Youq Nanzdanh Yen dieg- comzyouq Bwzguyauz(Yauzcuz aen nga ndeu), baeznaengz daengz hozdung angqhoh ngoenzciet hung roxnaeuz ngoenz Bwzguyauz bouxgeq gvaqseiq roengznamh, cungj ndaej raen gij cinyungz sekda caez roq geijcib aen、bak geij aen nyenz. Youq ndaw neix, miz bouxsai cungnienz din fwngz rengzrwd ndeu, fwngz ndeu gaem gaiq faexmbaenq roq gyong, mienh roq mienh diuqfoux. De dwg roq aen gyonglingz ndeu, gyonglingz dwg aen gyong cijveih, geijcib aen、caiqlij bak geij aen nyenz henzgyawj cungj dingq gij sing cijveih gyonglingz. Bouxsai cungnienz ciuqei gij dungcoz duzlingz baenq diuq, ciengzseiz yinx ndaej bouxyawj dopfwngz nyauznyauz.

Bouxvunz ndaej vunz angqcoux neix, coh heuh Liz Fanghcaiz,Yauz- cuz(Bwzguyauz), gauhcungh bizyez, ranz youq Nanzdanh Yen Lijhuz Yauzcuz Yangh Vaizlij Cunh. Gij foux de diuq dwg fouxgyonglingz. Cienz- naeuz doenghbaez, bouxgeq Bwz- guyauz ndeu youq ndaw runghbya roq gyong, gyaep gyoengq lingz daeuj caeg gwn duhnaz haenx. Ngamq hainduj, gyoengq lingz ngaiz hwk dwk mbouj gamj roengz bya daeuj. Gvaqlaeng, duzlingz manzgyaengj haenx domh bouxgeq ninz ndaek le, caegcaeg loengh roq aen gyong. Bouxgeq ndiu daeuj le, yawjraen duzlingz roq gyong roxnyinh geizheih, yawj ha yawj ha, gag ngaiz gij dungcoz duzlingz mienh roq gyong mienh diuqfoux yinxdawz. Yienghneix, de laeglemx geiq le doenghgij dungcoz neix, dauq ranz le couh ciuqei lienh, fouxgyonglingz dajneix couh miz lo.

Bwzguyauz miz aen sibgvenq baenzneix ndeu: Youq mwh bouxgeq gvaqseiq roengznamh, cungj aeu roq haujlai aen nyenz, doenghgij nyenz neix cungj aeu dingq aen gyonglingz baij youq cungqgyang haenx cijveih. Boux diuq fouxgyonglingz, fwngz gaem song gaiq faexmbaenq roq gyong daih’iek 30 lizmij raez, naeb song ga loq goz, song gaiq faex roq gyong, gaiq faex ndaw fwngz miz gvilwd daj dingjgyaeuj、song rwz、song mbaq、bangqhung、bangqiq daengj dieg doxfanj roq, rox swix rox gvaz hop aen gyonglingz baenq gien. Foux mbat ndeu roq mbat ndeu, foux roq doxlwnz guh. Gij dungcoz bouxdiuqfoux, lumj duzlingz ra gwn benz faex、mbaet mak、youq gyang bya yatdiuq, hix lumj bouxguhnaz vad faggvak、vat namh、ndaem naz daengj, gig miz yinx. Liz Fanghcaiz daj iq dwggyaez gyaez doengh, daj 10 bi hainduj, baeznaengz miz ciengzhab baenzneix, de couh gag bae mienh yawj mienh hag. Mbangj bouxgeq ndaw cug raen de baenzneix gyaezmaij, couh son de lo, de hix cinbu riengjvaiq. Nanz le, de couh roq ndaej diuq ndaej lumj lo. De mboujdan gyonglingz roq ndaej ndei, fouxgyonglingz diuq ndaej ndei, caemhcaiq gyongdoengz faexcuk、aennyenz hix roq ndaej ndei.

Daj seizlawz rap hwnj mbaq rapnaek roq gyonglingz diuq foux- gyonglingz neix, Liz Fanghcaiz bonjfaenh hix geiq mbouj cingcuj lo. De geiq ndaej, bi 2001, de riengz doih camgya ciengj doxdax “Cunghvaz gyong foux doxdax”, fouxgyonglingz de biujyienj haenx ndaej ciengjgim. Bi 2002, Aen Swnghdai Bozvuzgvanj Bwzguyauz Cungguek youq mbanjranz de Vaizlij Cunh laebbaenz le, de ndaej minghlingh gyoeblaeb aen doih biuj- yienj minzcuz fungcingz Bwzguyauz Vaizlij Cunh, caemhcaiq son’gyauq fap roq gyongdoengz faexcuk、nyenz、gyonglingz, caeuq dinfwngz diuq fouxgyonglingz hawj bouxdoih. Bi 2003 ndwen 4, bozvuzgvanj laebbaenz hainduj yungh. Youq gwnz aen yizsi hai gvanj, aen doih biujyienj de son haenx cungj hwnj daiz biujyienj. Gyonglingz de roq haenx, sing gyong goksad, vaiq menh mingzbeg. Foux- gyonglingz de diuq haenx, dungcoz miz yinx, giengiengz rengzrwd, gij dungcoz de ciuqei duzlingz caen lumjlili, ndaej hawj vunz haenh. Biujyienj sat le, bouxyawj laj daiz dopfwngz nyauznyauz, mizgven lingj- dauj gaep baihgwnz geiq ndaej aen coh de caeuq bouxvunz neix lo. Dajneix de caeuq aen doih biujyienj de ciengzseiz ndaej hwnj aen daizheiq yienh、si、swcigih gaep hozdung angqhoh ngoenzciet, caeuq bae Baekging、Sanghaij、Gveiyangz、Cwngzduh、Sih- anh、 Gvangjcouh caeuq Yanghgangj daengj hawsingz hung sengj rog biujyienj dem.

