Ranzgaeuq ranz gou dauqdaej miz geijlai bi, mbouj miz byawz rox. Daxbuz gou naeuz de youq aen ranz neix okseng, daxbuz lij naeuz boh de hix dwg youq aen ranz neix okseng. Daxboh gou ndaej cam gvaq boux ceiq laux ndaw mbanj dou, boux de hix mbouj rox ranzgaeuq ranz gou dwg mwhlawz daengj. Doiq dou daeuj gangj, ranzgaeuq dou dwg aen vahduenz ndeu. Seiznyez gou (aen sigij gonq 70 nienzdaih) dwg youq aen ranzgaeuq neix gvaq.

Ranzgaeuq gou dwg sam fungh ranzbyauh. Ranzbyauh dwg cungj ranz rwixyaez. Cungj ranz neix seiq faq ciengz dwg aeu faexcuk daeuj vangraeh dap baenz muengx, congh muengx miz gaemxgienz bouxhung baenzneix hung, congh muengx dwg aeu naez caeuq fiengz sauj roxnaeuz haz sauj caem baenz mbanaez bouj hwnjbae. Faq ciengz neix na bw, dwg muengx faexcuk hamh youq ndaw naez, suek ndaej saedsaed bae, yawj mbouj ok ndaw ciengz miz faexcuk. Seiq faq ciengz coyadyad. Dingjranz hoemq hazdaij. Vunz dangdieg dawz cungj ranz neix heuhguh ranzbyauh.

Ranzbyauh souh mbouj ndaej fwnrumz. Mwhfwn, ciengznaez deng cumx bienq unq couh rox sanq rox loenq. Mwhrengx, ciengznaez hawq gvaqbouh couh rox dek, ngab dek miz vang miz raeh, miz hung miz iq, miz raez miz dinj, yawj bae lumj naeng makleizsan nei, yakyawj dangqmaz. Banhaemh baez hai daeng, rongh daeng loh ok ngab dek daeuj, yawj aen ranz dauqcawq byoengq congh neix caen dwg hojlienz.

Seizhah rumz daj ngab dek ci haeuj ndaw ranz daeuj, dauqdwg liengzsisi; seizdoeng rumzbaek hix daj ngab dek daihdangq con haeuj ndaw ranz daeuj, vunz youq ndaw ranz nit dwk cienz ndang saenzdedded. Seiz- haenx youh dwg seiz hoj, ranz vunz dou gwn mbouj imq daenj mbouj raeuj dem, caen dwg yaek aeu mingh vunz bae. Daj gou roxyiuj hwnj, geiq ndaej moix bi bohmeh gou cungj aeu guh mbanaez daeuj bouj ciengz baez ndeu, caemhcaiq vuenh hazdaij dingj- ranz baez ndeu. Geiq mbouj ndaej dwg bi lawz, gij hazdaij dingjranz dauqdaej ndaej vuenh baenz vax hoemq lo.

Daeggo dahcej gou baenz mbauq baenz sau le, vihliux mbouj hawj gyoengq vunz baedauq gvaq henz ranz daj ngab dek yawjraen ndaw rug, songde aeu moegsawz daeuj nem ceijniuzbiz hwnj ciengz bae, yiengh- neix ndaw ciengz beij rog ciengz swnhda lai lo. Aen sigij gonq 70 nienzdaih, gij ranz ndaw mbanj cungj dwg ranznamh, gag ranz dou dwg ranzbyauh, dwg ndaw mbanj aen ranz ceiq rwixyaez.

Ranzgaeuq gou seiq faq ciengz baihrog, moix faq miz sam aen saeu hung, neix heuhguh saeurog. Fungh bakdangq caeuq fungh rugninz dwg aeu benj daeuj gek, song faq ciengzbenj neix dawz aen ranz baen baenz sam fungh, moix faq ciengzbenj hix miz sam aen saeu, neix heuhguh saeundaw, saeundaw beij saeurog iq di. Ndaw ranz sojmiz gij saeu, laj din saeu cungj demh gyaengh doenrin ndeu, gyaengh doenrin neix miz aen bat swiqnaj baenzneix hung. Gij doenrin neix donh ndeu loh ok gwnz namh, aiq miz 30 goengfaen sang; lingh donh ndeu daengj youq lajnamh, miz geijlai laeg mbouj rox lo. Mizmbangj saeu gaek veh miz duzlungz duzfungh. Sam fungh ranz cungqgyang youh miz ciengzbenj gek, yienghneix bakdangq couh gek baenz song aen, aen ndaw aen rog. Ciengzgek bakdangq baihgwnz guh miz baiz gvih ndeu, ndaw gvih coq lozyieng. Song fungh rugninz cungq- gyang baez gek couh baenz 4 aen rugninz lo. Song fungh rugninz miz song caengz, caengz gwnz caengz laj, dou dawz song caengz neix heuhguh gwnz canz laj canz, mboujgvaq gwnz canz daemq lai, bouxhung youq gwnz canz ndwn mbouj ndaej soh, aeu gungj hwet cij ndaej.

