Vih coicaenh sonhag Cuengh Gun song saw vah, caux ok gij heiqfaenh habsib ndawhag ndei, gungganq gij yinxdaeuz hagseng gangj、yungh Vah- cuengh biucinj, ndwen 1 ngoenz 3, Dava Yauzcuz Swciyen gaiq nduj siuj- hagseng yungh Vahcuengh biucinj doxdax biujyienj dungxcaiz youq Luzyej Siujyoz banh, 37 boux hagseng caeuqfaenh guh biujyienj ndeiyawj, daengx hagdangz cien lai boux lauxsae caeuq hagseng yawjngonz doxdax.

Mwh doxdax, daengxcungq boux caeuqfaenh doxdax cungj yungh Vah- cuengh biucinj guh biujyienj. Daengx ciengz biujyienj hingzsik moqsak、neiyungz lai、gig miz gij yinx lwgnyez, cungfaen yienh’ok gij yienghsiengq cingsaenz gaenxmaenx baenaj、cangq- heiq doxhwnj. Doenggvaq haiguh doenghgij hozdung neix, hawj gij ndwenngoenz vwnzva ndawhag ndaej fungfouq, doicaenh swnjcienz vwnzva cienzdoengj Bouxcuengh, hawj hagseng ndaej lai gaghag Vahcuengh caeuq rox gangj Vahcuengh, caux ok gij heiqfaenh naekgywd hag Sawcuengh yungh Saw- cuengh.

Ciuq cam rox, aen yienh neix daj bi 2013 doxdaeuj haenqrengz guh sawqniemh sonhag Cuengh Gun song saw vah, ndawde Luzyej Yangh Cung- sim Siujyoz ndaej Swcigih Gyauyuz- dingh dingh baenz “aen hagdangz sawqniemh sonhag Cuengh Gun song saw vah Gvangjsih Bouxcuengh Sw- cigih”, bi 2014、 2015 ceng’aeu ndaej 6 aen mingzngeg ciuseng Gvangjsih Swhfan Yozyen, youq gyoengq gauhgauj bizyezswngh aen yienh neix ciusou 6 boux hagseng bae hag Sawcuengh Vahcuengh, doeg 3 bi bizyez le, dinghyiengq anbaiz bae Luzyej Yangh Cungsim Siujyoz guh lauxsae Saw- cuengh.

(Vuz Vanlij Veiz Liujgveiz/吴万里 韦柳葵)