Ndwen 12 ngoenz 10 banringz- gvaq, Aen Daihhoih Angqhoh Gvangjsih Bouxcuengh Swcigih Laeb- baenz 60 Hopbi youq Aen Cungsim Dijyuz Gvangjsih banh. Cunghgung Cunghyangh、Daengx Guek Yinzda Cangzveijvei、Gozvuyen、Daengx Guek Cwnghez、Cunghyangh Ginhveij fat hohdienh daeuj. Boux cangzveij Cunghgung Cunghyangh Cwngcigiz、cujsiz Daengx Guek Cwnghez、donz- cangj daibyaujdonz cunghyangh Vangh Yangz camgya angqhoh daih- hoih caemhcaiq gangjvah.

Seizdoeng Nanzningz lij dwg faex heuswdswd、va hai foenghfwd、daengx singz angqyangz dangqmaz, gizgiz miz gij heiqfaenh ngoenzciet angqyangz. Daih’iek 2.2 fanh boux gak cuz gak gyaiq ganbu ginzcung ndang daenj buhvaq moqsag, doxcomz youq Aen Cungsim Dijyuz Gvangjsih, caezcaemh angqhoh ngoenzciet hunghoengh neix.

Banringzgvaq 3 diemj cung, boux fusuhgi Swcigih Dangjveij、cujsiz Swcigih Cinz Vuj senhbu daihhoih hainduj. Youq mwh goguek goksasa, geiznding hajsing menhmenh swng hwnjdaeuj.

Boux veijyenz Cunghgung Cunghyangh Cwngcigiz、fucungjlij Gozvuyen、fudonzcangj daibyaujdonz cunghyangh Sunh Cunhlanz doeg gij hohdienh Cunghgung Cunghyangh、Daengx Guek Yinzda Cangzveijvei、Gozvuyen、Daengx Guek Cwnghez、Cunghyangh Ginhveij gvendaengz angqhoh Gvangjsih Bouxcuengh Swcigih laebbaenz 60 hopbi.

Youq mwh sing bekfwngz nauhyied, Vangh Yangz hwnjdaiz gangjvah. De naeuz, aen Nanzningz baihnamz guekcoj bak va caez hai、biengzdeih Betgveiq vunzlai angq- yangz. Gig sim’angq daiq gij daknaek Dangjcunghyangh caeuq Siz Ginbingz cungjsuhgi, daiq gij hohfuk lwgminz gak cuz daengx guek, caeuq lwgminz gak cuz Gvangjsih caezcaemh angqhoh swcigih laebbaenz 60 hopbi. Gou daibyauj Cunghgung Cungh- yangh、Daengx Guek Yinzda Cangz- veijvei、Gozvuyen、Daengx Guek Cwnghez、Cunghyangh Ginhveij angqhoh Gvangjsih Bouxcuengh Swcigih, youq ngoenzciet neix cam- ndei caeuq cuknyienh 5600 fanh ganbu ginzcung gak cuz Gvangjsih！

Swcigih Dangjveij suhgi Luz Sinhse youq gwnz daihhoih gangjvah. De naeuz, 60 bi doxdaeuj, daegbied dwg daj Cibbet Daih aen dangj doxdaeuj, ndaej aen Dangjcunghyangh aeu Siz Ginbingz dungzci guh haedsim akrem daiqlingx, lwgminz gak cuz daengx gih caez diemheiq、caemh minghyinh、sim doxlienz, dawzneuz doxbang、caen lumj ranz vunz ndeu, doengzcaez doxgiet haenqguh、doengzcaez mwnhoengh hwngfat, cauh ok le cingzcik hungloet ndaej vunz haenh, ranghdieg Betgveiq bienq ndaej yied daeuj yied gyaeundei. Raeuz gig rox daengz, cijmiz dingj- maenh Cungguek Gungcanjdangj daiqlingx, dingjmaenh diuz roen sevei cujyi miz daegsaek Cungguek, dingj- maenh caeuq caezcienz aen cidu ranghdieg minzcuz gagguenj, dingj- maenh couqmaenh gij eiqsik caez- caemh aen Cunghvaz Minzcuz ndeu, cijndaej saedyienh Gvangjsih hwngfat baenaj, cijndaej saedyienh gak minzcuz doxgiet doxhuz, mboujduenh haicaux Gvangjsih daengzcog engqgya gyaeundei.

Ginzcung daibyauj Banh Ging- byauh、Ya Swcuh hix youq gwnz daihhoih fazyenz.

Riengzlaeng vunzlai yienjheiq 《Seizdaih Moq Haenqheiq Gvangjsih Moq Gyaeundei》. Biujyienj aeu “haijva coux baengzyoux” guh haidaeuz, faen baenz “gyaranz hung huzndei”“Gvangjsih moq gyaeundei”“seizdaih moq haenqheiq” 3 aen biencieng. Doeklaeng, daengx ciengz ciengq 《Ciengq Guekcoj》， hohfuk guekcoj hwng’vuengh fatdad、Gvangj- sih ngoenzcog engqgya gyaeundei.

Boux fudonzcangj daibyaujdonz cunghyangh Youz Genz、Bwzmaj- cizlinz、Maj Byauh、Bahdwzwj、Myauz Vaz caeuq gyoengq cwngzyenz daibyaujdonz camgya daihhoih, boux fucujsiz Cib’it Gaiq Daengx Guek Cwnghez Lij Caucoz wngqiu camgya daihhoih.

(Sinhvazse gicej/ Yangz Veiz- han Gyangh Siuh Cinz Singhsingh Gvangjsih Yizbau gicej/Vei Hwngz Dungj Vwnzfungh Cinz Yizcwz)