Doengxhaemh, laj go faexreiz hung raemh- rwdrwd gyaeuj mbanj haenx, daeg lwgcoz ndeu youq gizde ndwn mbouj maenh naengh mbouj onj, de “ndwn lumj moed raih din, naengh dangq cim camz hangx”. De heuhguh Daeggenz, cuhcungh ngamq baetnieb dauqranz guhhong ndaej saek buenq bi, caegcaeg caeuq Dahyungz Ranzveiz doxndiep doxgyaez. Haemhneix de nem Dahyungz duenq ndei 8 diemj buenq caez okdaeuj guhcaemz, hoeng seizneix gaenq 10 diemj gvaq lo lij mbouj raen ngumhngaeuz Dahyungz. Rumz baez ci gvaqdaeuj, gij mokhaemh mbaeqmbwtmbwt haenx bongj naj lij miz di nit. Ndaw hoz Daeggenz gag roxnyinh ciudaeuz mbouj daih ndei. Nanzdauh……

Daeggenz laeglemx byaij dauq ndaw mbanj, gyae’gyae couh yawjraen ranz Dahyungz daeng lij rongh myoxmwd. Gij rongh daeng youq gyanghaemh laepcupcup neix yienh ndaej daegbied gudan daegbied gadog. De mbaeudin yomyom byaij gvaqbae, ngamq lumh daengz gokciengz, simdaeuz couh diuqbubbub hwnjdaeuj. Dingqnyi ndawranz miz sing vunz daejfwtfwt, dwg Dahyungz daej, daej ndaej siengsim dangqmaz. Daeggenz roengzrengz nyaenx youq mbouj oksing.

“Dahyungz ha, mwngz couh gvai di dingq gangj ba. Daeggo mwngz nem dah ndeu gangj ndaej ngamj lo lij caengz miz ngaenz soengqlaex ne.” Neix dwg gij sing boh Dahyungz.

“……”

“Haiya, Daegfuk miz maz mbouj ndei? De cawx ndaej ci guh dajyinh, bi bang dangzcangj daeh oij mbouj rox ak gvaq vunz geijlai boix. Mwngz naeuz doenghboux hauxseng haenx byawz beij ndaej de? Haq hawj de mbouj loek law.” Ndaek laux de gangj le aeem’em geij sing.

“Boh, gou, gou……”

“Mwngz gijmaz? Gou rox mwngz siengj caeuq Daeggenz ndei……”

“Gou mbouj haq hawj Daegfuk.” Dahyungz cungjsuenq gangj vah lo.

“Mwngz ha mwngz, boux ranz guh ndaej gwn cix mbouj haq, mwngz yaek riengz Daeggenz bae gwn rumzbaek ha?” Boux laux haenx miz di hozgaek lo.

Daeggenz youq baihrog baez nyi daengz neix, lumj deng gyaengh faex moeb mbat ndeu nei, najda yaep ndaundeiq bae.

“Boh Dahyungz ha, mwngz couh……” Ndawranz cienz ok aen sing haetunq mehmbwk ndeu.

“Couh couh gijmaz?” Daeggenz daj geh conghgeuq ndomq raen boux laux he fwngz yeix yahlaux he fok naeuz, “Ced meh mwngz, mwngz lij cungh de, vunz cungj yaek soengqlaex daeuj lo, mwngz cungj caengz rox guh meh dem. Gou gaenq hanbak vunz lo, haetcog Daegfuk couh daeuj doxyawj. Mwngz yah huk neix gaej gyaux luenh bae, lwnh mwngz dingh gonq……”

Daeggenz caiq hix dingq mbouj roengzbae lo, baenq ndang couh buetdeuz, cix mbouj siujsim dik deng aen doengj nyapnyaj ndeu ringxgoeggoeg, hwk dwk daengx mbanj ma raeuqhumhum.

Mbouj geij nanz, Dahyungz couh deng boh de ep bae haq hawj Daegfuk bouxhaici dajyinh laeuq ngaenz ceiq ak mbanjnden lo.

“Nuengx bae haq lingh vunz, mok laep mbwn laep deih, laihnaeuz ndaej guh maex, mbouj ngeix lij lot deuz.” Daeggenz simcieg dangqmaz.

