Bineix bi duzma,

Raeuz caezgya vuenheij,

Ndaej gvaq ndei saedceij,

Caez goengheij fatcaiz.

Bineix dwg manienz,

Va gomienz lai moq,

Giz youh bauq raemx mboq,

Cungj hohhoh fatcaiz.

Haibak daeuj goengheij,

Hoh raeuz ndaej fatcaiz,

Demsou cienz hix lai,

Riuvaivai gvaq ngoenz.

Goengheij coenz daih’it,

Hoh daihgit daihleih,

Bouxboux cungj vuenheij,

Lumj byaleix dingjdan.

Daihngeih youh goengheij,

Hoh sueng heij daengz dou,

Ngaenz aeu laep daeuj coux,

Cungj bouxboux vuenyungz.

Daihsam youh goengheij,

Saeceij foux hamdangz,

Ndwenngoenz gvaq ndaej rang,

Cungj angqyangz gvaqngoenz.

Goengheij coenz daihseiq,

Hoh guek engq fanzyungz,

Dangj bang raeuz duet gungz,

Cungj vunzvunz bienq fouq.

Goengheij coenz daihhaj,

Caez gwih max hwnj mbwn,

Saehnieb guh ndaej mwn,

Ndwn gwnznamh ndaej maenh.

Goengheij coenz daihloeg,

Roegenq daeuj guh saengz,

Hwnj ranz ndaej geij caengz,

Baengh dangj ndaej bienq fouq.

Daihcaet coenz goengheij,

Hoh bineix hwngvuengh,

Yinh ndei daj seiqfueng,

Bya caeuq luengq cungj riu.

Goengheij daihbet coenz,

Diuzdiuz roen cungj ndei,

Yienghyiengh guh hwnjbae,

Fukhwng meiz(miz) maqmuengh.

Goengheij coenz daihgouj,

Saedceij raeuj lumj feiz,

Lwgminz gvaq ndaej ndei,

Seizseiz geiq ndawsim.

Goengheij coenz daihcib,

Itcig ndaej daezsang,

Ndwenngoenz diemz lumj dangz,

Docih dangj aencingz.

Hoh daihgit daihleih,

Bouxboux ndaej vuenyungz,

Ngwzboengz bienqbaenz lungz,

Bouxgungz bienq bouxfouq.

Hoh seiqgeiq fatcaiz,

Sim vunz hai lumj va,

Caez fukhwng Cunghvaz,

Guekgya raeuz maenh’ak.

Hoh bineix ndeirad,

Ndwenngoenz ndat lumj feiz,

Bouxboux cungj fouqmeiz(miz),

Seiqgeiq mbouj you caiz.

Hoh vunzvunz souhlaux,

Faex nduk dauq biu ngaz,

Ndang cangq lumj dietfaz,

Song da lij caengz raiz.

Hoh cib cienz cib ndei,

Yienghyiengh ndaej fanzyungz,

Ndaej duet hoj duet gungz,

Cungj vuenyungz vaiqvued.

Cibbet coenz goengheij,

Ciengq daengz neix ngamq yuenz,

Yied ciengq sim yied vuen,

Sing fwen cuenz doh doengh.

Sing fwen cuenz doh doengh,

Saehnieb hoengh lumj feiz,

Yied gvaq yied ndaej ndei,

Diemz lumj ceiz caemj dangz.

Diemz lumj ceiz caemj dangz,

Docih dangj aencingz,

Cujsiz Siz Ginbingz,

Vih lwgminz mouz leih.

Dangj bang minz cauhfuk,

Lumj faex nduk biu ngaz,

Hoh doh raeuz guekgya,

Ndaej fanzvaz fouqgiengz.