Bineix doxdaeuj, Bingzloz Yen yungh lai cungj banhfap gyamaenh caeuq hwngfat gij gvanhaeh minzcuz sevei cujyi bingzdaengj、doxgiet、doxbang、huzndei, rengzrwd doicaenh hong senhconz minzcuz doxgiet cinbu, caux ok gij heiqfaenh senhconz minzcuz doxgiet cinbu ndei.

It dwg bae yanghcin senhconz minzcuz doxgiet cinbu. Aen yienh neix minzcunghgiz leihyungh ndwen senh- conz minzcuz doxgiet cinbu moix bi banh baez haenx, youq Yauzcuz Yangh、Gyauzdingz Yangh haiguh hozdung ndwen senhconz minzcuz doxgiet cinbu, venj fuk baengzhoengz miz saw minzcuz vunznoix caeuq Sawgun, langhbaij gij senhconz banjbau aeu minzcuz doxgiet guh cawjdaez haenx, fat gij swhliu senhconz minzcuz cwngcwz、minzcuz faplwd fapgvi aen dangj caeuq guekgya 1000 lai faenh.

Ngeih dwg bae lajmbanj senhconz minzcuz doxgiet cinbu. Aen yienh neix minzcunghgiz youq mwh bae lajmbanj diuyenz, byaij haeujgyawj beixnuengx minzcuz aenmbanj dieg comzyouq minzcuz vunznoix bae, aeu minzcuz cwngcwz、faplwd fapgvi aen dangj caeuq guekgya senhconz daengz lajmbanj senhconz daengz bouxvunz, caemhcaiq youq doiqnaj gejdap gij vwndiz mizgven minzcuz fuengmienh vunzlai daezok haenx.

Sam dwg bae gunghyenz senhconz minzcuz doxgiet cinbu. Aen yienh neix minzcunghgiz caeuq senhconz bouh- monz lienzhab guh benq ciendaez hozdung ndwen senhconz minzcuz doxgiet cinbu, leihyungh goeng’ik denswj bingzmu gunghyenz、denswj bingzmu danhvei henz gai, seiz mbouj seiz boqcuengq gij ciendaez neiyungz minzcuz cwngcwz caeuq saw minzcuz vunznoix nem Sawgun daengj fueng- mienh, vih hong minzcuz daengx yienh caux ok gij heiqfaenh senhconz ndei.

(Vangz Fangh)