Youh dwg aen seizhah, gou nyoengx hai aen cueng, rog cueng gij ndit lwenqda raixcaix. Gou dingqnyi raqraq sing duzbid swenj caeuq gij heiqhom dujva cung haeuj ndaw fuengz daeuj. Gou mumjgyumq ngeix hwnj miz aen doxgaiq he, couh vaiq bae ndaw gvih cuengq saw fan yawj. Mbouj geijnanz, de yat haeuj lwgda gou daeuj, yienznaeuz gyuem le caengz saekcaij lauxgaeuq, hoeng vanzlij baenzneix ndeiyawj. Dauq- ngeix gij saeh gaxgonq roxnyinh baenzneix raeujrub, nanz ndaej gvej duenh.

Gou ndaej 11 bi seiz, daengz yienhsingz Minzcuz Cunghyoz bae doegsaw. Seizde, ndaw hagdangz geij aen ranzlaeuz gaeuqgeq, seiqhenz cungj dwg faex hung mwncup, caiqlij miz aen giuzcangz he. Geiqndaej seizhah haetde 10 diemjcung gvaq lo, sing doegsaw ndaw gyausiz lij goksadsad, bakdou cix yiengj hwnj sing “bauqgauq” gig mbouj habdangq daeuj. Miz boux nyezmbwk youh nyaenq youh lausemsem he menh- menh nyoengx hai aen dou, naj dingzlai cungj yo youq ndaw buhgoeb de. Ndaw gyausiz sikhaek riucumcum hwnjdaeuj, gij sing riu sangngaungau, de najmong dwk byaij coh diegnaengh swhgeij.

Lauxsae baez maenj sing ndeu, cij dawz gij sing cabluenh ndaw gyausiz naenx roengzbae dingzlai. “Yenz Cingvwnz, daeuj lingx ciengj!” Boux mbeiloet ndeu mauh coenz vah neix okdaeuj. Yenz Cingvwnz laih- naeuz dwg coenz vah byonj, lwgda cimyawj boux doengzhag mbeiloet neix. Byawz rox lauxsae caen cuengq roengz dug faenjbit gwnz fwngz de, faj fwngz de uq rim gij faenx faenjbit daj bonj gyauqanq baihlaj dawz ok bonj bizgibwnj ndeu ndenq hawj Yenz Cingvwnz. “Haggeiz neix mwngz cinbu gig daih,” lauxsae unqswnh dwk naeuz:“Baez daih’it gauj ndaej mingz daeuz ndaw ban raeuz. Baezlaeng lai roengz- rengz, caiq gaej daeuj gvaiz lo bw!” Yenz Cingvwnz faj naj hoengz- myanmyan, song fwngz ciep gvaq bizgibwnj, vaiq dawz daehsaw cuengq roengzdaeuj, naengh youq henz ndang gou.

Lwgda gou baez yawj bizgibwnj gwnz fwngz de, ndawsim gag ngeix “caen ndei”! Fungmienh bonj biz- gibwnj dwg baenzneix ndeiyawj, gwnzde benq diegnywj yawj mbouj daengz gyaeuj caeuq aen mbwnlamz doxgap, go byaeklinzgaeq seiqlengq diuqfoux, aen ciloek ndeu cap youq gizgyae menhmenh cienqdoengh. Fuk veh neix yienznaeuz mbouj miz saek aen ngumhngaeuz vunz, hoeng miz gyaq danci saekhoengzmaeq he dingz youq henzloh. Gwnz veh vanzlij miz souj sei ndeu, gou lij mbouj gib cungj yawj ndaej cingcuj.

Ndawsim gou saenqdoengh lo, gij maqmuengh yaepyet couh cungrim ukgyaeuj, lauxsae youq gwnz dangz gangj maz gou di ndeu cungj dingq mbouj haeuj rwz.

