Bohgeq 47 bi cij baenz boh, gig cunghgyaez daeglwg de.

“Vihmaz daxboh gij nyezdoih gou nyaenx oiq, daxboh gou nyaenx geq ne?” Daeglwg naengh gwnz ga daxboh, lumhlumh bekbek faj naj mumh yat daxboh, cam naeuz, “Daxboh yaek bienqbaenz goeng geq lo.”

Saw mbouj gvaq raemxmboq, soh mbouj gvaq lwgnyez. Gij coenz lwgnyez gangj dwg coenz caensaed, daxboh mbouj rox han maz ndei.

“Daxboh, mwngz gangj, dwg mbouj dwg ha?” Daeglwg lij cam.

“W.” Bohgeq dap sing ndeu.

Daeglwg cimyawj faj naj daxboh, youh cam:“Faj naj daxboh vihmaz nyaenx uekcuek?”

Nienzgeij geq le, goknaj bi beij bi nyaeuqnyat, baihgwnz hwnj miz raiznyaen, gvaiq mbouj ndaej daeglwg naeuz uekcuek lo. Ndaejnyi daeglwg yienghneix cam, bohgeq ndaw hoz mbouj daih angq, cijndei gag riumbw.

Danghnaeuz daeglwg doeg ndaej baenz saw, daj siujyoz doeg daengz daihhag cibgeij bi, bohgeq itdingh yaek gyaeu daengz 70 bi cij ndaej raen daeglwg daihhag baetnieb, okdaeuj ra hong goj ndaej sung ndaej ndei, couh mbouj aeu baenzneix yousim lo. Danghnaeuz daeglwg doeg mbouj baenz saw, bohgeq lij aeu gyaeu lai nanz di cij ndaej, deng hwnq ranz aeuyah hawj de, couh nanz ndaej soengyungz an’onj gvaq bigeq lo.

“Gou ceiq gyaez Daegvangz, daihngeih dwg daxmeh, gaenlaeng cij dwg daxboh.”

Daegvangz dwg boux cangh- dajdoq he, dinfwngz gvai, doq daizsaw、doq eij、doq aen loengx coux doenghyiengh lwgnyez, guh ndaej lengj dangqmaz, lox ndaej lwgnyez simmaij raixcaix. Daegvangz ngoenz- lawz daeuj ranz de, ngoenzhaenx couhdwg ngoenz ceiq angq daeglwg lo.

Daxmeh doiq lwg naeuz:“Ranz raeuz dwg boh ceiq gyaez nyeziq ha, mwngz vihmaz mbouj ceiq gyaez daxboh?”

Caih vunz laemhlaex o, daeglwg lij dwg naeuz:“Gou ceiq gyaez Daegvangz.”

Vihmaz daeglwg nyaenx gyaez Daegvangz? Bohgeq miz di hozhaenz, mwh daeglwg caeuq Daegvangz angq guhcaemz, daxboh caegcaeg bae ndomq. Mbouj ndaej mbouj baiqfug! De rox aeu benjfaex dap singzbauj, youh rox yungh benjfaex caeuq hab hung guh baenz gij doenghyiengh dwggyaez, gij faex gij benj daengz ndaw fwngz de yaep he sikhaek bienqbaenz aen ranz iq caeuq doenghduz.

“Geq lo, mbouj beij Daegvangz ha!” Bohgeq gag nam gag naeuz.

Daeglwg haeuj youwzyenz le, hag rox di soq lo.

Seizneix daeglwg rox aen soq ceiq hung couhdwg 50, mwh de siengj aeu maz doenghyiengh lailai, couh aeu aen soq neix daeuj gangj, lumjnaeuz “gou yaek aeu 50 duz byagim”、“hawj gou 50 aen bauqva”.

Yawjraen ndawranz venj aen siengq daxgoeng, daeglwg cam bohgeq:“Daxgoeng bae gizlawz lo?” Boh lwnh de nyi daxgoeng gaenq dai bae lo. Codaeuz daeglwg laihnaeuz dwg bae gizlawz, hoeng ngoenz gvaq ngoenz, ndwen doek ndwen, de ciemhciemh rox maz dwg dai lo, roxyiuj vunz geq le couh rox dai bae.

Baez he, daeglwg ing youq henz ndang bohgeq naeuz:“Boh, mwngz daengz 50 bi gaej dai bw, danghnaeuz mwngz dapwngq gou doeklaeng gou couh ceiq gyaez mwngz!”

“W, gou mbouj dai.”

Bohgeq bineix 49 bi, daeglwg rox daxboh bimoq couh ndaej 50 bi lo, couh yousim boh daengz bisoq ceiq hung neix le couh yaek dai bae.

“Caencingq mbouj dai o?”

“Caencingq mbouj dai!”

Daeglwg maqmuengh daxboh couhcinj gvaq le 50 bi, hix gaej dai. Bohgeq hix siengj gyaeu daengz caet bet cib bi, siengj yawjraen daeglwg baetnieb le ra ndaej faenh gunghcoz ndei caeuq aeu yah seng lwg. De ciemhciemh bienqbaenz goeng geq lo, caen maqmuengh daeglwg sikhaek majhung baenz vunz.