Gangj daengz gyau haeuxliengz, seizneix haujlai vunzcoz mbouj rox dwg maz saeh lo. Mboujgvaq, youq mwh ngamq faen naz roengz ranz itcig daengz bi 2006, de couhdwg daengx bi gienh saeh gig youqgaenj doengh ranz bouxdajndaem ndeu. Ginglig gvaq gienh saeh neix, hawj gou rox boux- dajndaem doiq guekgya gungyen gig hungloet ha! Sij bien faenzcieng neix couhdwg hawj vunzbiengz gaej lumz duenh lizsij neix……

Geiq ndaej dwg bi 1980 mwh gou ngamq bae gunghse doeg cuhcungh swnghcanjdui dag reihnaz roengz ranz. Daj bide hwnj, baez cuengq sujgyaj maranz cawzhai aeu gvej haeux ndaem naz le, vanzlij aeu guh gienh saeh ndeu, gienh saeh neix couhdwg caeuq bohmeh bae liengzsoj gyau haeux- liengz. Mwhde haeuxliengz hix heuh- guh “haeuxgyaezguek”. “Angqyangz bae gyau haeuxgyaezguek” coenz vah riuz gwnzbiengz neix couhdwg ok mwhde daeuj. Yienznaeuz gek ndaej geijcib bi, hoeng gij ginglig gyau haeuxliengz baeznduj hawj gou nanz ndaej lumz ha.

Binaengz hahsou gvaq le, couh miz ganbu daj baihgwnz roengz mbanj daeuj gyaep vunz dawz haeuxliengz bae liengzsoj gyau. Aenvih daxboh dwg dang duicangj, ndigah, ranz gou caeuq gvaenghgyawj geij ranz beix- nuengx cungj ngaiz daiqdaeuz dawz haeuxliengz bae gyau. Youq neix cab gangj geij coenz, mwhde gou lij caengz roxyiuj geijlai, mbouj rox vihmaz sinhoj ndaem naz lij ngaiz gyau baenzlai haeuxgok hawj liengzsoj. Gvaqlaeng dingq bouxlaux gangj cij rox: Laxlawz reihnaz lijdwg gvidauq cizdij, yienznaeuz faen roengz ranz hawj gag ndaem, hoeng faenh haeux- liengz gaxgonq youz swnghcanjdui rap dawz haenx couh cienj hawj gak ranz bae faen dawz lo. Geiq ndaej moux nazraemx daengx bi aeu gyau bak gaen haeuxgok, gwqhaenx ranz gou faen ndaej 6 moux nazraemx couh aeu dawz 600 gaen haeuxliengz. Gyau haeuxliengz lij miz aen gvigawj ndeu: Mboujlwnh bide dwg haeux baenzlai roxnaeuz canjlieng gemjnoix, cungj aeu ciuq aen gaensoq de bae gyau, saedcaih gyau mbouj ok haeuxgok, couh aeu ngaenzhau bae dingjlawh, danghnaeuz mwngz geng mbouj gyau haeuxliengz, faenh naz mwngz couh ngaiz siujdui sou dauq ne, mboujgvaq cungj cingzgvang neix langh dieg ranzmbanj gou mbouj miz gvaq.

Yaek daengz ngoenz gyau haeux- liengz, bohmeh cungj rox daengq dou geij beixnuengx dak haeux aeu haeujsim song gienh saeh: It dwg aeu dak ndaej doh sauj; ngeih dwg mwh yaek cang daeh aeu beiz ndaej seuqcingh. Guh ndei song gienh saeh neix le, dou dawz gij haeuxliengz faenbied cang roengz geij aen daehndaij bae cug maenh baij ndei. Gangj hwnjdaeuj couhdwg dawz gij haeuxgok ceiq ndei de gyau hawj guekgya, louz gij haeux cab bauz roengzdaeuj hawj ranzvunz gag gwn.

Daengz ngoenz gyau haeuxliengz lo. Haetromh daxboh couh langj ndei civaiz, daengx ranz vunz doxram gij daehndaij coux haeuxliengz haenx baij ndei gwnz ci, caiq riengz ci daiq di cuk caeuq bwh di nywj couh gyaep vaiz ganj bae liengzsoj lo.

Liengzsoj liz ranzmbanj miz 5 goengleix lai, dieg de hix dwg dieg okhaw gvaenghgyawj dou. Cawzhai liengzsoj, gwnz haw lij miz gung- siuhse、veiswnghyen、sizbinjcuj dem. Danghyenz lo, mwhde gou ceng riengz bouxlaux bae gyau haeuxliengz, cujyau dwg miz gihvei youq gwnz haw gwn vanj faenjdang ndeu, couhcinj vanj faenjdang haenx mbouj ndaej dwk noh.

