Daj bouxswnjcienz “feihyiz” swcigih gaep、bouxcaixhangz gunghyi meijsuz Guengjsae, daengz bi 2017 ndwen 12 ngoenz 27 aeundaej aen cwngheuh “Canghlig Liujcouh”, Yangz Denz boux gvanjcangj 56 bi Aen Bozvuzgvanj Siuqdung Sanh- gyangh neix gaenq bienqbaenz boux doigvangq gij siuq Dungcuz. Lai bi daeuj, de itcig youq gwnz roen vih doigvangq、swnjcienz gij siuq Dungcuz Sanhgyangh baebae dauqdauq. Geij ngoenz neix, gijcej youq ndaw aen ban son gij siuq Dungcuz Aen Segih Cangj Ci Liujcouh Si banh haenx, yawjraen canghdinfwngz minzcuz conzdungj neix lo.

Bouxhagseng“hwnjdangz mbouj nyinhcaen” baenz bouxcaixhangz

“Gou daj iq couh maij gij siuq Dungcuz, lauxsae youq gwnz gyangj- daiz hwnjdangz, gou couh youq baihlaj daet ceij、guh siuq.” Yangz Denz naeuz, gij gamjcingz de doiq gij siuq Dungcuz haenx daj bangeq ndaw ranz cienz roengzdaeuj. Yangz Denz youq Sanhgyangh Dungcuz Swciyen Dungz- loz Myauzcuz Yangh okseng. Ciuq gij fungsug Dungcuz, daxmeh aeu son hawj dahlwg rox guh siuq、daemj- baengz doenghgij dinfwngz neix, dahsau aeu doengh fwngz gag siuq guh geu buhhaq bonjfaenh.

Daj ndaej 7 bi hainduj, Yangz Denz couh ciengzseiz naengh youq henz daxmeh、dahcej hag guh siuq lo. Miz baez ndeu, daxmeh ok rog bae guh hong, de couh laeglemx daek aeu gij raemxromj ndaw doengj daxmeh yungh daeuj nyumx baengz haenx, caemhcaiq hag gij guhfap daxmeh aeu daeuj sawq nyumx vengq baengz ndeu, mbouj siengj daengz caen nyumx baenz lo! Neix hawj de angq dangq- maz. Couhdwg yungh gij baengznwnh nyumx ndei neix, Yangz Denz hainduj cauxguh gij huqsiuq bonjfaenh lo.

Siuqdung dwg feihvuzciz vwnzva yizcanj Guengjsae Bouxcuengh Sw- cigih, de dwg cungj dinfwngz conz- dungj comz daemjrok、dajnyumx、raed ceij、guh siuq youq doxcaez ndeu. Gij doz Siuqdung aeu duzlungz、duzfungh、va、nywj、daengngoenz doenghgij doxgaiq swyenz neix guh daeuz, gij saek baengzsiuq youz bonjfaenh gag dap. Siuqdung cungj dwg siuqbingz, caeuq gij siuq gizyawz mbouj doengz. Guh Siuqdung bouh daih’it dwg aeu ra ndei baengz dajdaej; bouh daihngeih dwg daet ceij, caemhcaiq aeu gij ceij daet ndei haenx nem youq gwnz baengz dajdaej; bouh daihsam dwg guh siuq, yungh cimmae siuq ok gij yiengh, mben dwk ceijraed. Gij siuq cawz yungh daeuj dajcang gij bien buhvaq le, lij deng gvangqlangh yungh daeuj dajcang gaen’gyaeuj、nda lwgnding、haizva doenghgij doxgaiq neix.

Yangz Denz seiz lij dwg hagseng, engqlij daiq gij hongdawz guh siuq haeuj ndaw gyausiz bae, “hwnjdangz mbouj nyinhcaen” youq baihlaj laeg- lemx guh siuq. Siuq ndei vengqbaengz le, de youh siuq vengqbaengz hwnj buhvaq bonjfaenh bae dajcang, naj ronghsag angj hawj doengzhag yawj, naeuz:“Gyoengqsou yawj, gijneix dwg gou gag siuq!” Gij huqsiuq de ciengz- seiz miz doengzhag hozhaenz, lij ciengzseiz miz doengzhag cingj de son hag siuq dem.

Doeklaeng, Yangz Denz okhaq lo, haq bae ranz singq Cinz dangdieg. Daeujdaengz ranz mehbuz, de raen mehbuz Cinznaij Sizcingh hix dwg boux caixhangz guh siuq ndeu, daegbied engq caixhangz raed ceij, raed gijmaz baenz gijmaz, baez raed couh raed daengz baenz yiengh mbouj daengx fwngz saekdi, gij ceij de raed ndaej youh vaiq youh ndeiyawj, yiengh lumj caenlili. Yienghneix, Yangz Denz caeuq nuengxbawx Veiz Cinghvah cungj baenz lwgsae mehbuz lo, caiqlij gonqlaeng baenz bouxswnjcienz daiq- biujsingq feihvuzciz vwnzva yizcanj hanghmoeg (Siuqdung) swcigih. Bi 2012, de youh ndaej bingz baenz bouxcaixhangz gunghyi meijsuz Guengjsae.

Biuj ngamq ndei couh lumz giz in

Genhciz gij dinfwngz Siuqdung lai bi, gangj daengz baenzlawz guh siuq, Yangz Denz mbouj raen naet mbouj raen naiq menhmenh gangj okdaeuj, sug lumj ngoenznaengz gwndaenj. Sam dah lwg ndaej hawj de son, caemh bienqbaenz bouxcaixhangz guh siuq, gij huqsiuq mehlwg seiq vunz mboujduenh youq ndaw gak cungj doxdax aeundaej ciengj. Bineix ndwen 3, geu buhhaq Dungcuz “mizfuk habhoz” de caeuq sam dah lwg doxcaez dajveh、siuq guh haenx, youq gwnz aen hoih gaicawx gunghyibinj daengx guek gaiq daih 53 hingzndaej aen ciengjgim doxdax dajveh canjbinj cauhmoq “fungh- vuengz gim”.

