Gijmaz dwg lauxsaed soujsaenq? Gou nyinhnaeuz, lauxsaed soujsaenq couhdwg mboujguenj dwg doiq boux- laux roxnaeuz lwgnyez cungj mbouj yaeuh, cungj gangj saenqyungh, fanz saeh dapwngq gvaq vunz le couh itdingh bae guh baenz.

Vahsug gangj “vunz fouz saenq mbouj laeb, guek fouz saenq mbouj ak”. Daj lij iq mwhhaenx, raeuz bouxboux cungj dingqgangj gvaq aen goj 《Manaez Daeuj Lo》 neix. Ndaw aen goj neix dwg gangj boux lwgnyez he aenvih dawz yaeuh gyoengqvunz daeuj guh’angq, doeklaeng mbouj miz vunz caiq saenq de le, couh deng duz manaez haeb gwn lo.

Lauxsaed soujsaenq dwg gij gaenbonj an ndang laeb mingh boux- vunz raeuz. Gyoengqvunz moix ngoenz cungj aeu caeuq gak cungj gak yiengh vunz doxyouq. Danghnaeuz raeuz mbouj gangj saenqyungh, bouxboux raen le cungj deuz gyae’gyae bae. Raeuz couh bienqbaenz boux vunz dog, mbouj miz saek boux baengzyoux lo. Seizdaih bienqvaq baenz mbwn boek, doenghgij gangj saenqyungh vunz hungmbwk haenx lai raixcaix, couh lumj ndaundeiq gwnz mbwn deihraenraen, geq hix geq mbouj liux. Lumjbaenz ciuhgeq Sangh Yangh laeb faex ndaej saenq, ndaej daengz gyoengq vunzbiengz saenqnyinh le, swnhleih doihai fap moq de.

Cungguek moq laebbaenz le, Sung Ginglingz dang gozgyah fucujsiz, miz baez ndeu de bae ndaw guh- wzyen yawj lwgnyez, Sung Ginglingz naeuz, daengz 6 nyied 1 hauh wzdungzcez de lij daeuj yawj gyoengq lwgnyez neix dem. 6 nyied 1 hauh iekdingh seizgan daengz lo, hoeng gwnz mbwn doek fwn gig hung, lumj miz vunz aeu bat coux raemx daj gwnz mbwn dauj roengzdaeuj nei. Gyoengq lauxsae caeuq lwgnyez muengh rog ranz fwn doek baenz hung, nyinh- naeuz Sung Ginglingz haengjdingh mbouj daeuj lo. Sawqmwh, gij ngaeuzndang sug Sung Ginglingz okyienh lo. Gyoengqvunz raen le, cungj angq dwk swenj hwnjdaeuj, foux hwnjdaeuj lo. Doenghgij saeh- laeh neix gaenq sij baenz faenzcieng ndei riuzcienz roengzdaeuj. Doeng- gvaq gij saehlaeh neix, hawj raeuz rox daengz gangj saenqyungh dwg youq- gaenj dangqmaz.

Hoeng, youq ndaw swnghhoz raeuz, miz haujlai vunz vihliux gouz aeu gij leih’ik ceiq hung cihgeij couh dawz gij liengzsim bonjfaenh、dawz gij lauxsaed soujsaenq bonjndang vut roengz namh hawj ma gwn lo. Lumjbaenz “Sanhluz naijfaenj” saeh- gienh, haih dai geijlai vunz. Bineix gij “yi’myauz gyaj” saehgienh neix, cungj dwg gig haih vunz. Vihmaz baenz yienghneix? Couhdwg gij giyez neix mbouj gangj saenqyungh, cauh ok gij doxgaiq gyaj neix okdaeuj haih vunz. Vihmaz gyoengqvunz henz roen cungj bae mbaet makfiengz gaij hawq, Goengmax cungj mbouj bae. Aenvih Goengmax roxnyinh daengz, gag hanhhaed cihgeij couhdwg doiq gyoengqvunz gangj saenqyungh.

Gou youq Gvangjsih Minzcuz Dayoz beizyin gaenq miz 10 lai ngoenz lo. Baeznaengz cuengqhag bae fandangz gwn haeux, ndaw fandangz vunz gig lai, hoeng bouxboux cungj gag baizdoih bae aeu ngaiz, mbouj- guenj vunz baenzlawz lai, baenzlawz ndaet, cungj mbouj miz saek boux luenh cap doih. Bouxboux cungj dwg gwn geijlai couh aeu daek geijlai, mbouj haengj lw saekdi.

Lauxsaed soujsaenq dwg gij conzdungj meijdwz Cunghvaz raeuz, guekgya wnggai dingh ok gveihcangh cidu daeuj, hawj gyoengqvunz rox daengz lauxsaed soujsaenq miz fap ciuqguh. Doengzseiz, lij aeu dauqcawq haeujlaeg senhconz, hawj vunz cungj rox maz dwg lauxsaed soujsaenq.

Gyonj daeuj gangj, bouxvunz fouz saenq mbouj laeb, aen guek fouz saenq mbouj ak.