Civaiz byaij miz aen lai cung- daeuz couh daengz liengzsoj lo. Laihnaeuz okdaeuj caeux ndaej baiz daengz nduj, siengj mbouj daengz gaenq miz haujlai vunz baiz gaxgonq lo, yawj daeuj daengz banringz roengzban lij mbouj itdingh caengh daengz ranz gou ne.

Daxboh daengq gou caeuq daxmeh yawj ndei civaiz le okbae byaij hop ndeu couh dauq lo.“Mbauq ‘seiq da’ neix ceiq yak gangj, ngoenzneix bungz deng de daeuj caengh haeux dwg mingh haemz ha!” Daxboh ngauzgyaeuj naeuz.

Laxlawz daxboh daengz liengzsoj gienh saeh daih’it couhdwg bae cazyawj dwg byawz guh boux caengh haeux, yawj daeuj daxboh gaxgonq ngaiz daegmbauq daiq nganxciuq neix “ndaw gyaeqgaeq leh ndok” lai baez lo. Dwg ha! Bouxdajndaem sinhoj dak ndit daeuj gyau haeuxliengz, lienz amq raemx he hix mbouj ndaej gwn, gyoengqde ceiq lau dwg couhcinj gij haeuxliengz mwngz doh sauj doh seuq, lij ngaiz bouxsouhaeuj yiemz neix yiemz haenx, heuh mwngz dak gvaq beiz gvaq.

Dahraix! Mbauq “seiq da” neix “yiemzgek” gvaqbouh lo, yaep ndeu naeuz haeux neix mbouj doh sauj, yaep ndeu naeuz haeux haenx cab haeuxbauz. Bungz daengz gij vunz neix, boux daeuj gyau haeuxliengz caen dwg saej humz mbouj rox gaeu ha, cijndei lauxlaux saedsaed dawz gij haeuxliengz bonjfaenh bae dak gvaq roxnaeuz beiz gvaq lo. Gou caen rwz dingqnyi miz vunz hozndat nam naeuz:“Lwgmbauq neix mbouj guh gvaq hongnaz, de mbouj rox daehhaeux mbouj gojnaengz mbouj cab geij naed haeuxbauz!”

Baiz bae baiz dauq, mwh yaek lwnz daengz ranz gou youh bungz daengz bouxsouhaeux banringz roengzban lo. Aiya! Caen dwg daeuj mbouj deng seiz ha! Daxboh naeuz:“Mbouj youqgaenj, fanjcingq cungj dwg lauq bae ngoenz seizgan ndeu, bouxde dingz roengzdaeuj gwn haeux ninzringz, dou hix ra dieg langh vaiz yietbaeg.” Daxboh caeuq daxmeh cungj laihnaeuz seizhah gwn faenj dingj mbouj ndaej hozhawq, nyienh gwn cuk guh ringz, hawj gou song gak ngaenz gag bae gwn faenjdang. Gvaqlaeng gou cij rox, gizsaed dwg songde sij mbouj ndaej sai geij gak ngaenz!

Lajbyonghngoenz hwnjban mbouj nanz couh lwnz daengz ranz gou caengh haeux lo. Cij raen mbauq “seiq da” fwngzgvaz dawz gonj diet miz diuz cauz ndeu, baez mbongq haeuj daehndaij bae youh beng okdaeuj, fwngzswix daj diuz cauz nap naed haeuxgok haeuj ndaw bak bae geux, youh dauj gij haeuxgok youq aifwngz cimyawj, geij aen daehndaij cungj dwg yienghneix genjcaz. Baez raen daengz de yienghneix guh, dou sikhaek sim diuqbubbub hwnjdaeuj, ndawsim caen maqmuengh goengmbwn baujyouh hawj faenh haeuxliengz ranz gou ndaej gvaq gvanh ha!

“Gij haeux neix dwg doh sauj! Hoeng, cab miz haeuxbauz! Dawz bae gvaq gujfunghgih!” Boihseiz lo! Caen dwg yied lau yied raen fangz lo, mingzmingz haemhlwenz dou geij beixnuengx dawz gij haeux neix beiz daengz fwngz yaek hwnj bop, seizneix lij naeuz cab haeuxbauz. Dou lumj bouxngoemx gwn vangzlenz nei, cijndei lumj gij vunz baiz dangqnaj lauxsaed ram daengz henz bae gvaq gujfunghgih.

