Beixnuengx, mwngz bae youz gvaq raemxdiuqdat Dwzdenh caengz? Danghnaeuz mwngz caengz bae gvaq, caen hab bae yawj baez ndeu. Ngoenzhaenx, gou caenda ndaej raen gij yiengh gyaeu Raemxdiuqdat Dwz- denh, caencingq mbouj gyaj dahraix.

Lauheiq mwngz raen gvaq haujlai raemxdiuqdat, lumjbaenz Raemx- diuqdat Vangzgojsu, Raemxdiuqdat Luzsanh. Mwngz cungj nyinhnaeuz gwnz digiuz gingqyienz miz gij mbwn cauh gingjsaek baenzneix saenzgeiz, baenzneix gyaqciq. Hawj mwngz simsoeng vuenheij, lumzlangh dox- dauq. Hoeng, youq dieg Bouxcuengh, hix miz giz raemxdiuqdat gyaeundei raixcaix ndeu, seiqgyaiq okmingz, neix couhdwg guekgya 5A gaep lijyouz gingjgih —— Raemxdiuqdat Hamj- guek Dwzdenh.

Raemxdiuqdat Dwzdenh dieg youq henzguek Cungguek-Yeznanz, dwg gizdieg Gvangjsih Dasinh Yen Sozlungz Cin. Vang hamj Cungguek Yeznanz song aen guekgya, baiz youq gaenlaeng Raemxdiuqdat Yihgvahsuh Bahsih-Ahgenhdingz, Raemxdiuqdat Veizdohliya Sanbijya-Ginhbahbuveiz caeuq Raemxdiuqdat Nizyagyahlah Meijgoz-Gyahnazda, dwg seiqgyaiq daihseiq、Yacouh daih’it daih hamj- guek raemxdiuqdat. Gij goekraemx de daj aen Dahgvicin Gvangjsih Cingsih Si fat okdaeuj, daengx bi miz raemx, lae haeuj Yeznanz youh dauq lae ma Gvangjsih, ginggvaq Dasinh Yen Mbanjdwzdenh duenh dah neix bungq deng bangxdat couh doek baenz raemxdiuqdat.

11 nyied 4 hauh daihcaeux, gou naengh hwnj gwnz cihek, caeuq gyoengq hekyouz itheij, angqangq riuriu coh gizdieg Raemxdiuqdat Dwzdenh bae. Itloh roengauhsuz, riengjretret baefofo, diemj lai cung couh daengz bakroen gauhsuz. Ok bakroen gauhsuz le, ci hai haeuj roenngeihgaep bae. Roen gaeb lo, ci hix numq roengzdaeuj, gou muengh ok rog cueng ci bae. Va! Lwgda gou baez byaengq rongh, doq dungxsangj simhai. Song henz roen haenx, bya daengjbyoengbyoeng, gwnz bya faex heu nywj oiq, goengq dem goengq, lumj fan damjheu nei heuxgeuj goengloh. Gyoengq goengq bya ndawde, seiz mbouj seiz setyienh diuz dah iq sawdikdik daeuj, lumjbaenz saicouz mbe youq ndaw lueg. Gij roeg gwnz faex bek fwed heuhceuceu, cingq eu fwen angqcoux bouxhek daj gizgyae daeuj.

Gou geiq ndaej 30 geij bi gaxgonq, gou ngamq daj daihhag bizyez camgya gunghcoz. Miz baez ndeu, riengz doengzsaeh bae Dwzbauj Yen guh hong diucaz, hix naengh banci ginggvaq yiengh roen bya neix. Baezhaenx, aenvih lajmbanj cawj haeux cawj byaek lijdwg aeu fwnz coemh feiz, gij faex gij haz gwnz bya cungj deng vunzmbanj raemj caez gvej liux, aen bya ndoqndangndang mbouj miz saek go nywj, loh ok gij ndaekrin ndongjndatndat, gig noix raen saek- heu, seiqlengq mongmumu. Caen liuh mbouj daengz, ngoenzneix ndoengbya bienqbaenz yienghneix mwncupcup, heusuemsuem, lengqlengq roeg heuh va hom. Mbouj yungh gangj, gij goenglauz neix cungj dwg gvihaeuj gwnzbiengz daezguh “fung bya ganq ndoeng” aen leixniemh neix. Caem ndang youq gij bya raemx lumj fuk veh neix, gou ngeix, ndaw bya ndaw lueg cungj yienghneix ndei yawj lu, Raemxdiuqdat Dwzdenh mbouj rox engq geijlai gyaeundei ha. Gou caenh siengj vaiqdi mbin daengz gizde bae menhmenh cimyawj.

“Daengz lo!” Gou lij maezsisi youq gij gingjsaek gyaeundei song henz roen bya, sawqmwh dingqnyi miz vunz angq hemq, gou cij daj ndaw ngeixloekloek haenx ndiu gvaqma.

Va! Caen gyaeu raixcaix. Ngamq yamq haeuj bakdou gingjgih, gou couh deng gij gingjsaek saenzgeiz dangqnaj maezfiz lo. Diuz dah raezrangrang、sawdikdik ndeu ngutngut ngeungeu ciep daengz raemxdiuqdat. Gizgyae, raemxdiuqdat lumj vengq baengzcouz ndeu, daj bangxdat venj roengzdaeuj, hausaksak, bingzcubcub. Gou doq siengj daengz hot sei Lij Bwz sij haenx:“Ndit dak goengq bya hwnj mok aeuj, gaeuj gyae raemxgiengh venj gwnz dat. Raemxgip niucauj coh laj bag, lumjnaeuz dahmbwn doek tat neix.” Baihnaj, mbwn lamz, faex heu, raemx hau, caiq gya song hamq cab hai va hoengz va henj, gou lumj ndwn youq dangqnaj fuk veh valoekloek ndeu, roxnyinh ndang mbaeu simhai. Daih- swhyienz caen rox cauh mbwn cauh deih ho!

