Sam

Youh bi he daengz seiz dajsou lo, mbanjranz mbouj miz haeuxnaz, reih bingz reih bya cungj dwg ndaem haeuxyangz, seizneix haeuxyangz hix baenz sou lo, ranz Bohdahsez ciengx miz duz max ndeu, Bohdahsez couh baengh duz max neix guhhong, daeh bwnh、cae reih、rag haeux, duz max neix yienghyiengh guh ndaej. Haet- romh, Bohdahsez gueng ndei max, daep ndei an, caeuxcaeux yien max ok ranz bae sou haeux.

Daengngoenz cingq swng daengz byaibya, ndit ciuq ndaej ndaw mbanj ronghsaksak, bouxsoengqsaenq he caij aen danci ndeu daeuj daengz gyang mbanj, raen Bohdahsez byaij daeuj, de riunyinyi naeuz:“Lauxgo ha, ranz mwngz miz geij fung saenq ne!”

Bohdahsez ciep aeu saenq daeuj yawj, fung he dwg saenq Siujsez, Siujsez gauj hwnj ndaw sengj aen daihhag he lo; fung he dwg fung Siujguiz, Siujguiz gauj hwnj ndaw yienh aen gauhcungh okmingz he lo; fung he dwg fung Siujyez, Siujyez hix gauj ndaej ndaw yienh aen cuhcungh ndei he. Saeh ndei lienzlienz, Bohdahsez ciep ndaej gij saenq neix, yaepseiz caen mbouj rox naeuz dwg angq roxnaeuz dwg you, de mbouj mizsim bae sou haeux lo, yien max dauqranz.

Mehdahsez cingq gueng mou, raen Bohdahsez yien max dauqma, cam de dwg maz saeh, Bohdahsez naeuz gyoengqlwg vih songde cengq naj lo, bouxboux cungj gauj ndaej ndei.

Bohdahsez mbouj rox cit ien, de youq bakdou mwnh le yaep he, heuh gyoengqlwg gvaqdaeuj, dawz gij saenq haenx cug boux cug boux faen gvaq bae naeuz:“Sou baenzneix coengmingz lingzleih, dou dang bohmeh gig miznaj, ranz raeuz dwg gungzhoj, vah bouxgeq naeuz, hoj mbouj gvaq sam daih, baih mbouj daengz ciuh laeng, sou aeu roengzrengz bae doegsaw, ngaenzcienz youz gou ra.”

Vah dwg baenzneix gangj, aen haggeiz laeng haihag, mbouj miz fanh maenz hix aeu miz caet bet cien gyoengqlwg cij ndaej bae doegsaw, Bohdahsez caen mbouj rox bae gizlawz aeu baenzlai ngaenz.

Ngoenzneix dwg ngoenz haw, Bohdahsez yien duz max de bae haw gai, youq hangz haw gai max, miz vunz gvaqdaeuj yawj max lo. Bohdahsez heuh gyaq cien maenz, boux yaek cawx max haenx riunyaen naeuz:“Duz max mwngz goet dwg sang dwg hung lo, byom lai ni? Aeu bae guhhong, duz max neix miz geijlai rengz? Dawz bae gaj hwnj hangz, duz max neix ndaej geijlai noh? 700 maenz gai mbouj gai?”

Mbouj gangj 700, couhdwg cien maenz, danghnaeuz mbouj gaenj yungh ngaenz, Bohdahsez baenzlawz hix mbouj siengj gai duz max neix. Youq hangz gai max caj le buenq ngoenz, miz boux yawjyawj couh byaij deuz, miz boux hai gyaq roek caet bak, vunz haw yaek sanq liux lo, Bohdahsez cijndei yien max dauqma.

Mbwn fuemxfubfub, Bohdahsez yien max dauq daengz bak mbanj, Bohdaegcangh cingq yien yiengz dauq riengh, de naeuz:“Bohdahsez ha, gou yaek guh ranz moq lo, daeh cien daeh suijniz aeu yungh max, gou hix mbouj caeuq mwngz gangj gyaq lai, danghnaeuz 800 maenz mwngz naemj gai couh gai hawj gou ba.”

Duz max neix couh yienghneix 800 maenz gai okbae lo.

