Daeghaij daj Gvangjdungh daj- goeng maranz ngoenzhaenx, couh caeuq boh de doxndaq can ndeu. Daeghaij guhnyah gwed daeh hingzlij couh bae Mbanjnazbit ranz dahyoux de.

Bohhaij naengh youq bakdou cingq naiqnuek cit doengz ienraemx de, lienz Mehhaij heuh gwn caeuz hix mbouj leix. Mehhaij byaij daengz henz Bohhaij sing unq dwk naeuz:“Daeghaij bae dajgoeng haujlai nanz cij maranz baez ndeu, mwngz couh fat beizheiq dwk de, baenzneix de guhnyah mbouj maranz, mwngz hozroengz luba?” Bohhaij mbouj guh sing, gag cit gij ien de.

Daeghaij baezneix maranz yaek aeu yah, dahyoux de dwg Dahsiu Mbanjnazbit. Songde doeg cuhcungh couh doxndei lo. Cuhcungh bizyez le, songde couh gietdingh ngoenzlaeng doxaeu baenz gvanbaz. Daeghaij raen ndawranz geij gan rug vaihvadvad, daiq mbouj baenzyiengh, aeu yah le baenzlawz hawj mehyah swhgeij sim gyaez haenx youq haeuj ne. Baenzneix, Daeghaij couh caeuq geij boux mbauq ndaw mbanj bae Gvangjdungh dajgoeng. Dahsiu yaek riengz de bae dajgoeng, de naeuz:“Baihrog daiq luenh, mwngz couh youq ranz caj gou laeuq ngaenz dauqma hwnj ranz moq, dou caiq doxaeu ba……”

Bi’gyai yangh cwngfuj lozsiz gij cwngcwz doiq reih ndaem faex, doiq bya fwz ndoi fwz saedhengz cwngz- bauh. Bohhaij lij coz seiz couh youq dadui linzcangz ngonzhen ndoengfaex gvaq, baez guh couh 20 bi, de doiq ndoengfaex gamjcingz naekna. Dadui linzcangz sanq le, de cij maranz ndaemnaz ciengx mou gvaq ndwen- ngoenz. Seizneix dingqnaeuz miz cwngcwz neix, couh sikhaek yaek bae cwngzbauh. Youq gwnz ndoi ndaem faexmak ginghcilinz, mbouj daengz 5 bi, couh goj bienqbaenz aen lueggim luegngaenz ndeu. Hoeng, ngaenz cwngzbauh daj gizlawz daeuj ne? Geij bak moux ndoi fwz dan ngaenz cwngzbauh couh aeu geij fanh maenz. De siengj daengz gij ngaenz Daeghaij bae dajgoeng geiq dauqdaeuj haenx. Gij ngaenz haenx dwg lwedhanh daeglwg, Daeghaij dajsuenq bineix hwnj ranzlaeuz moq le couh aeu yah! Seizneix dwg geij bak moux ndoi fwz, de fangzhwnzloq cungj siengj aeu daeuj bae ndaem faex, baenzlawz guh ne?

Bohhaij doeklaeng youq ndaw gyoengqvunz doxceng cwngzbauh ndoi fwz haenx ceng ndaej gienz ndoi fwz, coh heuh guh Luegnad. Yienhbauq gicej rox le daeuj caijfangj Bohhaij, bauqceij daengh’ok aen siusik neix. Bohhaij okmingz lo. Vut geij fanh maenz okbae, vuenh ndaej aen ndoi fwz. Mehhaij laebdaeb geij ngoenz cungj gvaiq Bohhaij, hoeng, youh mbouj gamj ndaq de. Mehhaij rox gij beizheiq Bohhaij, danghnaeuz de nyinhdingh gienh saeh ndeu, couhdwg 9 duz vaiz rag hix rag mbouj gvaqdaeuj, caiq gangj ngaenz gaenq sai ok lo, Mehhaij cijndei youzcaih Bohhaij.

Ciep roengzdaeuj dwg hwnz daeb ngoenz vat gumz ndaem faex. Song bouxlaux vih mbaet ngaenz, sij mbouj ndaej cingj vunz daeuj guhhong. Vat gumz sat le, couh bae linzgohsoj cawx dinfaex lwgmak daeuj ndaem, ndawde miz faex lwgmakmaenj、faex lwg- makleiz caeuq faex lwgmakdoengj, Bohhaij lumj ciengx lwgnyez neix bae ganq gij faex de ngamq ndaem roengzbae.

Bineix seizcin daengz lo, Lueg- nad bienqbaenz aen lueg loeg he, neix dwg Bohhaij aeu lwedhanh bae ganq vuenh ndaej daeuj. Mbangj faexmak gaenq hai va, gyae’gyae yawj bae, hoengzhoengz hauhau ndeiyawj raix- caix.

Seizcou, Daeghaij ganj ma daengz ranz seiz, Dahsiu cingq youq Luegnad ndaw suenmak mbaet mak. Bineix makdoengj makgamj fungsou lo. Giceh baihrog daeuj daeh le cibgeij ci okbae, canh ndaej haujlai ngaenz. Dahsiu caeuq Daeghaij gek haujlai nanz mbouj raennaj lo, baez doxraen, couh miz haujlai vah gangj mbouj liux mbouj caenh. Ndaw suenmak dauq- cawq cungj hom heiqmak.

Dahsiu rox Daeghaij caeuq daxboh doxceng gvaq, couh riu de caenh rox hwnj ranzlaeuz, mbouj rox vih ngoenzlaeng dajsuenq. Dahsiu lwnh Daeghaij, haidaeuz Bohhaij cwngzbauh Luegnad, de hix rox, de vihneix hix simnyap. Hoeng, raen Bohhaij Mehhaij song bouxlaux baenzneix gaenx ndaem faex, de hix buet daeuj bangfwngz. De cam Daeghaij naeuz:“Baenzgya aeu hwnj ranzlaeuz gonq cij ndaej ya? Mbouj miz ranz ndei gou couh mbouj haq mwngz la? Caiq gangj, ninz youq lueggim luegngaenz mbouj beij ninz youq ranz hoenghanghang ndei ha?”

Daeghaij dingq gij vah Dahsiu le, ndawsim ndatfoedfoed, rag fwngz Dahsiu gvaqdaeuj yaek cup. Dahsiu baez baenq gyaeuj:“Mwngz simgip la? Mwngz mbouj bae coh daxboh mwngz nyinhloek, gou couh mbouj swt mwngz……”

Haetromh, Luegnad mok rim ndang, gwnz roen gyang lueg, miz boux bouxcoz he coh ndaw mbanj, yamq byaij daiq buet daeuj, bouxcoz neix couhdwg Daeghaij.