Youzcaz youq dieg baihbaek Gvangjsih ndaej gyoengqvunz gyaez- maij dangqmaz，haujlai vunz ngoenznaengz cungj gwn. Dangqnaj, youq yienh Bingzloz, gaenq miz diemq youzcaz hung iq bak lai aen, baez daengz banringzgvaq, diemq youzcaz ca mbouj lai aen aen naengh rim caez. Bingzseiz vunz Bingzloz banh hoengzsaeh seiz, ngoenzde banringzgvaq itdingh cingj gyoengq bouxhek, gwnz daizlaeuj bitdingh aeu miz youzcaz daihhek.

Bingzloz youzcaz gwnzdah faen- bouh gig gvangq, guhfap lai cungj lai yiengh. Daj seizgonq guh daeuj, yienznaeuz ligdaih cungj miz vunz gig miz daibyaujsing haenx guh ndaej ndei dangqmaz, hoeng gyoengqde mbouj itdingh dwg miz cienzciep gvanhaeh. Gij cienzciep youzcaz gwnzdah Bingzloz aeu bouxyouq- gwnzruz caeuq bouxyouqgwnzmboek guh gyaiq. Faen song cungj hingzsik, seizgonq bouxyouqgwnzruz、boux- youqgwnzmboek aeu guh youzcaz cawj gwn, lumj vunz Yauzcuz、 Bouxgun、bouxyouqgwnzruz, cungj miz gij dinfwngz guhcaz daihdaih cienzciep. Seizneix bouxyouqgwnzruz、bouxyouqgwnzmboek cungj aeu gij dinfwngz seiqdaih doxcienz neix hai diemq guh seng’eiq doengzseiz sou lwgsae. Cienzciep rangh daengz Bingzloz caeuq seiqhenz. Baenz le ranzranz hohhoh、bouxboux cungj gwn youzcaz gij sibgvenq haenx, engqlij daengz le ngoenznaengz mbouj miz “caz” couh mbouj vuen- heij cungj deihbouh neix bae.

Youzcaz gwnzdah dwg boux- youqgwnzruz bingzciengz gwndaenj aen sukingj ndeu, miz daegdiemj dogdaeg, de daiqbiuj le bouxyouq- gwnzruz gij vwnzva dajgwn caeuq sevei fazcanj miz canhgauj gyaciz gig youqgaenj. Aenvih seizneix gij daj- gwn bouxyouqgwnzruz gihbwnj deng gyoengq youqgwnzmboek doengzvaq, bouxyouqgwnzruz rox guh ok gij cingqhangq youzcaz gwnzdah gig noix. Gij vwnzva daegsaek dajgwn bouxyouqgwnzruz cingq siusaet vaiq dangqmaz. Ndigah, baujhoh boux- youqgwnzruz gij vwnzva dajgwn, aeu conzdungj vwnzva swhyenz caeuq yendai lijyouz mizyauq giethab hwnj- daeuj, hawj de bienqbaenz Bingzloz gij diemjrongh dajgwn miz daegsaek haenx.

Vunz Bingzloz dawz guh youzcaz heuhguh “dwk youzcaz”, aenvih “dwk” caen dwg dauq gunghsi youqgaenj ndeu. Aeu mbawcaz cimq hai, mbaw mbe hai, lauz okdaeuj caj. Yienzhaeuh, aeu hing、suenq、gyaeujcoeng、duhnamh ndip、mbawcaz ciuq gonq laeng cuengq haeuj rum rin roxnaeuz rum faex bae dub, daengz gij soiq haenx doxyungz. Gij liuh youzcaz dub ndei haenx sanq ok feih sien caz、 feih hing coeng. Gak cungj raemx boiqliuh doxyungz, caj caenh’itbouh yungzhab. Ciepdwk cauj liuh. Aeu raemx liuh youzcaz gangq hawq. Fan cauj gaeuq le, couh baenz gya haeuj youzduhnamh hab- liengh. Gij liuh cauj gvaq haenx, raemx gaenq noix dangqmaz, youz ndip baez roengz rek sikhaek caeuq de yungzhab, fat ok cungj hom dogdaeg ndeu. Caiq ciepdwk gya raemx cawj goenj, gajlaeng couh daih. Gij youzcaz daih liux le dwg “dangq caz it”, doengzseiz “dangq caz ngeih” gij ginglig gocwngz caeuq “dangq caz it” doengzyiengh. Ceiqlaeng, song dangq caz neix doengzcaez goenj mbat daihngeih.

Cawj youzcaz seizhaenx mbouj yungh cuengq gyu, aenvih gyu youq guhcaz seiz yingjyangj boiqliuh ok feih. Hoeng gwn youzcaz seiz couh aeu cuengq gyu lo, gyu ndaej hawj youzcaz demgya feihdauh engq lai yiengh.

Gwn youzcaz, co ndum hom saep, cimz gaemq iq ndeu, mizdi haemz caeuq manh, gij feihdauh damh ca ndawde youh miz feihdauh gwd youz. Vanj youzcaz ndei ndeu, gwn liux le haengjdingh miz van dauq hoz. Bingzloz youzcaz, aeu feih haemz、feih saep、feih van、feih hom doxgyaux, diuz ok gij feihdauh dogdaeg hawj vunz nanzlumz.

Yienznaeuz youzcaz dwg cujyau, hoeng lij aeu haeuxcaq、mazdanq、duhnamh、coeng、byaekhom guh dapboiq ceiq ginghdenj, daek youzcaz liux, aeu haeuxcaq、mazdanq、duhnamh、coeng、byaekhom, cuengq haeuj ndaw youzcaz ndatfwdfwd haenx bae, gij hom youzcaz gyuem- luemz youq ndaw hoengheiq caez! Yienghneix guhlawz mbouj hawj vunz sikhaek dawz vanj hwnjdaeuj ndoet lo!

Gwn le geij vanj youzcaz cungj lij roxnyinh mbouj gvaqyinx, mwngz lij ndaej gwn gaiq faengx ndeu、roxnaeuz gaiq biek ndeu roxnaeuz gau lauxbaeg roxnaeuz gij gau wnq, caiq aeu deb faenjcauj roxnaeuz doengh neix, caiq roxnaeuz dangq di faenj caeuq byaekheu, caenh hawj vunz cupbak lai lo: Cungj saedceij neix caen ndei dahraix lo!

Youq haujlai youzcaz ndawde, Bingzloz youzcaz gwnzdah aenvih feihdauh dogdaeg hawj vunz haenh dangqmaz bae. Dangqnaj Bingzloz youzcaz gaenq sinhcingj ndaej le Gvangjsih feih vuzciz vwnzva yizcanj, Bingzloz youzcaz gwnzdah dangguh Gvangjsih vwnzva yizcanj cungdenj baujhoh doiqsiengq.