Bi 2008 ndwen 4 ngoenz 9 daengz ndwen 5 ngoenz 9, doiq Liz Fanghcaiz boux youq ndaw runghbya neix daeuj gangj, cawqdingh dwg mboengq nanzlumz ndeu. Seizhaenx, wngq Aen Bozvuzgvanj Minzcuz Cungguek iucingj, aen doih biujyienj minzcuz fungcingz Bwzguyauz bae daengz Fazgoz camgya “Cungguek lai saek youq Fazgoz” yienjok hozdung youz Aen Bozvuzgvanj Minzcuz Cung- guek youq Fazgoz Bahliz banh ndwen ndeu haenx. Aen doih biujyienj Liz Fanghcaiz, ngoenznaengz biujyienj song ciengz, biujyienj Bwzguyauz fouxaennyenz、fouxgyonglingz、foux- ndangdaenj、doxdax dwk gyangq、boq gaeuvaiz daengj, hawj gyoengq baengzyoux Fazgoz haeuj gyawj yawj- ngonz daengz gij vwnzva aennyenz、gij vwnzva ndangdaenj、gij vwnzva dwk gyangq、gij vwnzva fwen、gij vwnzva baenzranz Bwzguyauz cauhnduj gaeuqgeq youh lai saek lai yiengh, caeuq dwknyaen、doj roeg daengj minzsuz fungcingz neix. Biujyienj ndeiyawj, ndaej daengz vunzlai haenh.

Liz Fanghcaiz naemj mbouj daengz, fouxgyonglingz de gyaezmaij caemhcaiq vih de ok haujlai goengrengz haenx, bi 2012、bi 2014 faenbied ndaej liedhaeuj sengj gaep、guekgya gaep feihvuzciz vwnzva yizcanj baujhoh mingzloeg, de bonj- faenh hix ndaej dingh baenz boux- swnjcienz fouxgyonglingz sengj gaep、guekgya gaep.

Liz Fanghcaiz rox, cijmiz mbouj- duenh dawz gij dinfwngz bonjfaenh rox haenx mbouj louz saekdi cienz hawj bouxcoz nyezrauh minzcuz bonjfaenh, cijndaej doiq ndaej hwnj aen mingz- daeuz bouxswnjcienz guekgya gaep neix. De baenzneix naemj, engq dwg baenzneix guh. Bi 2005 doxdaeuj, Liz Fanghcaiz mboujdan yungh gij ciengzhab angqhoh ngoenzciet hoz- dung baizlienh, fwngz gaem fwngz son bouxcoz nyezrauh Bwzguyauz doiq neix miz yinx haenx, lij seiz mbouj seiz bae daengz Lijhuz Yauzcuz Yangh Cungsim Siujyoz、Yen Cizgyau Cung- sim caeuq Cizyez Gisuz Yozyen ndaw si miz hagseng Bwzguyauz doegsaw haenx bae cienz dinfwngz. Hagseng Bwzguyauz ndaej hawj de son gvaq haenx daengz 220 lai vunzbaez.

Liz Fanghcaiz naeuz, hag foux- gyonglingz, hag rox roq rox diuq mbouj hoj, hoj dwg aeu gaemdawz vaiq menh caeuq ciuqei gij saenzcingz dungcoz duzlingz. Haujlai bouxhag ciuqei dungcoz, dan lumj yiengh mbouj miz saenzcingz, mbouj gaemdawz gij saenzcingz de. Liz Fanghcaiz ndaeng- gon naeuz, daengz seizneix, hagseng de lij caengz miz saek boux ak gvaq de. Doiqneix, de miz di gaenj caeuq youheiq.

Liz Fanghcaiz bineix gaenq ndaej 54 bi neix naeuz, de lij laebdaeb roengzrengz, aeu fouxgyonglingz hangh guekgya gaep feihvuzciz vwnzva yizcanj neix swnjcienz ndei, caemh- caiq fatyiengz ndei bae.