Vangh Yangz cujsiz gingqgyaez, gak bouxdaeuz cunghyangh daibyauj- donz gingqgyaez, gyoengq dungzci、gyoengq baengzyoux:

Ngoenzneix, Nanzningz faex heuswdswd、va hai foenghfwd、daengx singz angqyangz dangqmaz. Raeuz hoenghhwd comz youq gizneix, angqhoh Gvangjsih Bouxcuengh Swcigih laebbaenz 60 hopbi.

Cunghgung Cunghyangh、Daengx Guek Yinzda Cangzveijvei、Gozvuyen、Daengx Guek Cwnghez、Cunghyangh Ginhveij cienmonz dwk hohdienh daeuj, Siz Ginbingz cungjsuhgi vih Gvangjsih Bouxcuengh Swcigih laeb- baenz 60 hopbi daezswz “Cauhlaeb Aen Gvangjsih Gyaeundei Saedyienh Aen Loqsiengj Fukhwng”, cukgaeuq yienh’ok aen Dangjcunghyangh aeu Siz Ginbingz dungzci guh haedsim gig yawjnaek caeuq gvansim Guengjsae, Guengjsae 5600 fanh gak cuz lwgminz gyoaen dangqmaz、angqyangz dangq- maz. Boux cangzveij Cunghgung Cunghyangh Cwngcigiz、cujsiz Daengx Guek Cwnghez Vangh Yangz dungzci daiq aen daibyaujdonz cunghyangh daeuj Guengjsae, daiqdaeuj le gij cingzngeih naekna caeuq hohfuk gyaeundei aen Dangjcunghyangh aeu Siz Ginbingz dungzci guh haedsim caeuq daengx guek gak cuz lwgminz. Youq gizneix, gou daibyauj Swcigih Dangjveij、Swcigih Yinzda Cangz- veijvei、Swcigih Yinzminz Cwngfuj、Swcigih Cwnghez、Gvangjsih Ginhgih caeuq daengx gih gak cuz lwgminz, gig sang aeueiq aen Dangjcunghyangh aeu Siz Ginbingz dungzci guh haedsim haenx! Angqcoux aen daibyaujdonz cunghyangh! Angqcoux gak boux hekgviq、gak boux baengzyoux! Caensim camndei daengx gih gak cuz ganbu ginzcung caeuq gyoengqvunz gak gyaiq! Caensim camndei gyoengq cijcanyenz bingdoih cap youq Guengj- sae、gyoengq guenbing vujgingj、gyoengq gangingj cwngfaz! Caensim camndei gyoengq dungzci aen danhvei cunghyangh cap youq Guengjsae haenx! Caensim gyo’mbaiq gyoengq dungzci geq itloh doxdaeuj vih hwnqguh、gaijgwz、hwngfat Guengjsae guh'ok gunghawj haenx! Caensim gyo'mbaiq gyoengq dungzci gyoengq baengzyoux haeujsim haeujcoengh Guengjsae hwngfat haenx!

60 bi gaxgonq, ndaej Dangj- cunghyangh gyaezmaij gvansim caeuq minzcuz cwngcwz aen dangj ciuqrongh,senhgau laebbaenz Gvangjsih Boux- cuengh Swcigih, baenz le guek raeuz aen swcigih vunz siujsoq minzcuz ceiq lai ndeu, aen Guengjsae moqsaksak daj neix hainduj lo. 60 bi doxdaeuj,daengx gih gak cuz lwgminz caez diemheiq、caemh minghyinh、sim doxlienz, dawzneuz doxbang、caen lumj ranz vunz ndeu, doengzcaez doxgiet haenqguh、doengzcaez mwn- hoengh hwngfat, cauh ok le cingzcik hungloet ndaej vunz haenh, ranghdieg Betgveiq bienq ndaej yied daeuj yied gyaeundei.

Daegbied dwg daj Cibbet Daih aen dangj doxdaeuj, ndaej aen Dangjcunghyangh aeu Siz Ginbingz dungzci guh haedsim akrem daiqlingx, daengx gih gak cuz lwgminz yaengx- sang mbawgeiz hungmbwk gij swh- siengj Siz Ginbingz sevei cujyi miz daegsaek Cungguek seizdaih moq, cienzmienh doeksaed gij sawjmingh moq “sam daih dinghvih” caeuq gij iugouz moq “haj aen netsaed” Siz Ginbingz cungjsuhgi gyau hawj Guengjsae caeuq doiq Guengjsae daezok haenx, hailoh cauhmoq、laemxsim baenaj、ngaemgyaeuj buek- guh, doidoengh gij saehnieb hwng Guengjsae fouq lwgminz aeundaej gij cingzcik doenghbaez caengz ndaej gvaq、fatseng gij bengwz doenghbaez caengz miz gvaq. Aen Guengjsae doenghbaez “laux、 siuj、 bien、 bya、 gungz” neix, guhdaengz le yiengh cienjbienq daj mboengq souhaeuj noix yamqhaeuj mboengq cungjdaej souhaeuj cungdaengj、daj giz byai gyaudoeng daengx guek yamqhaeuj ranghdieg cotsim gyaudoeng、daj dieg haemq goxgex fungsaek yamqhaeuj najcoh Dunghmungz hailangh、daj lwgminz gwndaenj mbouj gaeuq yamqhaeuj cienzmienh siujgangh,sij ok le faenzcieng moq baihnamz guekcoj mwnhoengh hwngfat.