Gvaqlaeng, ndaej vunz yien sienq, Daeggenz gonqlaeng caeuq haujlai dahsau raennaj damzyoux gvaq, cungj dwg vih ndawranz mbouj doengz vunz, baezbaez saehcingz cungj dwg miz gyaeuj mbouj miz rieng.

Ranz Daeggenz mbouj daih guh ndaej gwn, bohmeh nienzgeij hix ndaej lo, dahcej gaenq bae haq geij bi, daegnuengx bae doeg gij hagdangz gisuz yozyau lablab cabcab haenx caengz baetnieb, lij dwg yungh cienz. Ndawranz mbouj miz maz vunz guhhong, hix mbouj miz maz, dandan ndaem miz song moux lingz naz haj roek moux oij. Doengh bi haenx cawx doxgaiq caengz nyaenx bengz、doegsaw mbouj yungh nyaenx lai ngaenz, lij suenq gvaq ndaej bae. Hoeng seizneix yienghyiengh cungj bengz cij oij mbouj bengz, mwngz naeuz dai mbouj dai, saekseiz raemj oij guh mbouj gib goq vunz daeuj bang saek ngoenz, ngaenzhong bengz hwnj mbwn bae. Daxmeh dwg boux canzcaed sam gaep, mbouj daih guh ndaej hong, daxboh ngoenznaengz ngah gwn laeuj, gaenx gwn gik guh, ndigah nyaenx lai bi daeuj nazreih soucingz cungj mbouj ndei geijlai. Ndawranz mbouj miz maz gyadangq, lumj feiz coemh raemx giengx nei, daengx ranz vunz goemz doem mbouj raen nywj. Mboengqgonq gunghcozdui baihgwnz haeuj ranz daeuj cazyawj le dingh ranz de guh “ranz gungzhoj caux dangj laeb gaj”.

“Guh naz mbouj ndaej gwn, gyoengqvunz ca ok rog, ngoenz nyaengq dangq hoij rok, muengh daengzcog baenz ndei.”Aenvih ndawranz hoj, boux ganbu bangfuz baihgwnz daeuj ranz naengh haujlai baez gvaq, Daeggenz gaengawq bonjfaenh cingz- gvang, gietdingh okbae gai rengz ra ngaenz, it dwg raen yauq vaiq, mbouj miz fungyiemj, ngeih dwg siengj youq baihrog ra ndaej saek dahsau guh youx.

Faex cax roeg mbouj douh, daeh byouq ndi sau riengz, daeglaux mbouj miz cienz, hojlienz gag ndang dog. Daeggenz gai rengz yaek ndaej hop bi lo hix ra mbouj ndaej maz ngaenz, hix mbouj miz saek dahsau yawj de hwnjda.

Youq aen haw iq gyawj Daeggenz guhhong haenx, miz dahsau lengjlili heuhguh Dahyen gai buhvaq, dah de hix dwg daj lajmbanj daeuj, dwggyaez dangqmaz. Daeggenz bae aen dan Dahyen cawx buh gvaq, Dahyen naj riunyumnyum, heuh Daeggenz guh beix, heuh ndaej vansisi, hawj Daeg- genz seizseiz cungj gag ngeixnumnum.

Ngoenzneix, Daeggenz ciq doengzdoih aeu aen cimozdoz moqsak he bae canggyaj genj cawx buhvaq, gizsaed yaek bae nem Dahyen gangj geij coenz goj. Ngamq yaek bae daengz henz dan dajgai, sawqmwh miz vunz sek sing hemq:“Gaeb caeg ha, miz vunz ciengj ngaenz lo!” Seizde, cij raen ndaek hauxseng ndeu rag daeh daj naj dan bonghdeuz, Dahyen song fwngz gaem rwzdaeh beng youq baihlaeng. Caengz caj Daeggenz ngeix dwg maz saeh, ndaek hauxseng haenx gaenq gaex Dahyen laemx roengz gwnz deih, yat hwnj aen cimozdoz gaeuqgat he hwnjfeiz hai deuz lo.

