Bineix dwg Gvangjsih Boux- cuengh Swcigih laebbaenz 60 hopbi. 60 bi doxdaeuj, Gvangjsih gig yawjnaek baujhoh gij vwnzva vahgangj minzcuz vunznoix baugvat Vahcuengh, doenggvaq song saw vah gyauyuz doidoengh swnjcienz caeuq hwngfat vwnzva minzcuz. “Song saw vah gyauyuz mboujdan hawj hagseng hagsib Vahbujdungh caeuq cihsiz daihneix, lij ndaej rengzrwd swnjcienz gij vwnzva minzcuz bonjfaenh fungfouq dem.”Veiz Sunghhau lauxsae Vahcuengh Hozciz Gvangjsih naeuz.

Dangzgoq Song Saw Vah

Seiz banringz doeg saw, lumj haujlai siujyoz dangdieg nei, Gingloz Siujyoz goj miz sing doeg saw goksasa. Mbouj doengz dwg, neix dwg gij sing doeg Sawcuengh. Gingloz Siujyoz youq Vujmingz Gvangjsih, bi 1981 baenz buek daeuz hagdangz sawq son Cuengh Gun song saw vah Gvangjsih, seizneix miz 330 lai boux hagseng ndaej son’gyauq Cuengh Gun song saw vah. Ciuq Swcigih Gyauyuzdingh Minzcuz Gyauyuzcu gaisau, Gvangjsih Cuengh Gun song saw vah gyauyuz gaenq guhbaenz aen dijhi caezcingj yozcenz gyauyuz、cungh siujyoz gak hagduenh caeuq gaudaengj hagdangz ndeindei doxciep, miz 37 aen yienh(si、gih) haiguh hong son’gyauq Cuengh Gun song saw vah, hagdangz Cuengh Gun song saw vah 269 aen, hagseng youq hagdangz cungjsoq 14 lai fanh boux.

Cawz baujhoh Vahcuengh, Gvangjsih lij cingq baujhoh Vahgingh、Vahmauznanz daengj vah minzcuz vunz haemq noix dem. Ginghcuz dwg aen minzcuz gyaeujvunz haemq noix ngamq miz 2 fanh lai vunz ndeu, youq ranghdieg henz haij Dunghhingh Gvangjsih. Dangdieg vihliux swnjcienz vah Ginghcuz, youq cungh siujyoz Ginghcuz hailaeb le dangzgoq “Gingh Gun song saw vah”. Aen Cungsim Yenzgiu Swnjcienz Vwnzva Sawnam Ginghcuz Dunghhingh Si cujyin Suh Veizfangh naeuz, ginggvaq haujlai vunz roengzrengz, “Sawnam” Gingh- cuz gaenq ndaej daengz baujhoh haemq ndei, yied daeuj yied lai bouxcoz nyezrauh Ginghcuz sug rox doeg raiz Vahgingh.

Linghvaih, daengx gih gungh miz 35 aen gihgou boqok gvangjbo densi hailaeb le cezmuz vah minzcuz.

Gij Rengz Vahgangj

Youq Mbanjyauz Vangzloz Gvei- linz Lungzswng Gak Cuz Swciyen, Banh Gifung mehmbwk Hungzyauz ndaej 53 bi neix naeuz: “Doenghbaez mbouj rox gangj Vahbujdungh, ok dou naengh ci yawj mbouj rox daj gizlawz haidin、 aeu bae daengz gizlawz, neix hawj gou raemxda gag doek gvaq.” Ginggvaq bae aen ban son’gyauq saujmangz yeyau hagsib, seizneix Banh Gifung gaenq rox doeg rox raiz Sawgun, ndaej Aen Lenzhozvei Meh- mbwk Daengx Guek Cunghvaz bingz baenz daengx guek “canghyienz meh- mbwk rox saw”.

Riengzdwk ginghci riengjvaiq hwngfat, Gvangjsih vunzlai minzcuz vunznoix hag Vahbujdungh yied daeuj yied lai. Soq yienh’ok, Gvangjsih Vahbujdungh cienzdoh cingzsoq daengz 84%. Boux mbouj rox gangj Vahbujdungh dingzlai dwg bouxgeq, dingzlai bouxcoz cungj yungh Vah- bujdungh doxgyau raeuzrwd ndaej, bae gizwnq guhhong、hagsib、gvaq ndwenngoenz gig fuengbienh, hix ndaej ciepdaih bouxhek daeuj youzcet yawjngonz haenx.

