Gou roxnyinh guh vunz aeu simsoh, doiq gij doxgaiq bouxwnq haenx, mbouj dwg duh bonjfaenh swhgeij, gaej bae siengj aeu ma bienqbaenz swhgeij.

Miz aen gojgaeq ndeu baenzneix gangj: Ngoenz ndeu Goengmax bae haw, aenvih hwngq lai, hozhawq raixcaix. Cingqngamj henz roen miz go makfiengz ndeu, gyoengq vunz ganj- roen haenx yawjraen le, cungj dox- ciengj bae mbaet makfiengz gej hozhawq, cij miz Goengmax mbouj bae mbaet makfiengz, gag naengh youq henz makfiengz yietnaiq. Miz vunz cam de:“Vihmaz mbouj mbaet makfiengz ne? Lauheiq go makfiengz neix mbouj miz bouxcawj.” Goengmax naeuz:“Go makfiengz neix mbouj miz cawj, sim gou gag miz cawj.”

Aen gojgaeq neix hawj gou miz haujlai gamjsiengj: Wnggai byauj- yangz Goengmax, dang gyoengq vunz ganjroen cungj bae mbaet makfiengz bouxwnq seiz, yienznaeuz de hix hozhawq dangqmaz, hoeng de mbouj bae mbaet makfiengz bouxwnq, de gangj:“Go makfiengz neix mbouj miz cawj, sim gou gag miz cawj.” Coenz vah neix, hawj gou roxnyinh daengz Goengmax dwg boux vunz simndei、mbouj simdam ndeu, de mbouj bae damdoz gij doxgaiq bouxwnq haenx, raeuz wngdang coh de hagsib.

Mboujguenj youq ndawranz rox- naeuz youq yozyau, daxmeh caeuq lauxsae cungj ciengzseiz son dou:“Guh vunz aeu simsoh, gaej guh boux vunz simdam ndeu.” Ndigah, gou itcig caenhrengz guh boux vunz simsoh ndeu, gij doxgaiq mbouj dwg bonj- faenh haenx, gaej siengj aeu!

Roxgeiq miz baez ndeu, seizde gou lij iq, ngoenz ndeu gou caeuq daxmeh hwnj haw bae lauh, gwnz gai vunz gig lai, mizmbangj gai mak gai dangz, caen nauhyied. Seizde gou lij dwg lwgnyez, ceiq gyaez bae gizdieg gai mak gai dangz haenx, gou caeuq daxmeh byaij daengz gizdieg neix lo, gou siengj cawx mak caeuq dangz. Hoeng, daxmeh mbouj hawj gou cawx lai, cij cawx saekdi couh ndaej lo. Dang daxmeh hawj cienz hawj bouxgaimak seiz, sawqmwh, gou ngonz raen henz ndang gou miz boux lwgnyez ndeu caeuq gou hung doxdoengz, de ndwn youq henz gou, faj fwngz de caegcaeg aeu geij aen mak yo haeuj ndaw daeh vaq de bae, gou raen le, gou hix siengj caeg geij aen mak yo hwnjdaeuj. Siengj liux geij miux cung, gou swnh bouxgaimak caeuq daxmeh mbouj yawj seiz, caeg le geij aen mak yo haeuj ndaw daeh vaq gou bae, ndawsim angqvauvau, diuqyetyet dwk maranz lo.

Daengz ranz le, daxmeh fatyienh ndaw daeh vaq gou bongzbwdbwd, de cam gou:“Ndaw daeh vaq mwngz dwg maz doxgaiq?” Gou naeuz maz cungj mbouj miz, de hozndat dwk rag gou gvaqbae, fatyienh geij aen mak gou caeg haenx, engqgya ndatheiq, couh aeu diuz faex ndeu moeb fwngz gou, gou daej hwnjdaeuj lo. Ngoenzde daxmeh caeuq gou gangj le haujlai dauhleix, de naeuz gou:“Mboujguenj gungz roxnaeuz fouq, doxgaiq duh bouxwnq, mwngz gaej bae caeg, moix aen doxgaiq cungj miz cawj, bouxwnq yawj mbouj raen, ndawsim mwngz wngdang gag miz cawj ha!”

Daj ngoenzde hwnj, geij coenz vah daxmeh neix itcig geiq youq ndawsim gou. Dwg ha, daxmeh gangj ndaej deng, Goengmax hix gangj ndaej deng, ndawsim gag miz cawj, guh boux vunz simsoh ndeu!