Gij yisuz raed ceij dwg gij hong fwngzguh conzdungj ndawbiengz Cunghvaz minzcuz, de goek gyae rag raez, naihnanz mbouj doekbaih, dwg gij dinfwngz daegbied dijbauj yisuz ndawbiengz Cungguek, gaenq bienq- baenz gij dinfwngz dijbauj yo youq ndaw aencang yisuz seiqgyaiq. Gij yiengh yisuz caensaed、lumj caen mizyinx de, miz gij rengzsupyinx yisuz daegbied. Loz Vazcingh bouxswnj- cienz gij dinfwngz raed ceij Mulaujcuz Lozcwngz Mulaujcuz Swciyen neix couhdwg yungh song faj fwngz riengjret、fag geuz ndeu caeuq geij mbaw ceij, raed ok ciuhvunz ronghsag gyaeundei lo.

Byaij haeuj aenranz guhhong dinfwngz raed ceij Loz Vazcingh bouxswnjcienz gij dinfwngz raed ceij Mulaujcuz neix, couh yawjraen de ciuq beijlaeh baeb ndei ceijnding, siujsim gaem hwnj faggeuz hainduj raed. De gig nyinhcaen, fwngz riengjret, ngamq yaep ndeu, mbaw doz gyaeundei yungh ceij raed okdaeuj ndeu couh baenz lo. Loz Vazcingh bineix ndaej 48 bi, de doq guhhong doq lwnh gij gojgaeq de caeuq raed ceij hawj gou dingq.

Loz Vazcingh naeuz, gij dinfwngz raed ceij Mulaujcuz dwg mbanjbya Mulauj cungj hingzsik biujyienh vwnzva ndeu, miz daegsaek minzcuz naekna. Gij lizsij dinfwngz raed ceij ndawbiengz Mulaujcuz gyaenanz, funggek daegbied, ceiq caeux youq Dangzcauz couh miz lo, ginggvaq Sungdai、Yenzcauz, seiz ceiq hwng- hoengh dwg youq Mingzcauz、Cingh- cauz, daengz seizneix gaenq miz baenz cien bi lizsij. Gij ceijraed ndawbiengz Mulaujcuz miz daengngoenz、rongh- ndwen、roegfunghvuengz、duzmbaj, caeuq va nywj faex doenghgij doz hamzmiz gij eiqsei mizfuk habhoz neix, gij doz siuq youq gwnz aennda dex lwgnyez haenx, cungj dwg yungh ceij raed baenz yiengh gonq liux cij siuq baenz. Gij ceijraed Mulaujcuz ndaej baen baenz seiq loh: Loh daih’it dwg yungh daeuj nem, lumjbaenz cigciep nem hwnj gwnz fajdou aencueng、 bangxciengz、 daeng’va、saiva bae, hawj doenghgij neix bienq ndeiyawj; loh daihngeih dwg yungh daeuj baij daengh, lumjbaenz yungh daeuj dap doxgaiq soengq vunz、gyaqcang、huqcaeq、huqgung; loh daihsam dwg yungh daeuj guh gij daej siuq, lumjbaenz daej siuq ndangdaenj、haiz mauh、aennda、aenswiz、soujgaen doenghgij doxgaiq neix; loh daihseiq dwg yungh daeuj yaenq nyumx, hix couhdwg yungh daeuj guh gij vunqyaenq baengzva yaenq o, lumj- baenz yungh youq gwnz baengz guh buhvaq、najdenz、yiemzdou、omj doenghgij doxgaiq neix.

Loz Vazcingh youq aen yienh neix Swbaj Cin Swhbingz Cunh Mbanjsiujyinj ranz Mulaujcuz seiq- daih raed ceij ndeu okseng, ranz neix daj geij daih gaxgonq couh hainduj gig caixhangz gij dinfwngz raed ceij、veh doz, youq doengh aen mbanj henz- gyawj gig okmingz, daengx ranz vunz baengh gij dinfwngz neix gwndaenj.

Faenh dinfwngz neix daihdaih doxcienz, daengz Loz Vazcingh gaenq dwg daih daihseiq lo. De dauqngeix naeuz, doenghbaez gij nda fwngzguh ranz de cienz roengzdaeuj haenx gai ndaej gig ndei, cungj nda neix doenggvaq gij ceijraed giujmiuq siuq guh baenz, gyaqciq dangqmaz, youq dangdieg gig okmingz. Moix bi sam nyied sam, bakdou ranz de couh miz baenz gyoengq baenz gyoengq vunz mbanj henzgyawj daeuj baizdoih cawx nda, raezrangrang daj bakdou ranz itcig baiz bae daengz byai hongh, vunzlai cungj aenvih cawx ndaej gij nda ranz de guh haenx roxnyinh miznaj. Seizgan gvaqbae, haujlai yiengh cungj bienq lo, riengz seizdaih hwngfat, gij sibgvenq ndwenngoenz vunzlai hix bienq ndaej gig hung, raed ceij cungj dinfwngz neix hix caeuq gij dinfwngz conzdungj wnq doxlumj bienq ndaej mbouj hwng geijlai lo. Daengz Loz Vazcingh daih neix, dan baengh raed ceij cungj dinfwngz neix gaenq dingj mbouj ndaej daengx ranz vunz gwndaenj. Daxmeh bi’ndwen geq lo, Loz Vazcingh youh bae Liujcouh guh seng’eiq ra cienz daeuj gvaq ndwenngoenz, bakdou ranz gaenq mbouj miz baenz gyoengq baenz gyoengq vunz daeuj baizdoih cawx nda, cungj dinfwngz raed ceij Mulaujcuz daegbied neix hix couh yaek mbouj miz vunz swnjcienz lo.

