Cien bak bi doxdaeuj, gij cienznaeuz gyaeundei caeuq sing fwen haprwenz Louz Samcej, youq diegdeih Guengjsae riuzcienz, youq ndaw gyoengq vunzlai maj rag did ngaz、hai va dawz mak, cauh ok le gij hingzsik biujyienh vwnzva fung- fouq lai yiengh. Boux ak ciengqgo Bouxcuengh Vangz Cunhyen yienj- ciengq 《Fwen Lumj Raemxdah Seizcin》, dawz fwen nyuenz miz Bouxcuengh gingdiemj Guengjsae caeuq fwen Louz Samcej guh doxyungz ndaej gig ndei, boux de baez ciengqgo couh hawj vunz haenh: Va! Bouxcuengh ndei!

Bi’gvaq nienzdaej, aen hoih yienjciengq bimoq fwen Louz Samcej 2018 Yizcouh Gih Hozciz Si youq Hozciz Yozyen banh baenz, Guengjsae haujlai boux vwnzyi mizmingz caeuq gyoengq hagseng Hozciz Yozyen caezyiengj le ciengz heiq fwen Louz Samcej ndeiyawj neix, yienhciengz heiqfaenh vwnzva naekgywd, sing fwen rwenzrwd, heiqfaenh nauhyied, daegbied dwg fwen Louz Samcej moq, sing goksasa, yaem’wenq caeuq seiz- hwng caemh miz, hawj vunz cungj naeuz gvaqyinx!

Ciuq cam rox, fwen Louz Samcej dwg gij go minzcuz Boux- cuengh, faen miz fwen ndwen- ngoenz、fwen guhhong、fwen dox- gyaez、fwen yizsi、fwen duenz、fwen gojgaeq caeuq fwen geq cauhseiq daengj caet loih, de miz gij daegdiemj yungh fwen lawh vah caeuq gij minzcuzsing mingzbeg, swnjcienz haemq caezcingj, fwen cungjloih fungfouq lai yiengh, cienzboq gvangqlangh. Bi 2006 ndwen 5 ngoenz 20, fwen Louz Samcej ndaej Gozvuyen baecinj liedhaeuj buek daih’it guekgya gaep feihvuzciz vwnzva yizcanj mingzloeg.

Youq mwh cauhguh yaemgo denyingj 《Louz Samcej》, boux- raizswz Gyauz Yij、bouxraizbuj Leiz Cinbangh yungh gij daegdiemj ceiq ndei fwen Guengjsae caeuq fwen Bouxcuengh, cauhguh ok le fwen Louz Samcej gig miz funggek Mbanjcuengh naekgywd、doengzseiz youh hab gij gyaezmaij vunz Cungguek. Daegbied dwg ndawde mbangj doiq fwen, engq dwg gauciuz lailai, hawj vunz haeujyinx. Mehmbwk gyoebhab Mbungqmbaj Mbin caeuq lwgvuengz fwenyoux Cauz Yangz doengzcaez yienjciengq 《Doiq Fwen》, yungh gij fuengsik 21 sigij langhbaij le gij gojgaeq doxgyaez Louz Samcej caeuq beix Daegniuz.

Louz Samcej yienznaeuz dwg aen cienznaeuz he, hoeng cix mbouj dwg riuz daengxndwi, de miz gij giekdaej yinzvwnz caeuq diegnamh vwnzva naekna. Yizcouh mbanjranz Louz Samcej, gingjsaek gyaeundei, deih ndei vunz coengmingz, gyoengqvunz gizneix cien bak bi doxdaeuj swnjcienz fwen Louz Sam- cej, youq ngoenznaengz guh hong gvaq ndwenngoenz hix ciengzseiz eu fwen gangj ok gij cingzgamj ndaw sim. Guekgya feihvuzciz vwnzva yizcanj bouxswnjcienz fwen Louz Samcej fwenvuengz Se Gingliengz caeuq aen gyoebhab dangdieg mizmingz yungh fwen guh moiz, “dahlwg Yizcouh”——Daih daih- sam bouxswnjcienz Louz Samcej Dangz Beicuh gyo’mbaiq mbanj- ranz, gyoengq “fwenvuengz iq” daj Yizcouh Saedniemh Siujyoz daeuj haenx yungh fwen lwnh gyoengq bouxhek dieggyae naeuz lwgnyez runghbya mbouj bingzciengz.

Daj bi 2016 buek daih’it “fwen Louz Samcej” doiok dox- daeuj, mboujdanh ndaej daengz gyoengq vunzlai ndiepgyaez, hix yinx ndaej engq lai canghciengqgo yungh gij vwnzva cienzdoengj minzcuz guh goekgaen daeuj cauh- guh. 《Fwenyoux Dahyagen》 lumj raemxmboq nei sawdikdik, 《Sawq- mwh Miz Di Naemj Mwngz Lo》 cingz naek lai raeuh, song hot “fwen Louz Samcej moq” baez fat okdaeuj, langhbaij le gij gagsaenq vwnzva Bouxcuengh youq seizdaih baihgonq haenx, sing fwen ndeidingq hawj gyoengq bouxgyaez fwen iq yienh- ciengz hoih yienjciengq baez youh baez angq hemq、dopfwngz nyauz- nyauz.

Louz Samcej duh Cungguek, engq dwg duh seiqgyaiq. Fwen Louz Samcej dangguh buek daih’it feih- vuzciz vwnzva yizcanj Cungguek, miz gij lizsij goek gyae rag raez, miz gij giekdaej vwnzva vunzlai naekna, miz gij hingzsik fungfouq lai yiengh, engq miz gij daengzcog rongh- sagsag.