Guh boux vunz ndawsim miz cawj ndeu couhdwg naeuz boux vunz ndeu mboujlwnh ndangdaej de youq giz- lawz, gizde miz mbouj miz vunz wnq youq, de cungj ndaej gag guenj ndei bonjfaenh, guh ndei bonjfaenh. Yiengh vunz neix bae daengz gizlawz cungj mbouj rox bae guh saeh rwix, dauqfanj guh maz saeh aiq aeu ndaej gyoengqvunz aeueiq, caemh- caiq ndaej daengz haenhdanq.

Youq aen goj iq baihgwnz haenx, Goengmax couhdwg boux vunz ndaw- sim miz cawj ndeu. De byaij roen ndaej nanz le, hozhawq dangqmaz, hoeng de cix mbouj sikhaek bae mbaet makfiengz henz roen mbouj miz bouxcawj hen haenx, de cingznyienh swhgeij hozhawq hix mbouj boihfamh daudwz bae mbaet makfiengz. Goeng- max ndaej yienghneix guh, dwg aenvih de gag guenj ndaej bonjfaenh, souj ndaej gvigawj, mbouj luenh bae guh saeh rwix. Hoeng, gij caeuq de doxfanj haenx dwg, gyoengq vunz ganjroen haenx yawjraen le makfiengz henz roen, couh mbouj siengjngeix saekdi, cungj doxciengj bae mbaet makfiengz daeuj gwn lo, gijmaz cungj mbouj guenj, couh lumj go makfiengz neix dwg swhgeij wngdang miz nei, swnh mbouj miz bouxcawj youq, couh mbaet lai di dem, lij doiq Goengmax naeuz vihmaz mbouj caez bae mbaet mak. Gyoengq vunz ganjroen neix dwg aenvih ndawsim mbouj guenj ndaej din fwngz swhgeij, mbouj souj gijliz cij doxciengj bae mbaet mak, yienghneix guh, danghnaeuz gyoengqde bae daengz gizlawz cungj aiq deng vunz ndaq, dam bienzngeiz lai, guh maz saeh aiq cungj mbouj baenz.

Raeuz daeuj naemjnaemj, gij hingzveiz Goengmax caeuq gyoengq vunz ganjroen haenx, dauqdaej dwg aenvih maz couh cauhbaenz yiengh- neix ne? Haemq ndaej yawj ok, Goengmax dwg aenvih guh saeh souj gijliz, ndawsim miz bouxcawj ndeu guenj ndaej swhgeij, mbouj bae luenh guh, gangj vwnzmingz、miz daudwz, couh baenzlawz cungj mbouj bae mbaet gij mak mbouj miz bouxcawj hen haenx. Gyoengq vunz ganjroen cix doxfanj.

Danghnaeuz doeklaeng miz bouxcawj gomakfiengz okdaeuj le, gezgoj yaek baenzlawz yiengh ne? Mbouj yungh gangj, Goengmax youq henz yietnaiq mbouj ngaiz bouxcawj gyaep ndaq. Hoeng, gyoengq vunz mbaet makfiengz gwn itdingh deng bouxcawj gomakfiengz gyaep, caemh- caiq fatseng doxdawz. Yienghneix mbouj dwg gij gizmen raeuz siengj yawjraen, fatseng doxdawz, cauhbaenz ngaekngeu, vunz caeuq vunz couh mbouj doxhuz, aen biengz raeuz hix nanz ndaej onjdingh.

Ndigah, raeuz wngdang guh boux vunz lumj Goengmax ndawsim miz bouxcawj ndeu, guenj ndei bonjfaenh, mbouj guh saeh yak. Danghnaeuz raeuz vunzvunz ndaej yienghneix guh, aen biengz raeuz yaek bienq ndaej engq gyaeundei. Vunz caeuq vunz huzndei caezyouq, maz cungj yaek bienq ndaej gyaeundei.

Raeuz caez guh boux vunz ndawsim miz cawj ba!