Senq youq bi 2006 ndwen 12, ranz Cinz couh deng laebbaenz dieg swnjcienz dajsiuq gizdieg swnjcienz vwnzva Dungcuz baujhoh “feihyiz” Liujcouh Si, Yangz Denz caeuq mehbuz、nuengxbawx cungj baenz lauxsae son guh siuq gyae gyawj okmingz. Hoeng, guh Siuqdung mboujdan aeu miz dinfwngz, lij aeu miz naihsim dem. Gij siuq yungh fwngz siuq gig sai seizgan, siuq baenz vengq siuqiq ndeu cungj aeu yungh bae geij ngoenz, danghnaeuz dwg fan siuqhung, engq vaiq mbouj ndaej.

Aenvih Siuqdung dwg gij hong fwngz guh, aiq daengx ngoenz cungj aeu naengh youq、ngaem gyaeuj, guh nanz le, Yangz Denz couh baenz gij bingh “binghhong”, saenlaeng goz- mbit lo. Aenvih saenlaeng bienq- yiengh, miz mboengq ndeu de ciengz- seiz gyaeujdot dangqmaz, engqlij aenda hix hai mbouj ndaej, lij dot daengz din dem. Dahlwg rox le, ciep de bae ndaw yienh, hawj de youq ndaw yihyen ywbingh, gij gocwngz ywbingh hawj de indot yaek dai. Dahlwg gienq de gaej guh Siuqdung, de hix ei “baema ranz couh mbouj guh lo”.

Ginggvaq ywbingh cingzgvang bienq ndei haujlai, de dauqma daengz ndaw ranz, lij aeu bonjfaenh guh laeh, daezsingj bouxwnq aeu haeujsim ndangdaej, noix guh saekdi. Hoeng, ngamq gvaq geij ngoenz, de youq ndwi mbouj baenz youh naengh youq henz daizguhsiuq, ndaw fwngz youh gaem mae gaem cim guh siuq lo. Bouxwnq yawjraen le, cungj nyaenx mbouj ndaej riu de:“Heuh dou gaej siuq, mwngz dauq gag siuq hwnjdaeuj lo.”

Maqmuengh son ok engq lai “mehguhsiuq”

Aenvih gij siuq fwngz guh sai seizgan lai, seizneix Siuqdung conz- dungj cujyau dwg guh gij huq fwngzguh, daejyienh youq gij gyaciz yisuz caeuq souyo fuengmienh. Vih- liux caenh’itbouh haigvangq diuzloh doigvangq Siuqdung, Yangz Denz youh cauhmoq canjbinj lo, de aeu Siuqdung caeuq goenhfwngz、gaiqguj、soij、lienhhoz doenghgij doxgaiq dajcang aeu ngaenz daeuj guh neix dox giethab, hawj doenghgij doxgaiq dajcang conzdungj neix fatok rengz- supyinx moq. Linghvaih, de lij ciengzseiz gag ok cienz, bae daengx guek gak dieg camgya doxdax, couh vihliux hawj engq lai vunz liujgaij Siuqdung.

Bi 2012, Yangz Denz daengx ranz vunz roengz dingh gietsim, lid aen ranzgaeuq bae, youq dieg ranz- gaeuq hwnq aen bozvuzgvanj Siuq- dung moqsag ndeu. Seizhaenx, youq laj gij cingzgvang mbouj miz cwngfuj bangfuz, gyoengqde yungh liux gij cienzrom ndaw ranz, lij dauqcawq bae ra beixnuengx baengzyoux ciq cienz, bae ngaenzhangz daigvanj, cawx faex ceiq ndei ma, couhdwg vihliux hawj Siuqdung miz aen bingzdaiz langhbaij engq ndei ndeu. Bi 2014, aen bozvuzgvanj Siuqdung Sanhgyangh moqsag ndeu hwnq baenz hai yungh, Yangz Denz guh gvanjcangj, baenz “bouxakdaeuz”. Gizneix gawq dwg giz langhbaij gak cungj gunghyi、huqsiuq Siuqdung, youh dwg gizdieg son hag swnjcienz Siuqdung ndeu.

Youq laj daengx ranz vunz Yangz Denz daiqlingx, Dungzloz Yangh dangdieg son ok haujlai mehguhsiuq, gij huqsiuq Siuqdung gyoengqde gai bae daengx guek gak dieg caeuq rog guek, haujlai vunz baengh gij dinfwngz feihyiz saedyienh le vut gungz demsou. Caeuq neix doengzseiz, Yangz Denz hainduj engq nyaengq lo, de byaij ok Dungzloz、Sanhgyangh, dauqcawq son vunz.

Caenhguenj Yangz Denz yaek ndaej 60 bi lo, hoeng de naeuz, mehbuz ndaej 90 lai bi seizneix lij ciengzseiz raed ceij, cijaeu siuq ndaej, de couh yaek laebdaeb siuq roengz- bae, mbouj cuengq fwngz. De naeuz:“Gij doxgaiq cojcoeng cienz roengz- daeuj mbouj ndaej lumz hix mbouj gamj lumz, gou maij son hagseng, hawj engq lai vunz rox、gaemdawz cungj dinfwngz neix, couhcinj gou geq lo, Siuqdung hix mbouj deng saetcienz. Neix hix dwg aen loqsiengj ceiq hung ciuhvunz gou neix!”