Golaux Dungcuz youq ranghdieg Mbanjdung henz Dahyungzgyangh Sanhgyangh Dungcuz Swciyen Guengjsae riuzcienz, dwg cungj hingzsik habciengq ndawbiengz lai sing bouh、mbouj yungh cijveih、mbouj yungh buenx ciengq、swhyienz hab sing ndeu. Cungj go neix bingzseiz youq gvaq ngoenzciet, doihgo sai mbwk naengh youq laeuzgyong roxnaeuz humx youq henz dongfeiz doiq ciengq, yungh go gangjok cingzgamj, haenh aenbiengz ndei.

“Haeux ciengx ndang, go ciengx sim” dwg coenz hauq vunz Dungcuz ciengzseiz gangj ndeu. Youq ranz Dungcuz, sing go dwg gij doih beksingq gvaq ndwenngoenz mbouj ndaej noix de. Laeuzgyong caijdangz miz go nauhdangz, gwn ngaiz miz go gingqlaeuj, couxhek miz go laengzroen, hoih fwen miz golaux Dungcuz……Youq Liuzcouh Sanh- gyangh Mbanjdung ranghdieg henz Dahyungzgyangh Meizlinz、Fuluz、Yangzhih daengj, swnjcienz go Dungcuz gaenq mauhgvaq 2500 bi lizsij, de mboujdan dwg cungj hingzsik yisuz ciengqgo ndeu, hix dwg swnjcienz gij vwnzva Dungcuz caeuq cingsaenz de. Bi 2006, “golaux Dungcuz” ndaej liedhaeuj Cungguek feihvuzciz vwnzva yizcanj mingzloeg, bi 2009 youh ndaej Lenzhozgoz Gyaugohvwnz Cujciz liedhaeuj vunz- loih feihvuzciz vwnzva yizcanj mingzloeg.

Vuz Cunhyez dahsau Sanh- gyangh doekseng youq ranz daihdaih cienz golaux Dungcuz ndeu, de daj iq da raen rwz dingq, riengz mehsimj Vuz Danvah bouxswnjcienz swcigih gaep haenx hag golaux Dungcuz. Vuz Cunhyez gyaezmaij ciengqgo haenx deihdeih bae camgya gak cungj vwnzyi doxdax Sanhgyangh caiqlij Liujcouh, de biujyienj gig ndei ndaej daengz lauxsae aen cungsim feihyiz louzsim. Ndaej gyoengqde haeuj- coengh, bi 2015 ndwen 10, Vuz Cunhyez baenz bouxswnjcienz feihyiz yienh gaep golaux Dungcuz, caemh- caiq byaij hwnj le diuzroen swnjcienz golaux Dungcuz.

“Aeu golaux Dungcuz cienz- ciengq daengz daengx guek gak dieg bae, ciengq ok douguek, hawj engq lai vunz roxnyinh gij ndei vwnzva Dungcuz, neix dwg aen simmuengh ciuhvunz gou.” Miz aen gietsim baenzneix, Vuz Cunhyez caeuq cejnuengx Dungcuz gapbaenz aen gyoebhab Sanhgyangh camgya gaiq daihcibsam CCTV canghgo bouxcoz densi daihciengj doxdax, aeu golaux Dungcuz nyuenz miz neix ciengq daengz Baekging.

Sanhgyangh Meizlinz Yangh youq henz Dahyungzgyangh haenx dwg dieggoek golaux Dungcuz, gizneix sai mbwk geq iq cungj rox ciengq go Dungcuz, hix gyaez ciengq go Dungcuz. Doiq vunzlai Meizlinz daeuj dangj, binaengz ngoenzciet caiq nauhyied mbouj dwg ndwen- cieng, cix dwg ciet golaux Dung- cuz liggaeuq ndwenngeih co’ngeih. Hangh minzsuz hozdung beksingq Dungcuz dangdieg gagfat cujciz neix miz 200 lai bi lizsij, daengz seizneix gaenq banh le 127 gaiq, dwg gij caidij rengzrwd swnjcienz golaux Dungcuz. Binaengz ndwenngeih co- ngeih, youq ndaw sing venz hap- rwenz, golaux Dungcuz mbouj dingz mbouj duenh, vunzlai Meizlinz yungh go gyau youx, lienz bouxhek daeuj yawjngonz hix deng gij heiqfaenh nauhyied neix yinxdawz, gyoengqde hix gyahaeuj daengz aendoih golaux bae lo.

“Youq Meizlinz Yangh, ciengq go Dungcuz dwg gij bingzciengz ndwenngoenz gyoengqvunz.”Aen Cungsim Baujhoh Caeuq Hwngfat Feihvuzciz Vwnzva Yizcanj Sanh- gyangh Dungcuz Swciyen cujyin Liuz Dwzyungz naeuz, gizneix moix aen Mbanjdung cungj miz aen doih caiqlij cibgeij aen doih golaux Dungcuz, gyoengqde aeu golaux Dungcuz ciengq ok mbanj, ciengq daengz gak aen gingjgih Sanhgyangh caiqlij ciengq ok Guengjsae. Meizlinz Yangh hix aenvih neix okmingz, ndaej bingz baenz “aen dieg yisuz vwnzva ndawbiengz Cungguek”.

“Baujlouz caeuq swnjcienz golaux Dungcuz doiq cienzmienh hezdiuz hwngfat ginghci ndawbiengz vwnzva Sanhgyangh miz yiyi youq- gaenj, Sanhgyangh youq baujhoh caeuq swnjcienz Dungcuz vwnzva guh le haujlai goengrengz.” Ciuq Liuz Dwzyungz gaisau, vih baujcang ngaenzcienz doh yungh daengz baujhoh caeuq swnjcienz golaux Dungcuz, cawz ceng’aeu guekgya caeuq swcigih binaengz 200 lai fanh maenz ngaenzcienz cienhangh, Sanhgyangh lij bued le bak lai fanh maenz yungh guh baujhoh feihyiz golaux Dungcuz. Linghvaih, Sanh- gyangh cwngfuj caeuq aen cungsim feihyiz lij youq Sanhgyangh cungsim siujyoz caeuq Meizlinz Yangh Sinhminz Cunghcai laebbaenz aen dieg swnjcienz feihyiz golaux Dung- cuz, doenggvaq langhbaij、swnjcienz、son’gyauq、hwnjdangz daengj fueng- sik gungganq bouxswnjcienz golaux Dungcuz. Daengz seizneix, Sanh- gyangh miz guekgya、 gih、 si、yienh seiq gaep bouxswnjcienz feihyiz golaux Dungcuz 16 boux. Golaux Dungcuz hix ciengzseiz ndaej camgya gak cungj doxdax caeuq yienjok Liujcouh、Guengjsae caiqlij daengx guek. Sanhgyangh lij banh ciet Dohyeh Dungcuz、ciet golaux Dungcuz daengj hozdung ndeiyawj dem, binaengz miz ca mbouj geijlai 500 fanh bouxhek bae daengz Sanhgyangh roxnyinh gij vwnzva ndei Dungcuz.