Aen gujfunghgih liengzsoj dwg yungh dienh, baez hai gaihgvanh vunz ndwn gyawj bakrumz lumj yaek deng ci biu ne. Roxnaeuz daxboh yungh gvaq aen gujfunghgih neix lai baez le yienj ndaej gig miz “gingniemh”, de heuh gou caeuq daxmeh youq byairumz dauj gij haeuxgok okdaeuj, caiq yungh fagcanj fanbog geij baez le, caiq bae cingj mbauq “seiq da” daeuj genjcaz. Siengj mbouj daengz gwq- haenx mbauq “seiq da” lienz yawj cungj mbouj yawj couh vadfwngz naeuz “ndaej lo! Dawz daeuj gvaq caengh”. Dingq de baenzneix gangj, dou cungj sim’onj roengzdaeuj caiq cang daeh. Gizsaed hix mbouj miz maz haeuxbauz ha, begbeg ngaiz sai rengz mbat ndeu. Daxboh naeuz gaxgonq miz vunz mbouj rox yungh aen gujfunghgih neix, rap haeux ndeu deng biu bae baenz dingz bae!

Gvaq caengh le, gij gaensoq haeuxliengz ranz gou lij lai okdaeuj geijcib gaen ne. Vah youh gangj doxdauq, binaengz vunzmbanj gyau haeuxliengz lau noix mbouj lau lai. Baez gvaq caengh noix liengz gvaqlaeng lij ngaiz dawz bae bouj. Gij gaensoq haeuxliengz lai okdaeuj suenq haeuj guekgya dungjgouliengz, geiqndaej moix gaen suenq 9 faen ngaenz hawj cienz dauq.

Caiq ram haeux hwnj gwnz dingj mojhaeux sang bae dauj, daengz neix gienh saeh gyau haeuxliengz suenq gatsat lo, ciuq bouxmbanj gangj, gyau sat haeuxliengz le gwn miuzcaetnyied cij gwn ndaej an’onj.

Mwh naengh civaiz maranz, daj gij vah daxboh caeuq daxmeh, dingq ndaej ok songde gig hozhaenz doengh- boux gwn haeux guekgya gwnz haw, naeuz gyoengqde mbouj yungh dak ndit rwed fwn lij ndaej lingx ngaenz- ndwen, gig maqmuengh gou gvaqlaeng hix dwg cungj vunz neix. Dwg ha! Gwqhaenx dang bouxdajndaem sinhoj lai lo.

Gvaqlaeng, gou okrog doegsaw, geij boux nuengx majhung le youh lwnz daengz gyoengqde caeuq bohmeh dawz haeuxliengz bae gyau lo. Dingq gyoengqde lwnhnaeuz, daj mbauq “seiq da” diuh bae diegwnq le, gij saeh haeuxliengz “mbouj habgek” noix raen lo, liengzsoj gizde lij bwh miz raemxcaz hawj boux gyau haeux- liengz gwn dem. Gvaqlaeng, geij beixnuengx dou laebdaeb okrog gunghcoz, aenvih faenh nazraemx dou deng gemj okbae, haeuxliengz ranz gou hix noix dawz lo. Geiq ndaej bi 2006, baihgwnz fodfwd naeuz mbouj caiq aeu gyau haeuxliengz lo, dingq daengz aen siusik neix, vunzmbanj mbouj rox geijlai angqyangz ha.

Hix dwg bide hwnj, guekgya laebdaeb dingh ok haujlai cwngcwz hawj bouxdajndaem ndaej ik, lumj gij boujdiep cehhaeux、gij boujdiep ndaem naz、haeuj hag doegsaw daengz cuhcungh mbouj aeu ngaenz、ranz- yiemj gaijcau、boux camgya nungzhoz ywbingh ndaej bauqsiu mbangj、bouxlaux mauhgvaq 60 bi ndaej lingx di ngaenzciengxlaux doengh gijneix. Daegbied dwg daj bi 2015 hwnj, guekgya youq lajmbanj haenq guh Cingcinj Bangcoengh doenghgij ranzhoj ndaej duet gungz bienq fouq. Gij cwngcwz neix hawj vunzmbanj caencingq roxnyinh daengz bonjfaenh dwg bouxcawj guekgya, roxnyinh daengz dangj caeuq cwngfuj ndiep- gyaez bouxdajndaem.

Dwg ha! Mwh guekgya lij gun- nanz, bouxdajndaem mbouj ienq mbouj hoij gyau haeuxliengz hawj guekgya; seizneix guekgya fouqgiengz le fanj gvaqdaeuj bangcoengh doengh bouxdajndaem, siengj banhfap hawj saedceij gyoengqde gvaq ndaej engq vuenyungz an’onj. Seizneix siengj doxdauq, Cunghvaz Minzcuz daj ciuhgeq gvaqdaeuj couhdwg miz yiengh doxbang doxcoengh neix, de rox yied ngoenz yied giengzak、yied ngoenz yied hungloet!