq le hot go baenzlawz ndeu?

Gij raeblaeng mingzdaeuz, dwg Bingzgoj Yen giensouj fwenleux Bouxcuengh, dwg vwnzva Bouxcuengh fat ok rengzhoengh seizdaih.

Fwenleux Bouxcuengh dwg gij daiqbiuj vwnzva Bouxcuengh, dwg cek saw bwzgoh ndawbiengz nyuenz miz Bouxcuengh. Fwenleux Bouxcuengh cienzbouh yungh Sawndip cauraiz riuzcienz, aenvih swz ciengq moix coenz cungj miz “leux——leux” guh daengh ciengq okdaeuj cij ndaej aen coh neix. Bi 2008, fwenleux Boux- cuengh Bingzgoj couh ndaej liedhaeuj guekgya gaep feihvuzciz vwnzva yizcanj mingzloeg. Geij bi neix daeuj, Bingzgoj Yen haenqrengz guh gij binjbaiz vwnzva fwenleux Boux- cuengh, Duenz Habciengq Sih’wnh couhdwg gij cingzcik ndawde aen ndeu.

Duenz Habciengq Sih’wnh youz donzcangj、cijveih、buenxciengq caeuq 19 boux canghfwen gapbaenz, 22 boux cungj dwg vunz Bouxcuengh. Vunz ndaw duenz miz canghfwen, miz lauxsae ciengqgo cungh siujyoz, lij miz vunzguhnaz、godijhu gyaez ciengqgo dem.

Bi 2017, Bingzgoj Yen 6 boux vunzguhnaz gapbaenz “gyoebhab roek yah”, caeuqfaenh ciet yisuz minzgoh gozci Namzningz 《Daihdeih Fwen Rwenz Lwenqsaek》 genjleh doxdax ndaej ciengjgim, gij sing fwen “gyoebhab roek yah” hawj Cangh Fan boux ciengqgo mizmingz Sinhgyahboh gamjdoengh, couh sikhaek cingj gyoengqde caeuqfaenh bi 2018 gozci Vazyinz habciengq doxdax.

“Dou maqmuengh gij fwen hwnj daizheiq gozci ndaej cungfaen yienh ok gij yinxdaeuz fwenleux Boux- cuengh，gij fwen Bouxcuengh lai singbouh nyuenz miz mbouj miz buenxciengq neix aeuyungh cangh- fwen engq lai, neix cij miz Duenz Habciengq Sih’wnh.” Nungz Minj- genh dauqngeix gij ginggvaq cujciz laebbaenz Duenz Habciengq Sih’wnh.

Daj cujciz laebbaenz daengz caeuqfaenh doxdax, Duenz Habciengq Sih’wnh dan yungh le song ndwen couh aeundaej mingzdaeuz hung, miz maz mimiz vujgi?

Gij dajdaej ceiq youqgaenj habciengq couhdwg sing daengh, Duenz Habciengq Sih’wnh dan baizlienh 10 ngoenz couh gaijgez le aen nanzdaez sing daengh neix.“Bingzgoj Yen dwg ranghdieg cujyau riuzhengz fwenleux Bouxcuengh, doenghgij vunz neix daj iq ciengq fwenleux dingq fwenleux, gig sug singbouh cujyau fwenleux. Doiq gyoengqde daeuj gangj, sing daengh gizsaed dwg gij bonjsaeh ceiq caixhangz.” Boux cijveih Duenz Habciengq Sih’wnh、boux cujyin Aen Cungsim Guenjleix Vwnzva Bingzgoj Yen Liu Linz naeuz.

Aenvih donzyenz ndawde miz lauxsae gyangngoenz aeu sonsaw, ndigah Duenz Habciengq Sih’wnh bingzseiz comz youq banhaemh baizlienh. Byaij haeuj ranzbaizlienh, gyoengq donzyenz cingq comz youq hag ciengq hot go moq 《Dahnuengx Riengz Rumz Bae Raen Daegbeix》.“Doenggvaq fwenleux Bouxcuengh haeuj hagdangz hozdung, gyoengq hagseng gig yinx fwenleux Boux- cuengh, gou hix caeuq gyoengqde faenyiengj mbangj di saeh duenz habciengq.” Vangz Cuilenz lauxsae ciengqgo Bingzgoj Gauhcungh naeuz.