Bohdahsez soqlaiz gaenx guh- hong, mwh de cibgeij bi seiz couh youq gyaeuj reih ndaem le sam go faexcun, seizneix sam go faexcun neix maj ndaej sangnoengnoeng, gogo hung lumj aen caengq naengj haeux nei. De yenzlaiz dajsuenq daengzcog miz ngaenz guh ranz moq seiz, dawz geij go faex neix raemj roengzdaeuj, gawq guh benj daeuj yungh, hix ndaej mbaet roengz faenh ngaenz ndeu. Seizneix feiz gaenq remj daengz bwnda, Bohdahsez mbouj gai mbouj ndaej lo.

Bohdahsez daeuj daengz laj goek go faexcun, lumhlumh gofaex, couh lumj caeuq baengzyoux ndei yaek doxbiek aeu daengq maz vah nei, gag gangj gag naeuz:“Hojsik lo, hojsik lo.”

Sam go faexcun neix gvaqlaeng hix gai hawj Bohdaegcangh hawj de bae hwnj ranz moq lo.

Seiq

Dahsez bae haihag ngoenzhaenx, Bohdaegcangh hix youq ngoenzhaenx vat giekdieg guh ranz moq.

Aen ranz gaeuq Bohdaegcangh dwg ranz bingz, hix dwg song bi gonq ngamq hwnj, rumz bongj mbouj you, fwn doek mbouj naih, seizneix de miz ngaenz lo, dawz ranz gaeuq cek bae, dajsuenq hwnj aen ranz sam gan haj caengz ndeu.

Bohdaegcangh heuh Daegcangh dauqma bangfwngz, Daegcangh mbouj dauq, dingqgangj duenh seizgan neix de bae aen cangj wnq guhhong lo, hong naek lai youh mbouj ndaej ngaenz, cingq dajsuenq lingh bae ra hong wnq guh.

Lwg dauq mbouj dauq mbouj youqgaenj, ndaw ranz miz ngaenz, ranz moq ciuq guh. Lajmbanj miz sibgvenq, danhfanz ndaw mbanj miz vunz guh ranz moq, mboujlwnh mwngz goq vunz guh roxnaeuz cingj vunz bang guh, gyoengq vunzmbanj caeuq gyoengq beixnuengx cungj mbouj cingj gag daeuj bang guhhong ngoenz song ngoenz. Vunz daeuj bang hong mbouj aeu ngaenz, bouxcawj aeu cingj gwn haeuxcaeuz haeuxngaiz, Bohdaeg- cangh daj vat giek guh ranz ngoenz- haenx hwnj, gaj yiengz youh gaj mou, ngoenzngoenz nauhyied.

Miz ngoenz ndeu, mehmoiz ndaw mbanj daeuj daengz ranz Bohdaeg- cangh, naeuz:“Mwngz naeuz heuh gou bae cam dahsau hawj Daegyin guh yah, vunz hoiz vah lo, naeuz Daegyin mbouj rox saw, cungj bouxsai neix daengzcog gyaep mbouj hwnj seizdaih moq, lij naeuz danghnaeuz haq gvaqdaeuj sou aeu bae ndaw singz cawx ranz hawj gyoengqde youq.”

“Bae ndaw singz cawx ranz”, Bohdaegcangh 50 geij bi lajdin, baez daih’it dingq ndaej coenz vah neix. Bae ndaw singz cawx ranz, aen ranz geijcib fanh, bae gizlawz aeu baenzlai ngaenz; ndaw singz reih mbouj naz, bya mbouj ndoeng, bae ndaw singz cawx ranz youq, gwn maz? Boh- daegcangh raen ndeiriu, de naeuz:“Suenq lo suenq lo, gij vunz neix mbouj dwg bawx ranz dou.”

Ranz guh daengz caengz daih- ngeih, hix yaek gvaq bi lo.

Ndwencieng, lajmbanj ranzranz suek faengx gaj mou, nauhnauh yiedyied, Daegcangh dauqma gvaq cieng, haemh ndeu gwn caeuz seiz, de naeuz:“Gou caen ienq lo, caen ienq mbouj bae lai doeg di saw.”

Bohdaegcangh naeuz:“Ienq maz ienq, miz ngaenz heuh fangz daeuj muh haeux hix ndaej, boux mbouj doegsaw okbae ra ngaenz, boux doegsaw ciuqyiengh aeu okbae ra ngaenz.”

