Cietbuenzvuengz dwg ngoenzciet saxcaeq goengcoj Buenz Guj hung- naek ndeu, gyoengq vunz mboujlwnh ndaw guek rog guek cungj yawjnaek aen yizsi saxcaeq minzcuz neix dangqmaz. Ngoenzciet neix yienzlaiz dwg youz Huznanz Hwngzyangz Cangzningz、 Yungjcouh Gyanghvaz、Gyanghyungj，Gvangjsih Fuconh、Cunghsanh、Bazbu、Gunghcwngz、Ginhsiu，Gvangjdungh Lenzcouh、Lenznanz、Lenzsanh、Yujyenz，Swconh Nanzcungh，Gveicouh Gaij- lij，Haijnanz Haijgouj, Yinznanz Sihsanghbanjnaz, Daizvanh Daizbwz, Hoznanz Cwngcouh daengj swngj gih yen(si) gyoengqvunz fuengzcug ranz Buenz iudaeuz gawjbanh, daengz seizneix gaenq bienqbaenz le daengx guek ngoenzciet saxcaeq Buenz- vuengz ceiq hoenghhwd. Moix bi liggaeuq cib nyied cibroek, boux camgya saxcaeq haenx mboujlwnh bouxsai mehmbwk vunzlaux lwgnyez, cungj daenj hwnj buhvaq gyaeundei bonj minzcuz, comz youq itheij eu fwen、diuq foux, angq gvaq Ciet- buenzvuengz.

2006 nienz 5 nyied 20 hauh, youz Gvangjsih Bouxcuengh Swcigih Hocouh Si、Gvangjdungh Sauzgvanh Si bauq hwnjbae, aen Cietbuenz- vuengz Yauzcuz ndaej Gozvuyen baecinj liedhaeuj buek daih’it guek- gya gaep feihvuzciz vwnzva yizcanj mingzloeg.

Gyoengqvunz Yauzcuz vihmaz aeu youq moix bi liggaeuq cib nyied ndawde saxcaeq Buenzvuengz nem eu fwen Buenzvuengz、diuq fouxgyong- raez ne? Cienznaeuz youq ciuhgonq gyaeraez, vunz Yauzcuz naengh ruz gvaq haij seiz, bungzdaengz rumz haenq langh hung, aen ruz youq gwnz haij biu le caet caet seiqcibgouj ngoenz cungj mbouj ndaej nem mboek, dayawj couh yaek deng ruz boek vunz dai lo. Mwhneix, miz vunz youq gyaeuj ruz gouz baiq goengcoj Buenzvuengz bauj lwglan bingzonj, sim niemh ok maqmuengh hung. Guh niemh liux le, sikhaek rumz swnh langh dingz, aen ruz hix gig vaiq ndaej nem mboek, vunz Yauzcuz ndaej gouq lo. Ngoenzneix dwg liggaeuq cib nyied cibroek hauh, ngamj dwg ngoenzseng Buenzvuengz. Yienghneix, vunz Yauzcuz ndaej hwnj mboek haenx, couh bae raemj faex guh rum, dawz haeuxnaengj daem baenz ceiz. Yienzhaeuh, caezgya eu fwen diuq foux, angqhoh gyoengqde ndaej sengmingh dauq nem angqhoh ngoenzseng Buenzvuengz. Daj neix hwnj, Yauzcuz couh dawz ngoenz neix dingh guh “Cietbuenzvuengz”.

Vihliux hawj bouxsaenz daeuz angq, mwh saxcaeq Buenzvuengz, gyoengqvunz Yauzcuz cungj dawz 《Fwen Buenzvuengz》 aeu diuz fwen- sei geq youz Yauzcuz vunzlai cauh、seiqdaih cienz roengzdaeuj haenx ciengq、diuq youq naj Buenzvuengz. 《Fwen Buenzvuengz》riengz gij vued- doengh seiqseiq daihdaih saxcaeq Buenzvuengz (roxnaeuz heuhguh “boizyienh Buenzvuengz”) okyienh caemhcaiq mboujduenh hwngfat.

1984 nienz 8 nyied, daengx guek gak dieg Yauzcuz daibyauj comz daeuj Gvangjsih Namzningz, caezgya cungj doengzeiq dawz ngoenzciet caeq diuq Buenzvuengz nga Yauzcuz “Menj” haenx guh giekdaej, caiq hwngfat baenz Cietbuenzvuengz, caezgya doxyaeng le dingh “Ciet- buenzvuengz” guh ngoenzciet doengjit Yauzcuz, caemhcaiq dingh ngoenzciet neix youq liggaeuq cib nyied cibroek (ngoenzseng Buenz- vuengz) gawjhengz.

1985 nienz liggaeuq cib nyied cibroek, daengx guek gak dieg Yauzcuz daibyauj caeuq canghsae ndaw biengz comz daeuj Guengjsae Namzningz, yungh fuengsik hoih- lienzvuen angq gvaq le ngoenzciet hoenghhwd daengx minzcuz——Cietbuenzvueng, neix youq gwnz lizsij Yauzcuz dwg baeznduj. Daengz seizneix, Cietbuenzvuengz Yauzcuz gaenq gawjbanh le 15 gaiq lo.