Doenghbaez, miz song boux baengzyoux, boux he miz cienz, hoeng simyak; boux he simndei, cix mbouj miz cienz. Boux baengzyoux miz cienz ciengzseiz hangz boux baengzyoux ndoq.

Boux baengzyoux ndoq bae ndaw ndoeng coemh danq, aenvih roen gyae, gyanghaemh couh youq ndaw ndoeng ninz. Henz bodanq miz go faex roz he, ganjfaex gyoeng miz geh, de couh ndonj haeuj ndaw congh faex bae ninz, youh raeuj youh ndaej ndoj fwn.

Miz haemh ndeu, boux baengz- youx ndoq coemh bodanq ndeng- nyanznyanz le couh ndonj haeuj ndaw congh faex bae yietbaeg. Yaep ndeu, duz guk ndeu ma henz bodanq byoq feiz, boux baengzyoux ndoq yawjraen le cungj mbouj gamj diemheiq saekdi. Youh gvaq le yaep ndeu, duz muindaem he hix ma byoq feiz. Duzmuindaem mbouj siujsim daemh roengz goenq faex dawzyubyub he bae, goenq faex neix cingqngamj doek roengz gwnz ndang duzguk bae, duzguk doeksaet ndaej diuq hwnj- daeuj, duzmuindaem sikhaek naeuz doiq mbouj hwnj. Boux baengzyoux ndoq yawj ndaej cingcing cujcuj, ndawsim fwt couh miz cawjeiq lo, hawj song duz neix gag doxdaj, duz lawz dai couh ndaej dawz noh de bae gwn roxnaeuz gai, danghnaeuz song duz cungj dai engq ndei.

De oet aen daeujien ganj raez haeuj bodanq bae coemh ndeng, couh aeu bae nad aen ndaeng duzguk, duzguk in dwk diuq hwnjdaeuj. De youh bae nad caekhaex duzmui, duzmui in dwk rongxhuhu. Baedauq geij baez, duzguk caeuq duzmui cungj maenj lo, mwngz ndaq gou, gou rongx mwngz, doeklaeng dauqdaej doxmoeb hwnjdaeuj. Aenvih doifeiz liz henz dat gig gyawj, yaep ndeu, duzguk caeuq duzmui cungj doek roengz laj dat bae dai lo. Ngoenz daihngeih nawcaeux, boux baengzyoux ndoq roengz laj bya bae gwed song duz de dawz bae gai, gai ndaej haujlai cienz. Daj seizhaenx hwnj, de couh miz cienz lai gvaq boux baengzyoux miz cienz lo.

Boux baengzyoux miz cienz yawjraen boux baengzyoux ndoq fatcaiz le, couh da ndeng lo. Miz ngoenz ndeu de bae cam boux baengzyoux ndoq vihmaz fatcaiz, boux baengzyoux ndoq lauxsaed dangqmaz, maz cungj lwnh hawj de rox caez. Boux baengzyoux miz cienz dingq le ndawsim gag siengj: Baenzneix fatcaiz ngaih lai lo, gou vihmaz mbouj hag de?

Ngoenz daihngeih, boux baengz- youx miz cienz couh bae daengz gizdieg boux baengzyoux ndoq coemh danq haenx coemh danq, lij daiq aen daeujien raez gvaq aen boux baengzyoux ndoq haujlai he ro youq gwnz ndang. Gyanghaemh, de coemh hawj feiz ndengnyanznyanz le, couh ndonj haeuj ndaw congh faex bae. Yaep ndeu, miz duz guk ndeu daeuj byoq feiz dahraix, de yawjraen le sim’angq dangqmaz. Youh gvaq le yaep ndeu, youh miz duz muindaem he caemh daeuj byoq feiz.

Boux baengzyoux miz cienz simgip lai, oet aen daeujien haeuj ndaw feiz fat ok sing. Duzmuindaem byaij haeuj henz congh faex, ronghfeiz rongh ndaej yawjraen ndaw congh faex miz aen rwz ndeu, duzmuindaem angq naeuz:“Gou raen aen rwz duzdouq.” Duzguk dingq duzmui baenzneix gangj, couh cam:“Youq gizlawz?” Duzmui couh ceij congh faex. Duzguk hix byaij coh congh faex bae ra duzdouq. Boux baengzyoux miz cienz raen song duznyaen couh youq dangqnaj, lau ndaej daengx ndang saenzdedded, nyaenx mbouj ndaej hemq okdaeuj:“Dai lo!” Duzmui- ndaem ndaej nyi miz sing, couh aeu nyauj lumj diet nei bongx gofaex roz geij mbat, ganj faex dek ok, duzmui caeuq duzguk doxcaez rag boux baengzyoux miz cienz okdaeuj, gwn donq imq ndeu.