Muengh ha! Muengh ha! 11 nyied 1 hauh gyanghaet, gou ndaej daengq bae Baekging camgya aen beizyinbanh youz Luj Sin Vwnzyozyen caeuq Minzcuz Vwnzyoz Cazcise gap banh. Seizhaenx, daengx ndang lwed gou goenjfwdfwd hwnjdaeuj, faenh angq- yangz neix lumj gaxgonq gauhgauj gvaq le ciep ndaej mbaw luzcij dunghcihsuh daihhag geiq daeuj nei ha!

Aen coh baez beizyinbanh neix heuhguh “Luj Sin Vwnzyozyen 《Minzcuz Vwnzyoz》 Canghraiz Saw- cuengh Canghfanhoiz Beizyinbanh”. Daj aen coh neix couh ndaej rox, gyoengqvunz miz faenh gyahaeuj baez beizyin neix gig mbouj genjdanh lo, gyoengqde cungj dwg doenghboux canghraiz Sawcuengh caeuq Cangh- fanhoiz Cuengh Gun song saw, caemhcaiq gaenq ndaej gij cingzcik maenhndei cij ndaej iu bae ne. Hainduj gou laihnaeuz 40 boux miz faenh bae beizyin cungj dwg vunz Guengjsae raeuz, siengj mbouj daengz ndawde lij miz daegmbauq ndeu dwg daj Yinznanz gvaqdaeuj dem. Couhdwg aenvih caemh ndiepgyaez Sawcuengh cij hawj dou ndaej youq Baekging doxcomz.

Ciuh vunz gou caeuq Luj Sin gig miz yienzfaenh, dauqngeix hwnjdaeuj baeznduj doeg gij faenzcieng de wngdang dwg bien 《Lwgnyezrauh Yinduj》. Hwnj daengz cunghyoz, moix aen haggeiz cungj doeg daengz gij faenzcieng boux vwnzyozgyah neix, lumj 《Daj Suenbwzcauj Daengz Ranz- saw Sanhvei》、 《Ngoenzgeiq Boux- gvangz》、《Gojgaeq Ah Q》 doenghgij faenzcieng neix, gig danqfuk gij minzcuz cingsaenz “haeb hangz caengz da coh vunzrwix, gungj hwet ngaemgyaeuj doiq lwgminz”. Daj gou yamq hwnj diuz roen yungh Sawcuengh sij faenzcieng caemhcaiq gya haeuj Guengjsae Cozgyah Hezvei, gou couh haeujsim Luj Sin Vwnz- yozyen lo, rox de dwg aen beizyin gihgou cienmonz ciu doenghboux canghraiz、canghvwnzyozbingzlwnh、canghvwnzyozlijlun、canghvwnzyoz- benhciz caeuq canghfanhoiz daengj lauxhangz neix. Hix rox gwnzbiengz an hawj de gij mingzdaeuz “Vangzbuj Ginhyau Canghraiz”、“Diegcauxgoek Canghraiz”、“Gungdienh Ceiq Sang Vwnzyoz”. Caemhcaiq gou hix rox, 《Minzcuz Vwnzyoz》 dwg bonj cazci guek raeuz gig mizmingz ndeu, geijcib bi gonq mwh gou hwnj daihhag doegsaw couh ciengzseiz bae duzsuh- gvanj fan yawj bonj cazci neix, miz haujlai canghraiz、canghvwnzyoz bingzlwnh siujsoq minzcuz couhdwg youq gwnzde fatbiuj faenzcieng doeklaeng okmingz gwnz biengz!

Couhdwg yienghneix, doengh- boux canghraiz caeuq canghfanhoiz byawz cungj maqmuengh ndaej daengz Baekging Lujyen “Diegcauxgoek Canghraiz” neix hagsib beizyin, ndaej daengz gij vwnzyoz daswh ciuhneix daeuj sonyinx, hawj fouq lwgda bonjfaenh yawj ndaej engq gvangqlangh, hawj lingzganj ndaw uk dou ndaej engq lingzrwd. Ngoenzneix ndaej camgya aen beizyinbanh youz song baih mizmingz gap banh neix, gou roxnyinh miznaj lai lo.

