Gij fwen Bouxcuengh Nazboh Yen daengz seizneix lij louzmiz gaeuqgeq caezcingj、lai cungj lai yiengh, miz bonjlaiz feihdauh, gij diuq youh unq youh ndeidingq, miz mingzdaeuz “gij gvang lai Gvangjsih Minzcuz yinhyoz” caeuq “bienqrin lix” fwen Bouxcuengh. Gij fwen neix doengjit heuhguh fwen Bouxcuengh Nazboh. 2006 nienz 5 nyied, fwen Bouxcuengh Nazboh ndaej Gozvuyen baecinj, ndaej liedhaeuj buek daih’it gozgyah feih vuzciz vwnzva yizcanj mingzloeg.

Fwen Bouxcuengh Nazboh goek gyae rag raez, lai cungj lai yiengh, neiyungz lailai, cujyau miz gij fwen gangjsaeh: Saenzvah cienzgangj、cuenh vunz、 vanzging bienqvaq、fwen saeh lizsij daengj; gij fwen haemzhoj: Gangj hojnanz、gangj apbik; gij fwen saehhong: Fanjyingj swyenz、swnghhoz ginglig; fwen danqhaenh siengjgyaez gyaeundei; fwen lijyiz daihvunz guhsaeh; fwen fungsug biujyienh conzdungj; fwen ranzmoq; gij fwen gingqlaeuj: Angq- hoh couxbawx haq lwg、lwg rim ndwen、ranzmoq guh baenz、ngoenz- seng bouxgeq. Hoeng ceiq lai dwg fwenyoux, bauhamz: Lwnhgangj cingzgamj、colienh、cingzlienz、cingzdaeuq、cingzdoj、dinghcingz、gangjdingh、danqhaenh、doxsiengj、itsim、cingzmbek、daengq、hojsik、dauqsiengj、raenmoq、cingz haemz- hoj、cingzdanq、cingz dox daeuq、doxbaengh daengz geq daengj 20 lai cungj neiyungz.

Geij bi neix daeuj, aenvih doenghdieg lixyouq、fazcanj minz- cuz vwnzva miz le gaijbienq haujlai, gij fuengsik cienzciep cingq siusaet、hozdung ciengzdeih ciemh iq、son gyauq duenh caengz daengj yienzaen, fwen Bouxcuengh Nazboh youq dangqnaj bungzdaengz cienzciep veizgih lo.

Daj fwen Bouxcuengh Nazboh liedhaeuj guekgya gaep feih vuzciz vwnzva yizcanj baujhoh mingzloeg liux le, vih doigvangq、dajcauh、senhconz binjbaiz vwnzva Boux- cuengh, Nazboh Yen iucingj ndaw gih rog gih mizgven lauxhangz、yozcej daengz Nazboh Yen diuyenz, vih minzcuz conzdungj vwnzva baujhoh caeuq fazcanj okmaeuz. Doengzseiz, cujciz ligliengh haeuj lajmbanj bae caijfungh, dajcauh sij ok buek cozbinj fanjyingj Bouxcuengh seiz- daih vwnzva daegsaek neix: Heiq、siujbinj、gangjciengq、foux、yinhyoz、vwnzyoz、meijsuz、suhfaz、ingjsiengq daengj youhsiu cozbinj. Mbangj cozbinj gonqlaeng youq ndaw guek rog guek vwnzva gyauhliuz hozdung ndawde ndaej ciengj. Lumj yienh neix aen dueuzhabciengq youq 2008 nienz camgya daengx guek CCTV bouxcoz gohsouj daciengj sai Gvangjsih fwnhgih habciengq seiz ndaej itdaengjciengj. 2011 nienz 5 nyied yienh neix Ginhciuh Gohvuj- donz camgya youq Sinhgyaboh gawjhengz gij habciengq doxdax seiz, seiqsingbouh yenzswnghdai habciengq Bouxcuengh 《Rap Aen Saedceij Ndei Bya Gvaq Bya》ndaej gimciengj. Vwnzva fwen Bouxcuengh Nazboh youq vwnzva daizheiq seiqgyaiq lohnaj okmingz.

Moix bi daengz cieng, Nazboh Yen lij baij “leizdaiz fwen”, youq yen vwnzva gvangjcangz cujciz eu fwen doxdax, yinx daengx yienh caeuq gij swngj si、yen henzgyawj haenx gyoengq canghfwen doengz daeuj doxdax, moix bi cungj doiok boux “fwenvuengz” moq, vih ginzcung dangdieg yienjok vwnzva cezmuz ndeiyawj, cauh’ok gij vwnzva fwnh- veiz fwen Bouxcuengh gig gwd.

2013 nienz daeuj, yienh neix aeu cienzciep vwnzva yisuz fwen Bouxcuengh guh cungdenj, miz giva、miz cungdenj guh vwnzva hawj vunzlai souh’ik beizyin hozdung, haeujlaeg bae haivat boux vwnzva yisuz ndawbiengz, daihdamj gung- ganq boux vwnzva ndawbiengz moq, hawj gij fwen ndei vwnzva Boux- cuengh daihdaih cienzciep. 5 nyied, yienh neix gawjbanh baenz le seizgan 15 ngoenz gij fwen Bouxcuengh beizyinbanh, miz daj daengx yienh 9 aen yangh cin 33 boux maij eu fwen haenx caeuq yen canjlanj cunghsinh 26 boux vwnzyi yenjyenz camgya beizyin yozsiz, dingq le “fwen vuengz” dangdieg Cinz Wnhlungz caeuq bouxcienzciep gozgyah feihyiz hanghmoeg Loz Gingjcauh hwnj- dangz.

Fwen daj ranzvunz Bouxcuengh daeuj, hoeng Nazboh cingq yungh gij swhdai moqsad haenx, vih baujhoh caeuq cienzciep fwen Bouxcuengh roengzrengz guh baenaj.