Roengzdangz le, Yenz Cingvwnz lizhai gyausiz, gou muengh dwk aen ngumhngaeuz de youq luengqroqranz daemx gyaeuj siusaet lo. Gou laeglemx byaij ma daengz aen diegnaengh. Gou yut dauq faj fwngz ngamq bae fan aen daehsaw de, ndaek gaemz ndaek gaemz ndoet gwn raemx, siengj lumz le swhgeij dwg boux vunz damsim ndeu. Hoeng, diuz lahlen aen daehsaw Yenz Cingvwnz lijdwg deng gou rag hai lo, bonj bizgibwnj haenx couh deng gou seuqset dwk vuenh aen “rongz” moq lo.

Gij angqwt ngamq youq ndawsim baez fit gvaqbae, gou cix naengh dwk lumj hangx deng cim camz nei, mboujyouz dwk buet ok gyausiz bae. Ndwn youq laj gofaex, dingqnyi duzbid gwnz faex swenj mbouj dingz, ndawsim gou cugciemh bingzdingh roengzdaeuj. Seizhaenx gou yawjraen Yenz Cingvwnz couh youq giz liz gou mbouj gyae haenx nyinhcaen boih saw ne. Gvaiq mbouj ndaej de gauj ndaej mingz daih’it ndaw ban dou, youq gwnz dangz yunghrengz, roengzdangz le lij laeglemx roengzrengz, hoeng gou moix baez yawj saw mbouj daengz geij faencung couh simfanz yaek siengj bae youz.

O! Gou couhdwg bouxcaeg, mboujdan dwg caeg bonj bizgibwnj, engq dwg caeg le aen mingzdaeuz caeuq gij gujli lauxsae hawj Yenz Cingvwnz bae. Mbouj, mbouj ndaej baenzneix guh, gou itdingh aeu doiq hawj de.

Cingq dang gou conghbak gag gangjdemhdemh seiz, boux doengzhag ndeu buet gvaqdaeuj, diemheiq baeg- fofo dwk naeuz:“Siuj Yenz Siuj Giz, vaiq ha, vaiq bae ma sousib doxgaiq sou ba! Boux doengzhag aen ban wnq gangjnaeuz lumz gonj gangbit de youq gyausiz dou, dawz doengjdaiz caeuq daehsaw sou bokluenh vanq youq gwnzdieg caez lo……” Dingq daengz neix, ndoksaen baihlaeng gou roxnyinh liengzsausau, mbouj deq de gangj sat, ngeuxgyaeuj couh vaiq coh gyausiz buet baema. Hoeng, Yenz Cingvwnz gaenq buet youq baihnaj gou lo, gou doq buet doq ngeix: Ciengeiz gaej deng de fatyienh.

Caj gou ganj daengz seiz, de gaenq bang gou sousib doxgaiq ndaw daehsaw ndaw doengjdaiz seuq lo. Gou vuengmuengz rag hai diuz lahlen daehsaw, bonj bizgibwnj haenx lij youq ndaw daehsaw gou, dandwg vuenh gizwnq cuengq lo. Gou ngiengxgyaeuj lausemsem yawj de, mbouj rox de yaek doiq gou gangj maz guh maz. Gou mbouj ndaejhoengq lai ngeix, gig vaiq dwk dawz bonj bizgibwnj yut okdaeuj, mbouj rox baenzlawz gangj, cij ndaej sing daemq dwk naeuz coenz “doiq mbouj hwnj lo”. De mbouj iet fwngz ciep aeu, cij doiq gou riuhihi naeuz:“Gawqyienz mwngz haengj, couh dawz bae yungh ba.” Fouq da hung de caeuq fouq da gou doxmuengh, hawj gou roxnyinh baenzneix raeujrub, baenzneix soeng- sup.

Rog cueng duzbid swenjrengreng, gij sing ndeidingq hawj vunz maez, sawqmwh fwt siengj hwnj coenz sei gwnz fungmienh bizgibwnj: Daeng- ngoenz roengz bya yawj lumj fouzcingz saed miz cingz, duzbid gwnz faex ndaw suen sing gok swenj mbouj dingz.