12 nyied 1 hauh lajbyongh- ngoenz, mwh aen feihgih daj Namz- ningz mbin daeuj dingz youq Baekging Soujduh Gozci Gihcangz, ndawsim gou mbouj rox geijlai gikdoengh ha! Gaxgonq gou cungj laihnaeuz Lujyen liz gou gyae raeuh, siengj mbouj daengz ngoenzneix de fodfwd aj fwngz got gou haeuj ndaw rungj de bae, vuenyungz daeuj ndaej daiq vaiq lo!

Caemh dwg seizdoeng, daxbaenh youq Namzningz lijdwg muenx da cungj heuyauyau, gak yiengh va lij angj hai dwk. Hoeng, Baekging gizneix doenghgo gaenq duet roengz geu “buh saek heu” de, mwngz yawj, baenz baiz baenz baiz gofaexyangz henz roen gaenq bienq ndaej ndoqliuliu, mbouj miz mbawfaex daeuj dangj, ngiengx- gyaeuj yawj couh raen baenz rongz baenz rongz duzroeg venj youq byaifaex, sikhaek hawj mwngz siengj daengz aen dijyuzgvanj “Rongzroeg”. Yienznaeuz hoengheiq nit baihbaek hawj dou roxnyinh naj gyoet fwngz dot, hoeng, gij ndatcingz dakdaih gyoengqvunz Minzcuz Vwnzyoz Cazcise baij daeuj haenx hawj bang vunz dou roxnyinh raeujrubrub: Gyoengqde riengz ci daengz gihcangz ciep dou, cingj gij lauxhangz mizmingz hawj dou hwnjdangz, diegninz gijgwn yienghyiengh bang dou bwh ndei caez.

Youq gwnz hai ban denjlij, Cunghgoz Cozhez fucujsiz Yenz Cinghmingz naeuz:“Bouxcuengh dwg guek raeuz 56 aen minzcuz ndawde gij vunzsoq siujsoq minzcuz ceiq lai ndeu, daj ciuhgeq gvaqdaeuj caux ok haujlai vwnzva caeuq yisuz yienhda, gij cangcoz funggek Bouxcuengh vwnzyoz ciuhneix dogdaeg, dwg vwnzyoz saehnieb sevei cujyi guek raeuz faenh habbaenz gig youqgaenj ndeu.”

Cunghgoz Cozgyah Cuzbanj Ciz- donz Gvanjveijvei fucujyin Bau Genh daengq naeuz:“Doenghboux canghraiz siujsoq minzcuz aeu ndwn youq mbaeksang moq, yungh gij sigai- gvanh dogdaeg sou mbeihung bae siengj、bae naemj、bae sij gij sou soj raen haenx, bae fanjyingj aen biengz sou soj youq haenx.” De lij naeuz canghraiz aeu haeujlaeg swnghhoz, caeuq lai yiengh vunz baedauq, aeu gaemdawz diuz saimeg seizdaih.

Guekgya Minzveij Cwngcwz Fazgveihswh boux swhcangj gonq Mauz Gunghningz naeuz:“Guek raeuz youz lai aen minzcuz gap baenz, gak cuz beixnuengx youq Cungguek Gungcanjdangj dazyinx baihlaj, aeu lumj naed makleizsan nei gaenjmaed dwk got goj hwnjdaeuj, laebmaenh aen minghyinh gungdungzdij Cunghvaz Minzcuz, vih cienzswnj caeuq hwngfat minzcuz vwnzva guh gungyen.”

Youq beizyinbanh ndawde, bang dou gaenlaeng hwnj 《Geij Diemj Naemjngeix Gvendaengz Seizdaih moq Gij Hong Minzcuz Caeuq Minzcuz Vwnzyoz》、《Gij Fazcanj Moq Siujsoq Minzcuz Cungguek》、《Sanjvwnz Cuengh Gun Fanhoiz》、《Fwencuengh Cienzswnj Caeuq Fazcanj》、 《Guh Boux Canghraiz Sanjvwnz Lai Camgya Sevei Hozdung Ndeu》 doenghgij go neix.