Daegcangh naeuz:“Bouxroxsaw guh hong mbaeu ndaej ngaenz lai, boux mbouj rox saw guh hong naek ndaej ngaenz noix.”

Bohdaegcangh naeuz:“Bouxboux rox saw cungj bae guh hong mbaeu, gij hong naek haenx hawj bouxlawz bae guh? Cungj aeu miz boux vunz guh ba! Mwngz lau sinhoj couh youq ranz caeuq nuengx mwngz ciengx cwz ciengx yiengz.”

Bohdaegcangh gangj ndaej Daegcangh mbouj miz vah gangj bae.

Haicin, Bohdaegcangh laebdaeb guh ranz moq, gyoengq bouxcoz ndaw mbanj cungj okbae dajgoeng lo, Daegcangh mbouj okbae, de ngoenz- ngoenz caeuq Daegyin itheij cuengq cwz cuengq yiengz okbae langh.

Aen ranz guh daengz caengz daihsam, Bohdaegcangh fwt roxnyinh daengz aeu hawj Daegcangh ra bawx lo. Ngoenz ndeu gwn ngaiz le, de muengzfoedfeod bae caeuq mehmoiz doxyaeng baenzlawz guh ndei, meh- moix naeuz:“Seizneix nanz lo, seizneix nanz lo, gyoengq bouxcoz cungj okrog bae guhhong lo, naemj aeu bawx sou couh gag ra ba.”

Seizdaih bienq daiq vaiq, gyoengqvunz laj mbanj faenfaen haeuj ndaw singz bae, boux guhhong bae ndaw singz, boux guh seng’eiq bae ndaw singz, boux doegsaw bae ndaw singz, lienz boux guh reih ndaem naz hix bae ndaw singz cawx ranz lo. Bohdaegcangh doeksaet lo, de doeksaet cihgeij gaenq gyaep mbouj hwnj vunzmbanj.

Haj

Ngoenzneix dwg ciuh vunz Bohdahsez ceiq angq ndeu, aen ci iq saek ndaem he youq bak mbanj caj de caeuq Mehdahsez, songde ngoenzneix cingqsik buen bae yienhsingz youq lo.

Bohdahsez doiq Mehdahsez naeuz:“Yaek dawz gij byoemgyaeuj mwngz roi ndei di ha, mbouj ndaej caiq lumj youq ndaw mbanj nei gyaeuj nyungqnyatnyat couh okrog, raeuz seizneix dwg bae yienhsingz, yienhsingz baenzlawz yiengh mwngz mbouj rox, yienhsingz loh bingz, laeuz sang, ci lai, vunz lai, ngoenzngoenz cungj nauhyied lumj ngoenzhaw nei. Ceiq youqgaenj dwg, raeuz aeu cang ndei ndangdaej, mbouj ndaej hawj gyoengq lwg raeuz saetnaj.”

Gizsaed, Bohdahsez, hix dwg baez daihngeih bae yienhsingz, de baez daih’it bae yienhsingz dwg soengq Dahyez bae doeg daihhag haihag ngoenzhaenx. Sam boux lwg cungj bae doeg daihhag, Bohdahsez couh soengq Dahyez boux ndeu, de dwg baenzneix naemj: Dahyez dwg lwg cod, caiq gungz caiq hoj hix aeu soengqsoengq, de couh yienghneix baez daih’it daengz yienhsingz. Seizde Bohdahsez couh naemj:“Yienhsingz baenzlai ndei, danghnaeuz ndaej youq yienhsingz miz aen ranz he youq, dai da hix laep lo.”

Bohdahsez cungjsuenq muengh daengz “ranzrongh” lo. Sam dahlwg cungj daihhag bizyez lo, Dahsez dang canghyw, Dahguiz dang lauxsae, Dahyez hix ngamq gauj hwnj guh gunghvuyenz, gvaq geij ngoenz dem couh bae bauqdaengz hwnjban, gij saeh angq neix vunzmbanj rox, Bohdahsez rox. Gienh saeh ngoenzneix engq angq, Bohdahsez rox, vunz mbouj rox.

Gyoengqlwg youq yienhsingz cawx aen ranz ndeu, heuh Bohdahsez caeuq Mehdahsez buen bae youq, bouxhaici daeuj ciep songde dwg daegyoux Dahsez.

（sat）