——Raeuz itloh dingjmaenh Cungguek Gungcanjdangj daiqlingx,laemxsim mbouj bienq byaij diuz roen sevei cujyi miz daegsaek Cungguek, laebmaenh “seiq aen eiqsik”, giendingh “seiq aen gagsaenq”, giengiet henhoh gij diegvih haedsim Siz Ginbingz cungjsuhgi, giengiet henhoh gij gienzvi caeuq gij daiqlingx gyonjcomz doengjit Dangjcunghyangh, laebciengz giendingh gangj cwngci、goq daihbuenz、souj gijliz, itloh aeu mbawgeiz dangj guh mbawgeiz、aeu gij fuengyiengq dangj guh fuengyiengq、aeu gij ceiqheiq dangj guh ceiqheiq, saedbauj gij cwngling cunghyangh doengrat. Aen Guengjsae ngoenzneix, cwng doeng vunz huz、bak nieb hoenghvuengh、sim vunz naemj ndei,Mbanjcuengh gak cuz lwgminz “mbouj guenj rumz caeuq fwn, itloh riengz dangj byaij”, laemxsim riengz aen fuengyiengq dangj vixyinx haenx ngiengxgyaeuj haenqrengz baenaj.

——Raeuz itloh dingjmaenh caeuq caezcienz aen cidu ranghdieg minzcuz gagguenj, cienzmienh daengzdaej caephengz gij minzcuz cwngcwz aen dangj, lienzdaemh doicaenh hwnqguh dieg yienghndei minzcuz doxgiet cinbu, haeujlaeg mbeguh boqgangj son’gyauq minzcuz doxgiet cinbu, gaenxmaenx coicaenh gak minzcuz baedauq huzndei, haeujrengz gyamaenh hwngfat yiengh minzcuz gvanhaeh sevei cujyi bingzdaengj doxgiet doxbang huzndei haenx, netsaed couqmaenh gij eiqsik caezcaemh aen Cunghvaz Minzcuz ndeu, mboujduenh cauhmoq demlai Guengjsae hengzguh diuzroen cingqdeng gaijgez minzcuz vwndiz miz daegsaek Cungguek. Aen Guengjsae ngoenzneix, gak cuz lwgminz couh lumj ceh siglouz nei got ndaet youq itheij, huzndei caez youq、caezsim okrengz、huzndei hwngfat, minzcuz gvanhaeh dwg seiz lizsij ceiq ndei.

——Raeuz itloh dingjmaenh hwngfat dwg gij saeh youqgaenj daih'it, gaemmaenh fagseiz baengh hwngfat gaijgez gak cungj vwndiz dieg minzcuz, laebmaenh gij leixniemh hwngfat moq, cawjdoengh habngamj dawzndei dazyinx cungj cangzdai moq ginghci hwngfat,netsaed doicaenh gaijgwz gij gapgyaq mbiengj gunghawj, haeujlaeg hengzguh aen canloz cauhmoq doidoengh hwngfat, gyarem hwnqguh gij sezsih giekdaej, coicaenh canjnieb cienjyiengh swnggaep, gyavaiq hwnqguh aen ginghci dijhi yendaiva, netsaed doidoengh ginghci caetliengh sang hwngfat baenaj. Aen Guengjsae ngoenzneix, gyoebhab saedlig yamq hung yat baenaj, gij naengzlig cauhmoq swngsang yienhda, yienghsiengq singzmbanj ngoenz beij ngoenz ndei, aen Guengjsae moq fouqmiz vwnzmingz doxhuz gyaeundei ndeu cingq hwnghwnj youq baihnamz guekcoj hungmbwk.

——Raeuz itloh dingjmaenh gyalaeg gaijgwz gyadaih hailangh, gaenjndaet hopheux aen sawjmingh moq “sam daih dinghvih”, haeujlaeg doicaenh gij gaijgwz aen lingjyiz youqgaenj caeuq giz hothoh youq- gaenj, gyavaiq cauhlaeb aen gwzgiz moq gizgiz hailangh hwngfat, guhbaenz “yiengqcoh baihnamz、lienzciep baihbaek、yungzhaeuj baihdoeng、lienzhab baihsae”, yungh cienzbouh goengrengz dajcauh banj swnggaep Cungguek-Dunghmungz Bozlanjvei, caensaed doicaenh youq gwnz gozci hwnqguh diuz roenloh moq youq dieghawq dieghaij doxgap guh gaicawx, gaenxmaenx doiqciep gij hwngfat ranghdieg henz haijvanh Yez Gangj Au, haeujlaeg yungzhaeuj hwnqguh “it rangh it loh”. Aen Guengjsae ngoenzneix, cienzmienh gyalaeg gaijgwz yamqonj byaij vaiq, doiq rog hailangh doxgap gyalaeg gya’gvangq, cingq youq ndaw gvaengxlaengx engq hung、 aen biengzdieg engq gvangq、giz caengzgaep engq laeg yungzhaeuj daengx guek、byaijcoh Dunghmungz、gotumj seiqgyaiq.

——Raeuz itloh dingjmaenh loegsaek hwngfat, geiqmaenh gij daengqdak “gijak swnghdai Guengjsae dij gvaq gim” Siz Ginbingz cungjsuhgi, haeujlaeg saedhengz aen leixniemh swnghdai vwnzmingz, dingjmaenh swnghdai laeb gih、swnghdai ikleih lwgminz, doengjit suenqveh ceihleix hidungj bya raemx ndoeng naz huz haij, lienzdaemh doicaenh hwnqguh lajmbanj “Guengjsae gyaeundei” caeuq hwnqguh hawsingz ngamj youq,gyavaiq hwngfat swnghdai ginghci、canjnieb loegsaek, haeujrengz daezswng gij “yiengh gyaeu” raemx saw bya heu、yienh’ok gij “yunghcawq” byagim bya’ngaenz, mboujduenh uet seuq gaiq ciubaiz dijbauj “bya heu raemx saw swnghdai gyaeundei”. Aen Guengjsae ngoenz- neix, bya seizseiz heu、 raemx seizseiz saw、