Seizneix cingq dwg seiz makgam baenz, ndwen 1 ngoenz 7, gicej youq aen cehgenh guhhong Aen Gungh- swh Mizhanh Hangzmak Sangfungh Gvangjsih yawjraen, geijcib boux vunzhong cingq nyaengq faen leh caeuq baucang makgam, baenz sieng baenz sieng makgam saek ronghsien、aen’aen hung doxlumj neix cingq gyagaenj cang sieng. Buek makgam singjsien neix yaek aeu gai bae daengz daengx guek gak dieg. “Makgam dou hawciengz siugai seizneix cujyau miz Yinznanz、Swconh、Cungzging、Hozbwz daengj hawciengz hung gaicawx mak ndaw guek, ngoenznaengz doenggvaq ci vuz- liuz daehyinh bae daengx guek gak dieg couh miz 50 dun baedauq.” Bouxfucwz Aen Gunghswh Mizhanh Hangzmak Sangfungh Gvangjsih naeuz.

Aen gunghswh neix youq Diegsuen Gunghyez Bwzfanghmyau Dwzswng Cin Yizcouh Gih, miz vunzhong 300 lai boux, ndawde ranzgungzhoj miz 20 lai boux. Aen gunghswh neix yungh gij diegvih deih ndei de caeuq gij diuzgienh gyaudoeng fuengbienh, cauh- moq hwngfat vunqsik, cujciz cangh- seng’eiq buenq mak daengx guek caeuq vunz ndaem mak Yizcouh Gih、Vanzgyangh、Ginhcwngzgyangh Gih daengj dieg cigsoh doiqciep, daplaeb aen bingzdaiz comz soucawx、baucang、siugai youq itheij, haenqrengz cauh baenz aen cungsim gaicawx mak ceiq hung baihsaebaek Gvangjsih.

Yamq laeng aen gunghswh neix yaek caeuq ngaenzhangz、feizliu gungh- swh、vunz ndaem mak ciemdingh hezyi doxgap, vunz ndaem mak ndaej bae ngaenzhangz bauq ciq ngaenz, youz feizliu gunghswh fucwz gunghawj huq ndei caeuq dinfwngz bangcoengh、fugsaeh gai laeng caezcienz hawj vunz ndaem mak, doeklaeng youz Aen Gunghswh Mizhanh Hangzmak Sang- fungh Gvangjsih yungh gyaqcienz mbouj daemq gvaq gyaqcienz hawciengz soucawx makgam, caemhcaiq baucang caeuq siugai, gaijgez gij youheiq raeblaeng vunzlai.(Cinz Fanghswh)