It. Ndiepgyaez sonhag Sawcuengh, dang boux lauxsae Sawcuengh ndei he

Gou dwg boux siujyoz yijvwnz lauxsae gaenq doekrag youq lajmbanj 23 bi, gou ciengzseiz cam gyoengq hagseng aen vwndiz yienghneix: Gij muzdiz hagsib mwngz dwg gijmaz, dwg vih bouxlawz daeuj hagsib? Aen vwndiz doxdoengz caemh baijyouq baihnaj gou: Mwngz vih gijmaz daeuj guhhong, mwngz vih byawz guhhong ne? Daeujdaengz Cuengh Gun song saw vah hagdangz, gou ndaej miznaj han, gou dwg vih ciepswnj minzcuz vwnzva daeuj guhhong, vih fazcanj Cuengh Gun song saw vah gyauyuz daeuj guhhong. Vahcuengh dwg gij vahcoj gou, ndigah gou doiq hagsib caeuq sonhag Sawcuengh roxnyinh gig miz yinxdaeuz, seizneix gou dawz youq Cuengh Gun song saw vah hagdangz cib bi lai daeuj gij guhfap haenx caeuq caezgya itheij gyauhliuz faenyiengj.

Gou dwg 2007 nienz 9 nyied diuh daengz Daibingz Cin Gingloz Siujyoz guhhong, caemh dwg daj bi haenx hainduj bungqdeng Sawcuengh, bungqdeng Cuengh Gun song saw vah sonhag, daengz seizneix gaenq miz cib bi lai seizgan. Youq ndaw cib bi neix, gou yawjraen swhgeij youq gwnz namhbiz Cuengh Gun song saw vah haenx mboujduenh majhung. Dauq- ngeix daj 2007 nienz lak yamqhaeuj Gingloz Siujyoz seiz, Cinz yaucangj couh doiq gou gangj:“Mwngz dwg boux yijvwnz lauxsae, daeujdaengz Gingloz Siujyoz couh aeu son Sawcuengh ha, caiqlij aeu son ndei Sawcuengh bw.” Dingq Cinz yaucangj yienghneix naeuz, ndaw sim gou baez doeksaet, gou doiq Sawcuengh bwxbadbad, yienghlawz son? Hoeng gou ngeix, gawqyienz daeujdaengz song saw vah hagdangz, couh aeu raphwnj aen yinvu Cuengh Gun song saw vah sonhag, neix dwg deuz mbouj gvaq. Yienghneix gou couh gaghag Sawcuengh hwnjdaeuj, gaen lauxsae doih wnq daj singmeh、yinhmeh、singdiuh hag hwnj. Seizhaenx, gou dwg son it nienzgaep, gou couh doq gaghag doq son hagseng, cengqgengz son ndaej hagseng it nienzgaep. Daengz 2008 nienz sujgyaj gou cij miz gihvei daengz Gvangjsih Sawcuengh Hagdangz camgya Swcigih Sawcuengh gihcuj cihsiz beizyin ndwen seizgan ndeu. Gihcujbanh beizyin dwg daj singmeh、yinhmeh、singdiuh hag hwnj, gij doegyaem singmeh、yinhmeh、 singdiuh youq gou daeuj beizyin gaxgonq cungj gihbwnj rox doeg liux, ndigah youq ndwen beizyin neix, moix haet doegsaw lingx doeg yinvu gou cungj ndaej miz faenh, beizyin sat le, gou lij ndaej daengz “youhsiu yozyenz” mingzdaeuz ndei. Daj seiz- haenx hwnj, gou couh gyaez Cuengh Gun song saw vah sonhag lo, caiq gyahwnj doeklaeng mboujduenh camgya gak cungj daengjgaep beizyin, song saw vah sonhag suijbingz ndaej mboujduenh daezsang, doiq song saw vah sonhag caemh miz itdingh yenzgiu. Youq ndaw 2010 nienz daengx gih Cuengh Gun song saw vah sonhag lunvwnz bingzbij gou sij miz song bien lunvwnz cungj ndaej ngeih daengjciengj, caiq ndaej fatbiuj youq gwnz 《Gvangjsih Minzcuz Bau》. Doeklaeng cijaeu gawjhengz gak cungj song saw vah sonhag hozdung doxdax gou cungj cizgiz camgya, doengh gyoengq daj Sawcuengh hagdangz okdaeuj haenx cungj boiqfug gou raixcaix. 2012 nienz daih’it baez camgya Sawcuengh daengjgaep gaujsi gou gauj ndaej cunggaep ietdaengj, ciepdaeuj daihngeih bi gou youh gauj ndaej gaugaep ietdaengj. Gou aeu ndaej daengz gij cingzcik song saw vah sonhag, dwg caeuq gou bonjfaenh gag roengzrengz、 gag gyaez hag faen mbouj hai. Youq bingzseiz sonhag, gou caemh aeu gij buengjyiengh swhgeij gujli hagseng daeuj hag Sawcuengh, miz gou mboujduenh gujli, ndaw ban haujlai hagseng hag Sawcuengh hwnjdaeuj gig miz rengz, neix sawj gou ndaw sim gig angq. Ndigah, yaek hawj hagseng hag ndei Sawcuengh, lauxsae caemh yaek sien aeu daiqdaeuz guh ndei, neix dwg gij dijvei son Sawcuengh gou.

