Ndwen gonq 14 hauh, bi 2018 daengx gih Cuengh Gun song saw vah yozcenz lauxsae yezvu beizyinbanh ngonzyawj hozdung youq Namzningz Si Vujmingz Gih Daibingz Cin Gingloz Siujyoz gawjhengz. 50 lai boux yozyenz camgya le baez hozdung nei.

Geij bi neix daeuj, Gingloz Siujyoz laebdingh aeu “swnjcienz minzcuz vwnzva, songanq Mbanjcuengh vunz moq” daeuj guh banhhag muzbyauh, caenhrengz cauhguh aen hag “Lwg Gingloz” minzcuz vwnzva gyauyuz binjbaiz, sawj minzcuz vwnzva youq hagdangz ndaej daengz hungzyangz caeuq swnjcienz. Gingloz Siujyoz daj youwzyenz hwnj dangzgoq《Angq Hag Sawcuengh》. Yienghneix ndaej guh ndei giekdaej duenh siujyoz Sawcuengh ngeihloih mozsi sonhag, engq dwg vih saedyienh aen loqsiengj hwng’vuengh minzcuz vwnzva guh ndei gaenjmaenh.

(Yi Cinhlingz/玉昕灵 Vangz Cunhgiz/ 黄春菊)