—— Geiqniemh Mauz Cwzdungh Doekseng 125 Hopbi

——纪念毛泽东诞辰125周年

1. Gamjdoengh Ik Fanh Vunz

Baihdoeng daengngoenz nding

Rumzcin raeujrubrub

Doenghgo mbaw mwncup

Va baenz yup angjhai

Ngeix mwngz Mauz Cwzdungh

Gamjdoengh ik fanh vunz

Mwngz goenglauz daemx mbwn

Lij daengh vunz gwn hoj

Ranz miz daemz miz naz

Mwngz cix ca ok rog

Bae biengj fwj biengj mok

Veq sok roen hawj vunz

Caux guh aen biengz moq

Dwgrengz rox geijlai

Mwngz nyaengqnyat daengz dai

Vih vunzlai gouz fuk

Fugsaeh gyoengq lwgminz

Mwngz cienz sim cienz eiq

Nyaengqfoedfoed baenz seiq

Mbouj ndaej soeng saek ngoenz

Fugsaeh hawj daengxcungq

Gungj hwet guh cwzvaiz

Yienghyiengh vih vunzlai

Daengz dai mbouj rox ienq

2. Huznamz Fwj Fanboek

Bi 1893

Huznamz fwj fanboek

Ndwen cibngeih ngeih roek

Mwngz seng doek gwnzbiengz

Gaeq haen coi vunz hwnq

Causanh hwnj daengngoenz

Ciuq diegdeih baihdoeng

Ciuq cien ndoeng fanh lueg

Laeng ranz goengq bya sang

Naj ranz daemz gvangqyub

Ndij ga roen raemhrub

Byaijhubhub okbae

Roeglwg langh baihrog

Daengzcog rox ak mbin

Mwngz youq Aivanjdingz

Ginglwnh saeh dienyah

Dangdaih boux yinghyungz

Song fwngz yeixvagvag

Dangdaih boux vunzak

Fangzyak lij yiep mwngz

Cangzsah raemx fubfab

Hwnzngoenz hap mbouj dingz

Dahsienghgyangh langh sinz

Duzromh mbin gvaengxgvax

3. Ciemq Dieg Laeb Cwng-

genz

Ruznding iqetet

Bet baih mbouj dep haenz

Gungcanjdangj laebbaenz

Vunzlai gaen mwngz byaij

Cibsam boux lwgcoz

Hag Ngozgoz gwzming

Banh bya sang dat lingq

Gaij minghyinh guek raeuz

Byaij haeuj dieg doekgungx

Dawz cungq dwk guenbing

Mwngz daiq gyoengq lwgminz

Ngauz ndaej rin bya doengh

Gyoq feiz mbouj hwnjda

Coemh haz dawz ndaej haenq

Ciuhsouh Gijyi hwnj

Gwzming swnj ndaej bae

Nem gyoengqvunz caemciek

Ciemq dieg laeb cwnggenz

Moeb hakdoj seiqhenz

Benz hwnj Cingjganghsanh

4. Mwngz Gaij Loeng Baenq

Cingq

Vih Gungcanj Gozci

Daeuj vix doeng yeix sae

Dingj humxhoenx haj baez

Lwed lae ndingmyanxmyanx

Saetbaih deuz couh deuz

Byoengq seiq diuz fungsienq

Lingzvuengz caet ngeih bienq

Vaq yiemj couh gvaqbae

Seiqlengq cungj byaj maenj

Rumz haenq youh fwn roengz

Raen hingzsi mbouj doengz

Mwngz gaij loeng baenq cingq

Gvaq Cizsuij seiq baez

Caez nyinhdingh mwngz ak

Bin bya nae hausak

Byaij boengznyag dieg dumz

Hwnj baihbaek doxhoih

Sam doih bing doxcomz

Giet ndaek ndeu mbouj honz

Mwngz gvai son dauhleix

5. Gap Bing Hoenx Yizbwnj

Yenzanh dieg ndei lai

Bouxgvai couh bae coh

Vihliux gouq guekcoj

Doxcanj bae ra mwngz

Sih’anh saeh bienq gvaq

Mwngz bae vaq bingzningz

Goz-Gung ndaej caemh sim

Gap bing hoenx Yizbwnj

Dingjhoenx youq raeblaeng

Caengzcaengz moeb vunzdig

Mwngz naemjciek daeklig

Vunzdig lau yaek dai

Vwnzyi codanzvei

Ndaej vunz haenh ndawsim

Hengz “song vih fuengcim”