Ngeih. Lingjdauj daiq- daeuz byaijgonq, daiq- doengh daengx hagdangz fazcanj

Daj 2008 nienz 9 nyied daengz seizneix, gou guh gij hong fuyaucangj hagdangz, cujyau guenj gij hong sonhag caeuq yozcenz gyauyuz. Gou siengj: Guh boux lingjdauj cujyau guenj sonhag he, bietdingh youq son- gyauq fuengmienh guh daengz lingx- daeuz mozfan cozyung, yienghneix cijndaej youq dangqnaj gyoengq lauxsae laebhwnj gij mingzmuengh, iugouz lauxsae guh daengz, swhgeij sien aeu guh daengz, guh gij yiengh- ndei, yienghneix cijndaej cujciz haiguh gak yiengh son’gyauq hoz- dung. Lumjbaenz: Moix aen haggeiz Sawcuengh dangzgoenghai、dangzguh- yiengh，gou cungj anbaiz bonjfaenh daih’it boux daeuj hwnjdangz, yienghneix doenghboux lauxsae bingzseiz mboujgamj hwnj Sawcuengh dangzgoenghai haenx hix mbouj gamj doidak gvaqbae lo.

Aeu siengj hawj Cuengh Gun song saw vah sonhag hagdangz haiguh ndaej miz sing miz saek, couh yaek diuhdoengh gij cizgizsing lauxsae, hawj dingzlai lauxsae hagseng cungj gyaez hag Sawcuengh. Ciepdaeuj couh yaek haiguh gij hozdung hingzsik lai yiengh, gikfat gij yinxdaeuz hagsib hagseng. Yaek aeu beizyangj hagseng miz hagsib daidu caeuq hagsib fuengfap ndei, hagdangz dou dwg yienghneix guh:

1.Moix bi gawjbanh gangj biucinj Vahcuengh gojgaeq doxdax、yungh Vahcuengh doegsaw doxdax hozdung、lauxsae hagseng Sawcuengh gihcuj cihsiz dingqsij doxdax daengj, doeng- gvaq gawjbanh doenghgij hozdung neix, sawj hagseng caencingq daej- niemh daengz minzcuz vwnzva Boux- cuengh raeuz, doengzseiz hix ndaej gikfat hagseng yinx hag Sawcuengh. Moix bi hagdangz raeuz camgya swcigih、si、yienh gak cungj hozdung caeuq Sawcuengh miz gvanhaeh haenx cungj ndaejdaengz gig ndei cingzcik, lumjbaenz: Siujhagseng gangj biucinj Vahcuengh gojgaeq doxdax、 Cuengh Gun song saw vah hagdangz siuj- hagseng caizyi doxdax、siujhagseng Vahcuengh cozvwnz doxdax、Cuengh Gun song saw vah lauxsae gyauyuz sonhag lunvwnz doxdax、Cuengh Gun song saw vah lauxsae guh gogen doxdax daengj.

2. Moix bi cungj cujciz haiguh Cuengh Gun song saw vah sonhag hozdung, coicaenh haiguh gij hong hagdangz raeuz gyauyuz sonhag. Lumjbaenz: Cizgiz damqlwnh yenzgiu Cuengh Gun song saw vah sonhag, cujyau haiguh yozcenzbanh vaiqvued Sawcuengh sonhag、Cuengh Gun nyinh saw sonhag、Cuengh Gun yawjdoeg sonhag vunqsik daengj dangzgoq yenzgiu. Dawz goqdangz sonhag yenzgiu dangguh yaubwnj yenzgiu gij cujyau neiyungz de, moix haggeiz cungj haiguh 3～5 baez lai caengzmienh sonhag yenzgiu, cujciz lauxsae camgya yienghsik lai yiengh goqdangz sonhag gvanhmoz hoz- dung.

3.Gaemndei sonhag cangzgveih guenjleix, dingh’ok Cuengh Gun song saw vah sonhag guhhong fueng’anq, laeb aen cienmonz lingjdauj siujcuj, dingh’ok daj beigo、 hwnjdangz、coz- yez、gaujsi、genjcaz yinxdoeg lai yiengh banhfap, baujcwng hong Cuengh Gun song saw vah sonhag ndaej swnhleih haiguh.

（caengz sat）