《Baeuqroxdoh》dwg gojfangz cauhbiengz sei raez Bouxcuengh, ndawde geiq caeuq gangj doengh bouxvunz gojfangz ndaw vwnzyoz bakriuz vunz ciuhgeq Boux- cuengh——Baeuqroxdoh haenx guh- cawj, gangj gij saeh hungmbwk gvendaengz de hai mbwn cauh deih、cauh’ok vunz raeuz, daj gaxgonq doxdaeuj couh youq gih raeuz ranghdieg Denzyangz baengh bakriuz swnjcienz roengzdaeuj.

《Baeuqroxdoh》neiyungz miz Baeuqroxdoh cauh diendeih、cauh vunz、cauh doenghyiengh lajmbwn、cauh vuengzdaeqdoj、cauh sawcih sawlig caeuq cauh lunzlij daudwz roek mboengq, fanjyingj gij lizsij vunzraeuz daj ciuh gwn ndip gwn gyoet byaij coh ciuh ndaem naz gwn haeux, lij miz gij cingzgvang biengz gyog buloz ciuhgeq Bouxcuengh, doiq vunz yenzgiu lizsijyoz、vwnzyoz、cunghgyauyoz、gujvwnzswyoz、yinh- yinyoz caeuq yinhyozyoz daengj fuengmienh miz yozsuz gyaciz gig ndei.

2006 nienz 5 nyied 20 hauh, 《Baeuqroxdoh》ndaej Gozvuyen baecinj liedhaeuj buek daih’it feih- vuzciz vwnzva yizcanj mingzloeg.

Ciuq bouxsughangz gaujhaed cingqsaed, daihgaiq daj Ciuzmingz- cauz haidaeuz, vunzlai bak riuz《Baeuqroxdoh》, caemhseiz lij miz sawbonj aeu Sawndip geiq le cienz roengzdaeuj, ndawde miz di bienq- baenz doenghgij sawging canghmo ndawbiengz Bouxcuengh. Aen sigij gonq 50 nienzdaih haidaeuz, miz vunz soucomz cingjleix gij gojfangz nem seilizsij Baeuqroxdoh, daengz 80、90 nienzdaih soundaej lailai.

1988 nienz, Guengjsae doengh bumwnz mizgven youq gak dieg soucomz ndaej ngeihcib ngeih bonj sawfwngzcau《Seiging Baeuqroxdoh》, caemhcaiq fanhoiz cingjleix ndei.

1991 nienz, Gvangjsih Yinzminz Cuzbanjse oksaw le bonj《Seiging Baeuqroxdoh （Hoiz Gej）》 aeu haj cungj sawcih （Sawndip、Sawcuengh、Gozciyinhbyauh、Sawgun doiqciuq、Sawgun daengx gawq） doiqciuq. Bonj saw neix 8 fanh lai coij, 120 fanh cih saw; cobouh baijok le gij yienghsiengq vwnzva Baeuqroxdoh.

2004 nienz, Gvangjsih Minzcuz Cuzbanjse oksaw bonj《Ingj Yaenq Hoiz Gej Baeuqroxdoh Sawging Canghmo Bouxcuengh》. Bonj saw neix dwg lauxhangz youq doenghgij bonj sawfwngzcau sawging canghmo ndawbiengz Bouxcuengh ndawde senj ok 29 bonj、sei bonjmiz 47500 coij、500 fanh cih, gungh 8 bonj; neix couh daezhawj gij caizliuh goekdaej cap- saed youh lai yiengh hawj vunzlai yenzgiu vwnzva Baeuqroxdoh.

Daj 2004 nienz haidaeuz, youq dieg daeuz okmiz gojgaeq bakriuz vwnzva Baeuqroxdoh——Byagamj- cuengh Denzyangz, moix bi cungj gawjbanh aen ciet Baeuqroxdoh vwnzva lijyouz. Moix bi mwh ciet neix caeuq“Sam Nyied Sam”, cungj yinx geijcib fanh hekyouz ndaw- guek rogguek daeuj yawjngonz, neix hawj gij bakriuz Baeuqroxdoh ndaej cienz bae engq gvangq engq gyae.

Moix baez gvaq ciet Baeuq- roxdoh vwnzva lijyouz cungj gawj- hengz ciengz laexhung saxcaeq Baeuqroxdoh. Bi 2013 ciengz laex- hung saxcaeq Baeuqroxdoh youq Denzyangz Yen gwnz gvangjcangz saxbaiq Byagamjcuengh gawjhengz, miz fanh lai vunz daeuj doengzcaez saxbaiq goengcoj Baeuqroxdoh, gyoengqde dwg vunz beixnuengx gangj Vahcuengh Vahdung daengj, daj guek raeuz Guengjsae、Yinznanz、Gveicouh、Haijnanz daengj dieg caeuq gij guek Dunghmungz Daigoz、Yeznanz、Laujvoh、Menjden daengj daeuj, gyoengqde youq neix saxbaiq Baeuqroxdoh, maqmuengh ndaw bi moq bingzonj vuenyungz、ndaem ciengx ndaej lai.

Daj neix doxhwnj, moix bi liggaeuq sam nyied cocaet daengz cogouj, ndawguek rogguek miz geijcib fanh boux beixnuengx gangj Vahcuengh Vahdung gag daeuj- daengz Byagamjcuengh, saxcaeq Baeuqroxdoh.