“Hag rox Vahbujdungh, couh lumj rox monz bonjsaeh vut gungz ndeu.” Banh Gifung naeuz, Mbanjyauz Vangzloz binaengz ciepdaih bouxhek seiq hajcib fanh vunzbaez, moix ranz dan faenhoengz fei lijyouz couh ndaej 1 fanh maenz doxhwnj. Ndaej daengz lajmbanj lijyouzyez daiqdoengh yied daeuj yied hwng’vuengh, Banh Gifung lij gaghag Yinghyij dem, geij baez ndaej bingz baengz “boux mizmingz hagsib” dangdieg.

“Vahbujdungh cienzdoh cingzsoq daezsang coicaenh le dangdieg hwng- fat, vih minzcuz vunznoix caeuq baihrog doxgyau daezhawj cengjdingj, hoeng hix daiq haujlai hojnanz daeuj hawj swnjcienz vah minzcuz vunz- noix.” Vangz Denhhwngz boux nyuenz gvanjcangj Vujmingz Gih Vwnzva- gvanj 68 bi neix naeuz. Moix aen singhgiz daj ndaw singz bae daengz Gingloz Siujyoz youq gyae 12 goeng- leix haenx son’gyauq Fwencuengh daengj vwnzva cihsiz, dwg gij hong de duiyouh le ciengzseiz guh.

Gij Caidij Vwnzva

“Hagseng ndaej sonhag song saw vah gyoebhab suciz bujbienq haemq sang, aen duenz yisuz Gingloz Siujyoz dawz Fwencuengh ciengq daengz daengx guek gak dieg, caiqlij miz hagseng bae daengz Fazgoz Bahliz ciengq.” Vangz Yen’anh boux Yau- cangj Gingloz Siujyoz suenq gij cingzcik hagseng seiz doenghsim naeuz, “Doenghgij seizgei neix doiq aen hagdangz siujyoz lajmbanj daeuj gangj caen nanz ndaej.”

Vangz Yen’anh youq Gingloz Siujyoz doegsaw gvaq, bi 2003 dauq daengz hagdangz sonsaw daengz seizneix. Gij dauqngeix de, 20 sigij 80 nienzdaih mwh doihengz aen ban son- gyauq saujmangz yeyau, sai mbwk geq iq ndaw mbanj doxciengj daeuj hagsib. “Youq mwh hag vwnzva hix hag gij cihsiz diensiengq caeuq dajndaem, dingzlai cihsiz ndaej cigsoh yungh daengz ngoenznaengz guhhong gvaq ndwenngoenz bae.”

Cunghvaz Yinzminz Gunghozgoz laebbaenz gaxgonq, Bouxcuengh dan miz vahgangj, mbouj miz cihsaw doengjit、hab fap. Bi 1957, Gozvuyen baecinj 《Fueng’anq Sawcuengh》. Bi 1982, Gvangjsih laebdingh yungh 26 cih cihmeh Lahdingh daeuj geiqloeg caeuq raiz Vahcuengh, hawj 《Fueng- anq Sawcuengh》 dingjmaenh onjdingh caeuq miz gienzvi gaen gaenj yamqdin baenaj seizdaih. Bi 2018 ndwen 8, 《Aen Diuzlaeh Hong Saw Vah Minz- cuz Vunznoix Gvangjsih Bouxcuengh Swcigih》 cingqsik saedhengz, gyavaiq gij yamqdin fazciva hong sawvah minzcuz Gvangjsih.

《Fueng’anq Sawcuengh》 saed- hengz 60 lai bi doxdaeuj, Sawcuengh Vahcuengh youq Gvangjsih ndaej hwngfat haemq ndei、nyinhdoengz caeuq yungh gvangqlangh, byaij hwnj diuzroen Cuengh Gun song saw vah huzndei hwngfat. Seizneix, vunz Cungguek diegseng dwg Gvangsih gwnz mbaw sinhfwncwng yaenq miz Sawcuengh, cigoenggyau、hagdangz、baiz hingzcwng gihgou daengj dieg, dieg lawz cungj ndaej raen miz Sawcuengh.