Gij ciengzbenj canzbenj ndaw ranz, youh na youh ndongj, caeb ndaej caen maedsaed, benj giz doxgap mbouj gon saekdi, gaenj maecim guhfong hix ndonj mbouj gvaqbae. Sojmiz gij saeu、liengz、benj、gabcij aen ranzgaeuq dou cungj mbouj yungh saek naed dietding, cij raen miz faexciem.

Ceiq daegbied dwg aen douranz. Douranz miz song caengz, caengz rog dwg doulanzganh, ndaej nengh gvaq gvaz gvaq swix; caengz ndaw dwg doubenj, cungj dou haep haeuj hai ok he. Song faj benjdou gaek veh miz lozhan baeddou, yienghsiengq gyoengqde haemq dwglau. Song henz rog dou, baih he miz song aen daengqrin, cungj daengq neix, najdaengq deng ndwenngoenz muz ndaej luemjmyigmyig ndongqyanyan. Daengqrin seiqhenz gaek veh duz- lungz duzfungh loengh caw, veh ndaej lumj lix nei, yawj le lumjnaeuz gyoengqde yaek mbin okdaeuj dahraix.

Aenvih ranzgaeuq gou geq lai, ndaw ranz beij rog ranz gumh, caemh- caiq deng cumx dem, naezdibanj mokmumu, yawj daeuj lumj dibanj aeu suijniz bae nei.

Ranzgaeuq gou mbouj rox byaij gvaq geijlai ndwenngoenz, ginggvaq geijlai fwnrumz, yienznaeuz rwix, hoeng, de lij onjonj dangqdangq. Gou mbouj ndaej mbouj boiqfug gij coengmingz vunzciuhgeq lo.

Ranzgaeuq gou yienznaeuz rwix, hoeng de lij ndaej vih gyoengqdou cw ndit dangj fwn. Youq aen nienzdaih gungzhoj haenx, dou yienznaeuz mbouj yiemz de rwix, cix coengzlaiz mbouj dawz de haeujsim, dou cij goq baenzlawz ndaej gwn imq.

Ranzgaeuq gou yienznaeuz yawj mbouj hwnjda, hoeng de gag miz gij dijbauj de: Gij saeu、liengz、benj、gabcij、ciem, cienzbouh dwg faex- ywenj ndei. Aenvih ciengznienz deng namhfaenx nem, ciengznienz deng hoenzfeiz loemz, gij saeu gij benj ndaw ranz heiznwdnwd fonxfwdfwd, yawj mbouj ok saek faex, caiqnaeuz seizhaenx gyoengqvunz mbouj raen gvaq maz seiqmienh, ranz vunz gou caeuq vunzmbanj dou mbouj miz byawz rox ranzgaeuq gou baenzneix dijbauj.

Itcig daengz bi 1983, ranzgaeuq gou deng ceklid lo, hwnj aen ranzcien 5 fungh ndeu. Seizhaenx miz boux canghdajdoq rog sengj ndeu daeuj mbanj dou co gij ranz cihcingh youq gvaq haenx dajdoq, de raen gij saeu benj ranz gou le, naeuz gijneix dwg faexywenj, dwg faex ndei, dou cij rox ranzgaeuq dou baenzneix dijbauj.

Bihaenx aen ranzcien dou dwg ndaw mbanj daih’it aen ranzcien, neix hawj ranz vunz dou ndaej ndaengmoj mboengq seizgan ndeu. Gaenlaeng ranzlaeuz ndaw mbanj aen doek aen daengj hwnjdaeuj lo, gvaq le cib lai bi, 5 fungh ranzcien dou youh bienqbaenz ndaw mbanj aen ranz ceiq rwixyaez ndeu lo.

Dou 4 beixnuengx youq ranz- gaeuq majhung. Dou youq ranzgaeuq dingq daxbuz lwnh goj, guh yahndoj、doxlaeh guh’angq, caez ninz caez gwn…… Ranzgaeuq yo miz gij yinx- daeuz seiznyez dou, ranzgaeuq daraen dou majhung. Ranzgaeuq miz gij dauqngeix lailai, dou mbouj rox lumz.

Ranzgaeuq dwg aen sukingj nienzdaih haenx, sevei cinbu de ndaej guhcingq. Dauqngeix ranzgaeuq gij gezgou de, hawj gou haenh gij vwnzmingz gvendaengz dajcaep raez- rangrang guekcoj raeuz, hawj gou haenh gij vwnzva hunglaeg minzcuz raeuz. Dauqngeix gij gungzhoj seiz- nyez gou, gou engqgya insik ndwen- ngoenz ndei seizneix, hawj gou ndaej damzdingz gvaq saedceij.