Heiqgvei dwg Gvangjsih cungj heiq hungdaeuz ndeu, dwg Gvangjsih cungj heiq deihfueng ndeu. Vunzlai heuhguh Heiqgvei roxnaeuz Heiq- gveibanh, dwg aeu Vahgun Vah- gveilinz daeuj ciengqyienj; baengh naj caeuq ndang bouxyienj bienqvaq lai cungj lai yiengh daeuj cienzcingz, de yawjnaek aeu cungj yienjfap sijsaeq caeuq depgyawj saedceij haenx bae yienj vunz ndaw heiq. Cungj heiq neix riuz youq Gvangjsih dieg gangj Vahgun vahbaihbaek, lumj Gveilinz、Liujcouh、Hozciz、Nanzningz daengj si gij dieg ndaw- singz lajmbanj gangj“Vahguen (Vahgun)” haenx, vunzlai gyaezmaij.

Heiqgvei miz 200 lai bi baedauq. 20 sigij sam seiqcib nienzdaih, boux canghheiq mizmingz Ouhyangz Yijgen cauhguh、gaijbien、cauhbien Heiq- gvei《Liengz Hungzyi》《Daj Ginhcih》《Giuzraek》daengj, neix hawj Heiq- gvei ndaej liedhaeuj guek raeuz cib cungj heiq hungdaeuz ndawde bae.

Heiqgvei rag roengz ndaw- biengz, yungzhab gij doenghyiengh nem cingzvunz ndawbiengz caeuq vwnzva daegdiemj Gvangjsih gag miz haenx, cugmbaek hengzbaenz cungj daegsaek sijsaeq unqnemq、seng- doengh、miz doenghyiengh lajmbanj lailai nem cungj gyaeundei sohsed youh depgyawj lajmbanj. Hoeng, seizneix Heiqgvei gaenq yaek muedlaemz lo, gij conzdungj haenx saetbae lai, vunzcaiz mbouj daih miz ciepriengz, cozbinj nem dinfwngz saetcienz lai, youq ndawbiengz yienjok hojguh dangqmaz; doenghgij daegsaek Heiqgvei bonjmiz haenx cingq cugmbaek bienq noix.

Youq guek raeuz, guekgya gig yawjnaek henhoh feihvuzciz vwnzva yizcanj, 2006 nienz 5 nyied, Heiq- gvei ndaej Gozvuyen baecinj lied- haeuj daih’it buek guekgya gaep feihvuzciz vwnzva yizcanj mingzloeg.

Gangj daengz Heiqgvei, deng gangj aen cozbinj hungdaeuz haenx heuhguh《Goeng Hung Dauq Mbanj》.《Goeng Hung Dauq Mbanj》dwg aen cezmuz maenhndei ndeu, youz Gvangjsih Gveilinz Si Gveigidonz comzrengz cauhguh. De gangj gij saeh gamjdoengh gvendaengz Cinz Hungzmouz ciuhvunz cinghseuq、guhsaeh caensaed, goeng neix dwg vunz mizmingz ndaw lizsij Gvangjsih、Cinghcauz Dunghgwz Doyozsw nem Gunghbu Sangsuh. Seizhaenx, Cinz Hungzmouz gaenq mauhgvaq caetcib bi, dajsuenq riengz Dahyinhoz dauq Gvangjsih Gveilinz mbanjcoj ciengx- laux, yaek dauq ranz seizhaenx, de laegfwngh rox bonjfaenh 20 bi gaxgonq youq Sanjsih doihengz aen cosih ndaem gosangh daemj baengz- sei, neix caen dwg cungj cingzcik gyaj haih nungzminz lai. De ndekhong le, gij baiz mizmingz heuhguh“Cinzgien(baengzsei)”youz de cauh- guh haenx, baenz aen gunghcwngz aeunaj、guhgyaj youz doenghboux guen cieplaeng doihengz haenx. Goeng hung Cinz Hungzmouz sim’in ngeixdauq, de naemj aeu hengz- doengh bae bouj doxdauq. Neix couh miz ok doenghgij saeh doxbungq gvendaengz vuengzdaeq nem bouxlaj、saefouh nem hagseng、cingzcaencik. Hoeng youq funghgen seizdaih, Cinz Hungzmouz guh saeh damqra caensaed mbouj ndaej baenz, ndaw sim siengjmuengh nemgyawj Dahliz- gyangh cinghseuq, hoeng dai youq dieg wnq.

Aen heiq neix ndaej haujlai ciengj, gonqlaeng ndaej guekgya daizheiq yisuz cinghbinj gunghcwngz youhsiu gibwnj ciengj、Gvangjsih daihhaj gaiq vwnzyi cangcoz“ciengj nyenz”、daihgouj gaiq Cunghgoz cietheiq“Cunghgoz higiciengj. Byauj- yenjciengj maenhndei”、daengx guek deihfueng higi gimuz maenhndei doxbeij baijyienj itdaengjciengj, 2006 nienz ndaej lied haeuj 2005 daengz 2006 nienzdoh guekgya daizheiq yisuz cinghbinj gunghcwngz cib daih cinghbinj gimuz. 2007 nienz, aen heiq neix lij ndaej daihcibngeih gaiq Vwnzvazciengj gimuzciengj.