Gyoengq lauxhangz hawj dou hwnjdangz, youq dangz go ndawde mbouj gangj vahhoengq, coenzcoenz miz yungh, doiq dou yingjyangj gig hung, dou roengzrengz supsou gij cihsiz, amq roengz gietsim doxdauq le caemsim sij faenzcieng.

Cawzhai youq gyausiz hwnj dangz, 4 hauh ngoenzde dou lij ndaej ok rog bae guh vwnzyoz sizcen hozdung. Sien bae daengz Soujduh Bozvuzgvanj canhgvanh, hawj dou rox daj ciuhgeq gvaqdaeuj, mboujlwnh baenzlawz gaij ciuh vuenh daih, baihgwnz cungj yawjnaek hong minzcuz, gak cuz beixnuengx hix vih guekgya onjdingh caeuq hwngfat guh ok gungyen hungmbwk. Daengz Houhaij canhgvanh dieg banhgoeng Minzcuz Vwnzyoz Cazcise, hawj dou rox bonj cazci mizmingz neix baenz- lawz daj denswj gaujgienh bienqbaenz bonj cazci, caemhcaiq hawj dou rox gij cingzgvang gvendaengz Cungguek Siujsoq Minzcuz Cozgyah Hezvei. Youq Luj Sin Vwnzyozyen gizde, dou gig miz yinxdaeuz yamq haeuj duzsuhgvanj bae fan yawj gij saw yo youq ndaw, dou lij bae canhgvanh Cungguek Yendai Vwnzyozgvanj. Youq gizde, hawj gou gonqlaeng ndaej yawj guek raeuz gak aen seizgeiz gij cingzgvang gvendaengz vwnzyoz fazcanj, hawj gou rox vwnzyoz caeuq seizdaih lienzhaeh gaenjmaed, vwnzyoz dwg aen gingq ciuq vunz caeuq saeh seizdaih. Youq gizde gou haeujsim ngonzyawj gij rugsaw Luj Sin、rugsaw Lauj Sej、rugsaw Mauz Dun doenghgij rugsaw vwnzyozgyah. Byaij gvaq henz rugsaw neix, yamqdin mwngz rox gag menh roengzdaeuj, hix mbouj gamj daih sing gangj vah, lumjnaeuz yaep ndeu couh miz vunz haeujdaeuj, naengh youq naj daiz ngaemgyaeuj sij faenzcieng, mbouj siengj dajduenh gyoengqde.

Hagsib gatsat ngoenzde laj- byonghngoenz, dou lij banh aen codanzvei ndeu. Vangz Fungyenj、Fungz Yi、Vangz Beivaz、Fanz Yihbingz、Cinz Yaginh doenghgij yozcej roxnaeuz canghraiz mizmingz caemh daeuj camgya. Gyoengqde maqmuengh caemhcaiq gujli dou laebceiq guh boux canghraiz roxnaeuz canghfanhoiz miz cwzyin ndeu. Gyoengqdou youq gwnz hoih miz maz gangj maz, miz boux gyo’mbaiq Luj Sin Vwnzyozyen caeuq Minzcuz Vwnzyoz Cazcise hawj aen gihvei neix daeuj Baekging hagsib, itdingh geiq maenh gij vah lauxsae, haenqrengz sij faenzcieng; miz boux angq dwk eu fwen hwnjdaeuj, gaenlaeng sing rwenz nyex ndaej geij boux yozyenz hix hai bak cuengq sing, eu fwen ciengq go, nauhyied fouzbeij, caezgya angqyangz dangqmaz.

6 ngoenz seizgan yienznaeuz dinj, hoeng, gij cihsiz baez beizyin neix hag ndaej mbouj suenq noix, roxnyinh de lij beij gimngaenz vanzlij dijbauj ne. Gou nyinhnaeuz, miz gij cihsiz neix daeuj dazyinx, diuz roen sij faenzcieng gou itdingh yied byaij yied gvangq- langh!