Byaij daengz sok dah, naengh hwnj gwnz saz, onjdubdub coh raemx- diuqdat vad bae. Gou sohsoh cimyawj raemxdiuqdat da mbouj rox yaep, caen lau laeuh bae saek giz yawj mbouj doh. Gyaegyae muengh bae, raemx- diuqdat gvangqmiengmieng, hausag- sag. Daj cungqgyang faen baenz song mbiengj, mbiengj haemq gvangq haenx dwg mbiengj Cungguek, heuhguh Raemxdiuqdat Dwzdenh; mbiengj haemq gaeb haenx dwg mbiengj Yeznanz, heuhguh Raemx- diuqdat Mbanjnyod. Song aen raemx- diuqdat lumj song cejnuengx nei, fwngz yien fwngz, diuqfoux ciengq go, doxhuz doxndei. Aensaz vad daengz henz dah Yeznanz, lij miz dahsau Yeznanz vaij ruz iq gvaqdaeuj, bak diemzsubsub heuh naeuz：“Daegbeix, cawx huq lwi? Miz gahfeih, miz raemxhom, miz haizgieg.” Hoeng gyoengq hek cungj simmaez ngonz- yawj raemxdiuqdat, mbouj miz saek boux leixlangh de. Dahsau cij gag riunyumj, youh vaij ruz bae lingh aen saz doisiu gij huqndei de lo.

Ciemhciemh, Aensaz yied vad yied gaenh, raemxdiuqdat yied bienq yied gvangq, lumjbaenz fanrok bieg- subsub he coh song mbiengj mbehai, cien fanh diuz mae baenz roix baenz roix duengq roengzdaeuj, lumj sei, lumj mba, ronghmyigmyig, unqnem- nem. Yaep he, aensaz vad daengz laj raemxdiuqdat, sing raemx rongx- rumrum, ndonj haeuj ndaw rwz, lumj byajraez daj gyae daengz gaenh ringx doxdaeuj, youh lumj fwnraq daj iq daengz hung doekbyogbyog. Raemx- naed couh lumj caw sinz nyawh mbin, mbaeqmbedmbed lumj faj fwngz lwgnding laxlumh fajnaj, hawj vunz roxnyinh liengzseuseu, seuqsadsad. Gou hixnaengz aj bak sup heiq, caih raemxmienz con haeuj conghbak, con haeuj conghndaeng, con roengz ndaw dungx, lumj dangzrwi, lumj laeuj- haeux. Gou fiz lo, ndang fouz- byangbyang lumj yaek mbin doxhwnj, caen siengj yienghneix cimq youq ndaw raemx seuq heiq sien neix, swiq cingh gij uqlah gwnzbiengz, cawzseuq gij nyapnyuk ndaw dungx……

Aensaz menhmenh dep hamq, byaij ok aensaz, riengz henz roen iq raemxdiuqdat baez yamq baez yamq coh gwnz dat bin bae. Daj baihgwnz yawj doxroengz, engq hawj vunz roxnyinh saenzgeiz fouzbeij. Raemx- diuqdat yienzlaiz dwg youz sam mbaek raemxlae gyoebbaenz. Raemxdah daj baihbaek lae daengz gizneix, bungq daengz aen dauj iq ndeu, raemxdah couh lumj duzlungz haenqrengz cung okbae, doq boekbyit daj gwnz dat rouxringx roengzdaeuj, yienghneix, baez mbaek baez mbaek biu daengz lajdah, couh bienqbaenz aen raemx- diuqdat youh gvangq youh sang ndeu lo. Dingq goengcauhruz naeuz, raemx- diuqdat sang daengz 70 geij mij, gvangq daengz 200 lai mij, haeujlaeg 60 lai mij. Gij raemxdah neix lai gvaq Raemxdiuqdat Vangzgojsu 3 boix. Moix bi daj 4 nyied daengz 11 nyied, raemxdah cungj rimmwdmwd, raemx- diuqdat cungj maenhrumrum, seiqgeiq hekyouz mbouj duenh.

Benz daengz dingjdat, gwnz dauj iq vunz bae vunz dauq, ndaetfwdfwd, gou roxnyinh geizheih couh caenx haeujbae yawj. Yienzlaiz dwg aen haw iq ndeu, diuz gai doxlienz henzguek Cungguek-Yeznanz haenx, song guek lwgminz cingq baij huq guh gaicawx. Faen mbouj ok byawz dwg vunz aen guek lawz, caenh faen miz bouxgai caeuq bouxcawx, caenh dingqnyi gij sing heuhgyaq caeuq hoizgyaq. Gyoengqvunz saeknaj hailangh lumj dujva, miz gangj miz riu. Gou deng gamjdoengh lo. Gizneix bya lienz bya, raemx lienz raemx, song guek doengz gwn diuz raemxdah, doengz aen raemxdiuqdat, song guek lwgminz doxhuz caemh youq, gij hoenzsiu hoenxciengq haenx gaenq lumj fwj- ndaem nei deng rumz ci deuz seuqsat. Gij saedceij huzndei caen baenz ho!

Gou siengj bienqbaenz naed raemx he, yungz haeuj ndaw raemx- diuqdat seuqsadsad neix.