Saezngoenz dangdang, ndaek neix ciengj ngaenz? Daeggenz sikhaek doq hemq “dwk dienhvah bauqgingj vaiqdangq” doq cuenq gyaeuj ci hai bae gyaep.

Song aen cimozdoz gonqlaeng hai ok rog haw, lumj song boux gwih ci ak guh doxdax nei baefwdfwd. Daihgaiq gvaq saek cibgeij ngeihcib faencung, Daeggenz gyaep hwnj ndaek hauxseng haenx lo, song aen cimozdoz bingzbaiz bongh baefwdfwd. Daeggenz hat naeuz:“Dingz ci!” Hoeng ndaek de mbouj leixlangh, lij dwg hai baehumhum. Daeggenz hozhwnj raixcaix, song fwngz cuengqcak cimozdoz couh yat coemj gvaqbae gotdawz ndaek hauxseng haenx. Song aen cimozdoz doengzseiz laemx youq gyang roen, Daeggenz caeuq ndaek hauxseng haenx cungj deng sieng naek. Cingq youq seizneix, sing gingjdig swenjvauvau, gingjcaz daeuj daengz lo. Songde cungj soengq bae yihyen ciengjgouq.

Daeggenz baenz le boux yinghyungz gyaep ci gaemh caeg, gwnzbiengz miz vunz gien ngaenz hawj de ywbingh, naeuz “gaej hawj bouxak lae lwed caiq lae raemxda”. Cwngfuj byaujcangh de, laeb de guh daudwz mozfan. Mwh ywbingh geizgan, miz haujlai vunz daeuj yawjngonz de, Dahyen caemh daeuj yawjngonz de gvaq. Lij miz gicej daeuj caijfangj de, gij saehcik de ndaej fat hwnj gwnzvangj bae, haetlaeng lajmbwn rox doh, de baenz le boux vunz okmingz, baenz le “bouxsai miz lwedsingq” ndeu.

Bingh ndei le, Daeggenz baez ndaejhoengq couh iu Dahyen caez okbae byaij cet guhcaemz. Codaeuz, Dahyen baezbaez cungj caeuq de okdaeuj, ndaw hoz lij gig gyo’mbaiq de bang gaemh caeg aeu dauq gij ngaenz deng ciengj. Doeklaeng nanz le couh ciemhciemh mbouj nyienh okdaeuj lo.

Ngoenzsinggeiz ndeu, Daeggenz dwk dienhvah youh yaek iu Dahyen okdaeuj guhcaemz, Dahyen cix naeuz mbouj ndaejhoengq mbouj okdaeuj lo. Daeggen nyapnyuk dangqmaz, couh youh ciq vunz aeu aen cimozdoz nyengh coux de okdaeuj, dajsuenq dauj dungx vahgyaez de hawj Dahyen nyi.

Bae daengz giz diegyouq Dahyen, raen miz aen ci’mbongjmbwt ndeu dingz youq laj laeuz. Dahyen caeuq bouxsai ndeu dox gaem fwngz byaij roengz lae daeuj. Raen Daeggenz le, Dahyen naeuz:“Beixgenz, ngoenzneix daegyoux gou nem gou miz di saeh yaek banh, dou bae gonq lo.” Gangj le song boux de couh ndonj haeuj ndaw ci’mbongjmbwt bae, gven douci yiengj “gvaeng” sing ndeu couh haici bae’uetuet. Daeggenz lumj gyaengh guenh nei gag ndwn gizhaenx. Gvaq le haujlai nanz, Daeggenz cij gag bi gyaeuj ngon naeuz:

“Biengz neix guhlawz gangj,

Va angj va rox byaiz,

Hoj yawz baenz bouxsai,

Ngaenz lai cij baenz ak.”

Ngoenz daihngeih, Daeggenz couh dapci dauqbae ranzmbanj, naeuz yaek baengh cwngfuj gij cwngcwz cinjdeng fuzbinz, coh yinzhangz sinh- cingj daigvanj, senj ndei hanghmoeg gauj dajndaem dajciengx, ceng’aeu bimoq duet aen mauh gungzhoj bae, miz di gyadangq caiq ra bawx.

gungzhoj