Sai:

Nanz mbouj ndaej bae youz,

Ok dou raen hoengzva,

Nanz mbouj ndaej raennaj,

Bae gyawz ma doxdauq.

Mbwk:

Ngoenzlwenz guh seng’eiq,

Haetneix bae ndaemnaz,

Cibgouj daih hai gvaq,

Bae haw ra eu fwen.

Sai:

Nanz mbouj ok bakdou,

Byaekmou hix dwklumz,

Baenznanz mbouj doxbungz,

Cam mwngz haw yawz byaij.

Mbwk:

Sam haet youh bungz haw,

Mwngz baenzlawz mbouj daeuj,

Gwnz haw vunz lairaeuh,

Dauqcawq vunz caeuq ci.

Sai:

Vih nanz mbouj roengz fwn,

Bya mbouj diuq gwnz dah,

Vih mbouj miz buhvaq,

Mbouj miz naj hwnj haw.

Mbwk:

Doenghbaez gou hix hoj,

Nanz mbouj rox bae haw,

Seizneix ranz miz yawz,

Bae haw youz angqvau.

Sai:

Cibgouj daih hai gvaq,

Bya ndaw dah bienq lungz,

Seizneix raeuz duet gungz,

Cingq doxbungz eu fwen.

Mbwk:

Dangj fuzbinz daeuj daengz,

Lienz duzgaeng hix fouq,

Ndaw roengq gyoengq gaeqboux,

Duzduz rouj hoengz caez.

Sai:

Fuzbinz daengz nungzgya,

Lienz duzma hix angq,

Ndaej baengh gungcanjdangj,

Bya ndaw dangh bienq lungz.

Mbwk:

Gominz youq bakmbanj,

Caiq sang mbouj beij mbwn,

Yaek muengh guh ndaej hwnj,

Aeu baengh cwngcwz dangj.

Sai:

Cibgouj daih gvaqdaeuj,

Gohaeux gag lai sang,

Fuzbinz daeuj daengz ranz,

Beij oijdangz lai van.

Mbwk:

Gij bi neix gvaqdaeuj,

Bouxboux naeuz ndei lai,

Lwgminz ndaej fatcaiz,

Fuzbinz hai lohfouq.

Sai:

Doihfuzbinz roengzma,

Son caezgya ciengx vaiz,

Hozcozse ndei lai,

Cienzcaiz lumj mboq bauq.

Mbwk:

Ciengx cwz vaiz bae gai,

Ndaej ngaenz le faenhoengz,

Lwgmak ndaem rim doengh,

Cienz baenzgyoengq haeujma.

Sai:

Aeu gohyoz ndaemnaz,

Gwnz bya haeux hix ndei,

Moux sou song cien ngeih,

Namh ndaw reih bienq ngaenz.

Mbwk:

Doenghbaez sinhoj lai,

Gwn byaekngaih mbeimou,

Gyap hoj dwg ranz gou,

Fouz gyu youz roengz dungx.

Sai:

Gaxgonq sinhoj lai,

Gwn byaekngaih ciengx mingh,

Seizneix raeuz duet binz,

Gwn nohcing hix ganx.

Mbwk:

Gij bi neix roengzdaeuj,

Cancan haeux caeuq noh,

Guhhong daenj buh moq,

Hai mohdoz bae naz.

Sai:

Doihfuzbinz roengzma,

Lienz duzbya hix angq,

Lohfouq ndaej hai gvangq,

Bya ndaw langx hwnj mbin.

Mbwk:

Gij bi neix gvaqdaeuj,

Gwn haeux gag lai van,

Lohfouq diuzdiuz gvangq,

Fanh max gvangh hwnj mbwn.

Sai:

Dangj fuzbinz daeuj daengz,

Lienz duzgaeng hix fouq,

Seizneix ndaw mbanj dou,

Caiq mbouj miz ranzhoj.

（caengz sat）