Lwgminz caez yungjhu

Soemh fwnfwn rumzrumz

Vih vunz ciemq haeuj dieg

Hoenx mokmok mekmek

Bet bi cij ndaej hingz

6. Bak Fanh Bing Gvaq Dah

Guekgya caengz baenz yiengh

Beixnuengx gag doxceng

Lumj ciengj noh gwnz heng

Dangq gaeqseng doxdot

Cungzging gyuem mok hau

Mwngz mbouj lau caij haex

Roemxdai yaeng gueksaeh

Gouzmuengh ndaej hozbingz

Vunz mbouj gangj haeujceij

Mok deih laep daengz mbwn

Ciengj Gaisiz sim bwn

Mwngz haenqrengz bae dingj

Mwngz bouxdaeuz ok sing

Bak fanh bing gvaq dah

Biengz gwnzgwnz lajlaj

Geiz haj sing cap rim

7. Mwngz Gvai Gvaq Boux-

sien

Guek moq ngamq laebbaenz

Raeuz ndi ngaenz ndi ceij

Guh daeuz mbouj yungzheih

Suenq mwngz ceiq dwgrengz

Meijgoz hangz Cauzsenj

Mwngz nyienh ok bing bang

Mbouj goq gyadaej mbang

Bang beixnuengx youqgaenj

Yiemz ceih boux dam’aeu

Son raeuz guh vunz soh

Daz raeuz caux ngoenz moq

Bang bouxhoj bouxgungz

Guekgya gag guhcawj

Mbouj hawj vunz yien ndaeng

Dou riengz mwngz baihlaeng

Guh dajndaem dajcauh

Vunz mbouj daeuj famh gou

Dou mbouj bae nyex saeh

Mwngz son vunz gangj leix

Dou neix geiq ndawhoz

Yindu caeg daeuj famh

Suhlenz yamq haeuj din

Mwngz hauz mbouj louzcingz

Diuh bing couh bae hoenx

“Song dan aen sing ndeu”

Raeuz eu fwen angqhoh

Mbouj dwg fangzhwnzloq

Guekcoj caen guh baenz

Vwnzgwz roen mbouj soh

Byawz rox mwngz dungx haemz

Haeuxgok caengz ndaej daem

Byawz raen haeuxsan bieg

Mwngz daiqlingx gyoengqvunz

Bae caux gwn caux daenj

Doxgiet rengz cij haenq

Maenh’ak gvaq saenzsien

Duzyiuh mbin gvaengxgvax

Yaengx cax haep mbouj lau

Mbin daengz gwnz fwjhau

Mbouj lau duzguk yak

Mwngz gvai gvaq bouxsien

Lijlun cienz ok haij

Veh sam aen seiqgyaiq

Gaij canloz lajbiengz

Meij Suh song guek ak

Hengz yak ciengj guh daeuz

Mwngz yawj byot couh naeuz

Duzguk aeu ceij guh

8. Ciengxlwenx Geiq

Ndawsim

Bi 1976

Ndaundeiq doek roengzma

Dah hung lae raemxda

Roeg bya swenjvagvag

Mwngz yienznaeuz bae gyae

Dou seizseiz geiqniemh

Gingq mwngz sim mbouj bienq

Ciengxlwenx geiq ndawsim

Geiq mwngz yiengh daih’it

Gonj bit ak raiz sei

《Cinyenzcunh·Doek nae》

Lox vunz gyaez vunz maij

Geiq mwngz yiengh daihngeih

Vuenh diendeih vuenh biengz

Gaxgonq boux daeuzyiengz

Dou riengz mwngz haenq guh

Geiq mwngz yiengh daihsam

Hoenx baihnamz baihbaek

Gizgiz laeb goengdaek

Loh bonjsaek yinghyungz

Geiq mwngz yiengh daihseiq

Ceihleix ndei guekgya

Onjwt lumj goengq bya

Lengqlengq va caez angj

Geiq mwngz yiengh daihhaj

Dou ngah bit saw mwngz

Lumj mbin fungh foux lungz

Lumj rumz geuj diendeih