Ngoenz cieng cosam, ranz gou sam boux naenghci ma ranzcoj gvaq ciet. Lansai dawz gou rag haeuj veihsinginz ndaw ranz. Daengx ginz miz 33 vunz.

Gwn haeux sat, caezgya soengq hoengzbau hawj daxmeh le, couh naengh youq ndaw gyanghongh, hainduj hwnj vangj ciengj hoengzbau youq gwnz veihsin. Gyoengq vunz camgya ciengj hoengzbau, miz bouxlaux haj roekcib bi, hix miz boux iq song sam bi. Hoengzbau aen hung miz geijcib maenz, aen iq cij miz faen ngaenz ndeu, hoeng, mboujguenj ngaenz lai ngaenz noix, daengx ranz vunz cungj angqvauvau.

Youq ndawde, miz vunz cienz daxmeh yaek hawj lanlan laenjlaenj fat hoengzbau, ndaw ginz yaepyet couh lumj gu raemx goenj nei, nauhyied hwnjdaeuj. Dahlan youq diegrog gunghcoz, mbouj ndaej ma gvaq cieng, de sien fat sinsiz daeuj:“Daxbuz, louz faenh ndeu hawj dahlan ha, gou yienznaeuz liz ndaej gyae, hix aeu ciengj faenh fukheiq neix……”

Daxmeh 90 lai bi lo, de mbouj rox hwnj vangj, mbouj rox fat veihsin, dangyienz engq mbouj rox gwnz vangj baenzneix nauhyied. Gou sawqmwh siengj ok aen banhfap ndeu, cang guh daxmeh, youq ndaw ginz fat sinsiz:“Miz, miz, bouxboux miz faenh, louz hawj sou, daxbuz siengjniemh sou……”

Gwnz vangj hainduj mwngz coenz gou coenz naeuz hwnjdaeuj:

“Aen hoengzbau daxbuz gou itcig geiq dwk……”

“Ndaej geiq aen hoengzbau daxbuz, gij gvenq daj iq daengz hung……”

“Aen hoengzbau daxgeq caen raeuj sim……”

“Docih daxgeq, hoh daxgeq ndang cangq gyaeusouh……”

Gou cang daxmeh dap:“Wn, daxbuz gig ndei, daxbuz youq ranz deq sou……”

Gou fat sat le, lwgda dumz lo, ndawsim raeujrubrub, caencingz lienz hwnj baenz daih baenz daih vunz, ciengxlwenx, ciengxlwenx……