Swnjcienz cungj dinfwngz neix caemhcaiq hawj de hwnghoengh hwnjdaeuj dwg gij simmuengh ciuhvunz daxmeh Loz Vazcingh. Bi 2012, daxmeh de bingh naek, seiz yaek laepda daegdaengq daengq Loz Vazcingh, maqmuengh de mboujlwnh geijlai dwgrengz, cungj aeu henmaenh cungj dinfwngz neix, daihdaih swnj- cienz roengzbae. Loz Vazcingh doek raemxda ei lo. Bi 2013, de mbouj guh gij seng’eiq youq Liujcouh haenx le, mbouj yaemhywx saekdi dauqma daengz mbanjranz, swnjcienz gij dinfwngz raed ceij. Vih engq ndei bae swnjcienz caeuq hawj cungj dinfwngz raed ceij daegbied neix hwnghoengh hwnjdaeuj, Loz Vazcingh seiqlengq hagsib、laemxsim nyinhcaen yenzgiu, mboujduenh caezcienz caeuq gaijndei gij dinfwngz raed ceij bonjfaenh. Aenvih mbouj bae ra cienz, gij cienz rom haujlai bi haenx mbouj geijlai nanz couh yungh yaek liux lo, youq mwh ceiq hoj, de engqlij dajsuenq byaij hwnj gyaeuj gai bae raed ceij、veh yiengh hawj vunz ra cienz ciengx bakhoz.

Gij genhciz caeuq ceiok Loz Vazcingh dauqdaej mbouj dwg guh daengxndwi. Seizhaenx ngamj bungz Lozcwngz Mulaujcuz Swciyen laeb- baenz 30 hopbi, Lozcwngz Yenveij、Yen Cwngfuj daegbied vih cangh- dinfwngz ndawbiengz lumj Loz Vaz- cingh yienghneix daphwnj le aen bingzdaiz langhbaij ndeu. Gij cozbinj ceijraed Loz Vazcingh langhbaij haenx lai cungj lai yiengh、cauh’eiq daeg- bied、neihanz fungfouq, giujmiuq yungz gij yiengh gij heiqseiq fanhfaed haeuj ndaw cozbinj bae, hawj vunz sim maez, hawj vunz haeujyinx, hix yinx ndaej vwnzva bumwnz yawjnaek. Dangjveij senhconzbu dangdieg haenqrengz bae senhconz, vwnzva bumwnz ok aenranz guhhong raed ceij hawj de mbouj aeu cienz, haeuj- coengh de vatcimh caeuq swnjcienz gij dinfwngz raed ceij Mulaujcuz.

Miz gij cwngcwz ndei aendangj bangfuz le, gij saehnieb Loz Vazcingh ngoenz hoengh gvaq ngoenz. Gij coz- binj ceijraed de 《Feihyiz Mulaujcuz》aeundaej aen ciengjgim “Bazgvei Denhgungh Ciengj” gunghyi meijsuz cozbinj Guengjsae daengj lai aen ciengj, doenghgij cozbinj 《Mbawdoz Bak Duz Yiengz》 《Mbawdoz Bak Duz Lingz》 de cauhguh haenx youq gwnz 《Gvanghmingz Yizbau》 《Cungguek Nungzminz Bau》《Guengjsae Yizbau》 doengh aen bauganh neix, caeuq gwnz muengx meizdij fatbiuj.

Cawz bonjfaenh gaenx cauhguh le, Loz Vazcingh lij byaij haeuj hagdangz bae son gij dinfwngz raed ceij Mulaujcuz dem. Bi 2016 ndwen 4 ngoenz 26, Loz Vazcingh daeujdaengz Hozciz Si Cizyez Gyauyuz Cungsim Hagdangz, son gij dinfwngz raed ceij hawj gyoengq hagseng. Ngoenzhaenx, Loz Vazcingh aeu 《Feihyiz Mulaujcuz》gij cozbinj ceijraed aeundaej aen ciengjgim “Bazgvei Denhgungh Ciengj” neix langhbaij hawj gyoengq hagseng yawj, gyoengq doengzhag yawj le cungj haenhnyauznyauz, gikfat le gij yinxdaeuz naekna gyoengq hagseng hag gij dinfwngz raed ceij. Loz Vazcingh daj raed cihsaw、raed doenghduz doenghgij giekdaej neix hainduj, ciuq bouhloh menhmenh son hagseng hag gij dinfwngz raed ceij.

Raeblaeng gij dinfwngz raed ceij Mulaujcuz ndaej haenqrengz swnj- cienz caeuq fatyiengz, dwg Lozcwngz Mulaujcuz Swciyen Dangveij、Cwng- fuj gig yawjnaek baujhoh vwnzva Mulaujcuz. Aen yienh neix saedhengz le vwnzva、feihyiz vwnzva yihfan Mulaujcuz、vwnzva ndangdaenj、vwnz- va ranzmbanj doenghgij gunghcwngz “cib cungj vwnzva hung” neix, cung- faen vatcimh canghdinfwngz ndaw- biengz Mulaujcuz, henmaenh gij goekmeg vwnzva minzcuz, coicaenh vwnzva hwngfat hoenghvuengh.