Youq Majlaizsihya, song hot go sam singbouh mehmbwk habciengq 《Hwnz Ngoenz Doxsouj》《Rongh- ndwen》 Duenz Habciengq Sih’wnh caeuqfaenh doxdax haenx cungj daj fwenleux Bouxcuengh daezlienh.

《Ronghndwen》doiq sing daengh dienseng daegbied gagmiz fwenleux Bouxcuengh guh cauhbien, singbouh ndeidingq rwenzrwz. Fwen hainduj youz song singbouh nyuenz miz lingx ciengq, menhmenh ciengq caux ok gij heiqfaenh seuqcengh, hawj vunz lumj youq laj rongh ronghndwen hausagsag nei.

“Ronghndwen lumj sei lumj fangzhwnz, miz gij unqswnh caeuq gij gyaez daxmeh. Gou aeu ronghndwen guh cawjdaez cauhguh, couh lumj maqmuengh doenggvaq gij gyaeundei banhaemh daejyienh gij gingjsaek gaiq dieg gyaeundei Mbanjcuengh neix.” Moz Yenjcwz boux cauhguh 《Ronghndwen》 naeuz.

Bi 2005, Moz Yenjcwz lij youq lijcangj dajgoeng haenx caeuq geij boux hujgeiq laebbaenz aen doih- ciengqgo, youq dangdieg miz di okmingz. Seizhaenx, 《Gij Yigen Mizgven Gyagiengz Hong Baujhoh Feihvuzciz Vwnzva Yizcanj Guek Raeuz》 ngamqngamq okdaiz, daengx guek gak dieg cungj hwng baujhoh vwnzva minzcuz, Bingzgoj Yen hix hainduj roengzfwngz doigvangq fwen- leux Bouxcuengh.

Vihliux yinx ndaej engq lai bouxcoz cienzciengq、fatyiengz fwen- leux Bouxcuengh, Nungz Minjgenh seizhaenx guh boux cujyin Bingzgoj Yen Yinzda Cangzveijvei neix ra daengz Moz Yenjcwz:“Dou naemj vatcimh fwenleux Bouxcuengh, gyoengqsou dwg mbouj dwg gamj guh, aeu fwenleux caeuq gij yenzsu ciengqgo riuzhengz dox giethab hwnj- daeuj?”

Ndaej daengz Nungz Minjgenh iucingj, Moz Yenjcwz caeuq aen doihciengqgo hainduj sawq cauhguh go cauhnduj Bouxcuengh, caemhcaiq lai baez bae hawfwen fwenleux caijfungh. Baez daengz hawfwen, gyoengq canghfwen baenz bang baenz bang doiq fwen, gij yaem’wenq gaeuqgeq neix haprwenz youq gyang doenghnaz, Moz Yenjcwz ndaej daj ndawde aeu gij sucaiz cauhguh fungfouq neix.

Seizneix Moz Yenjcwz, mboujdan dwg bouxvunz daiqbiuj fwenleux Bouxcuengh, lij dwg boux fucujyin Aen Cungsim Langhbaij Swnjcienz Vwnzva Minzsuz Bingzgoj Yen. De itloh nyinhnaeuz, Bouxcuengh dwg aen minzcuz lizsij gyaeraez ndeu, miz gij lizsij vwnzva naekna, hoeng giepnoix gij go cawjdaez daegsaek sienmingz.“Gou maqmuengh bonj- faenh ndaej guh boux doidoengh ndeu, guh ok gij go ndaej daiqbiuj vwnzva Bouxcuengh, hawj vunz baez dingq couh rox dwg go Bouxcuengh.” Moz Yenjcwz naeuz.

Daj bi 2016 duiyouh le, Nungz Minjgenh couh laemxsim swnjcienz caeuq fatyiengz fwenleux Bouxcuengh. Aen Bozvuzgvanj Fwenleux Boux- cuengh youz de daiqdaeuz guh haenx gaenq baenz yiengh, gij lizsij hwngfat fwenleux Bouxcuengh、mizgven cek- saw、ceksaw fwngz cau ndawbiengz daengj cungj miz.