Ndwen 10 ngoenz 13 gyang- haemh, Mungz Lizginh boux vunz aeundaej gvaq daih’it mingz cuj Yauzcuz《Ceng Daegbied Beij Ndeidingq——Aen Doxdax Ceng- ciengj Canghfwen Daeuzmingz Minz- cuz Vunznoix Daengx Guek》Cungh- yangh Densidaiz banh haenx, youq Gvangjsih Namzningz Si banh hoih yienjciengq gagboux, cienzboq gij yaem’wenq cauhnduj Gvangjsih, fat- yiengz vwnzva conzdungj minzcuz.

Mungz Lizginh youq Gvangjsih Duh’anh Yauzcuz Swciyen Lungzfuz Yangh Cungzsanh Cunh ranz Yauzcuz bingzciengz ndeu okseng, dwg boux- yienj hauxseng ndaw Aen Heiqyienh Gofoux Gvangjsih ndeu. Mbanjyauz geizheih hawj de miz le conghhoz eu fwen rwenzrwz. Gangj daengz gij muzdiz banh hoih yienjciengq gagboux, Mungz Lizginh naeuz: “Gou dwg boux guh hong vwnzyi minzcuz vunznoix Gvangjsih ndeu, siengj doenggvaq yienj gij fwen nyuenz miz neix, fatyiengz minzcuz vwnzva maenhndei Gvangjsih.”

Vihliux banh ndei baez hoih yienjciengq neix, Mungz Lizginh caeuq aendoih de saeqsim senjaeu gij cozbinj maenhndei Yauzcuz、Boux- cuengh Gvangjsih bonjdieg, hoih yienjciengq baen gwnz laj song aen biencieng, bien gwnz dwg《Gou Daj Mbanjyauz Daeuj》, bien laj dwg《Doxcaez Ciengq Mbanjcuengh Gyaeundei》. Doenggvaq hoih yienj- ciengq, bouxyawj roxnyinh le gij fwen nyuenz miz Yauzcuz miz cingz lai neix.

Mungz Lizginh youq gwnz hoih yienjciengq ciengq le hot fwen nyuenz miz Yauzcuz《Siuq Buhhaq》. Mungz Lizginh naeuz, hot fwen neix dwg gangj dahsau Yauzcuz maqmuengh ndaej gvaq gij ndwenngoenz vuen- yungz gyaeundei, gyaepgouz gij ndiepcingz vannup seuqcingh. Siuq buhhaq dwg gij conzdungj Yauzcuz, moix dah sau Yauzcuz baehaq gaxgonq, cungj youq seiz ndaej hoengq, yungh baenz bi song bi seizgan mbouj lau dwgrengz、mbat cim mbat mae、daengx hwnz mbouj ninz bae siuq nyib dauq buhhaq miz daegsaek minzcuz bonjfaenh ndeu, caemhcaiq youq ngoenz hamj haeuj giemxdou ranz gvan daenj hwnj. Ndaw dauq buhhaq neix miz gij cingz gyaeundei、seuqcingh dahsau Yauzcuz, caemh miz gij gojgaeq gyaeundei hawj vunz gamjdoengh. Mwh de hwnj cuhcungh couh yawjraen gyoengq cej ndaw mbanj siuq buhhaq. “Gou aeu aen gojgaeq neix yienj hawj daihgya, caensim maqmuengh gyoengqvunz ndaej haeujlaeg roxyiuj、yawjnaek、vatcimh、cienzswnj、fat- yiengz vwnzva Yauzcuz.” Mungz Liz- ginh naeuz.

Daxboh Mungz Lizginh dwg boux lauxsae lajmbanj ndeu, an aen mingz “Lizginh” hawj dahlwg, gawq dwg maqmuengh de ndaej lumj roeghenj nei, eu ok gij fwen rwenzrwz ndeidingq, caeux di byaij ok Mbanj- yauz. “Daxboh faenh gyaez naekcaem gvangqlangh haenx, dwg gij doenghlig ceiq hung gou ndaej genhciz eu fwen、caemhcaiq aeu eu fwen dangguh gij saehnieb ciuhvunz bonjfaenh, dangh- naeuz mbouj miz daxboh yingjyangj caeuq bangcoh, hix mbouj miz gij ngoenzneix gou.” Mungz Lizginh naeuz. Bi 2001 ndwen 2, Mungz Lizginh ngamq ndaej 16 bi ndaej Duh’anh Yauzcuz Swciyen Vwnz- gunghdonz yawjhwnj senjaeu, dangguh gij vunz cungdenj gungganq, soengq bae daengz Aen Ban Canghfwen Minzcuz Vunznoix Gvangjsih hagsib. Bi 2004 ndwen 7, Mungz Lizginh hag baenz dauqma haeujdaengz Duh’anh Yauzcuz Swciyen Vwnzgunghdonz guhhong, daj “lwg runghbya” bienq- baenz bouxyienj ciennieb. Bi 2006 ndwen 7, Mungz Lizginh gauj hwnj Gvangjsih Yisuz Yozyen aen ban son- gyauq ciengqgo, aen loqsiengj de dauqdaej saedyienh lo. Ndaej daengz Gungh Siujbingz gyausou doengh boux lauxsae mizmingz neix caensim nyinhcaen son, gij suijbingz ciengqgo Mungz Lizginh daezsang gig hung.

Mungz Lizginh guh gij hong yisuz yaek ca mbouj geijlai cib bi aeundaej haujlai ciengj, lai baez daibyauj Gvangjsih bae Hanzgoz、Laujvoh doengh aen guekgya neix yienjok gvaq. Bi 2006 ndwen 8, Mungz Lizginh ndaej aen cwngheuh “dujva Yauzcuz” Cunghvaz huzndei · gaiq daih’it hozdung senj dujva minzcuz; doengz bi ndwen 11, ndaej aen ciengjgim “Gvangjsih gyaeundei” daengx gih ciengqgo doxdax; bi 2007 ndwen 3 ndaej dujvagim Yauzcuz aen lanzmoeg “ra dujvagim” Gvangjsih Densidaiz; bi 2007 ndwen 12 ndaej aenciengj it daengj daihcibsam gaiq CCTV canghfwen bouxcoz densi daihciengj dieg Hozciz doxdax; bi 2012 ndwen 10, caeuq sam bouxyienj minzcuz vunznoix youq gwnz aen vanjvei haimuq daihcibhaj gaiq Namzningz gozci minzgoh yisuzcez caeuq daihcib gaiq Cungguek- Dunghmungz bozlanjvei doxcaez ciengq diuzgo haidaeuz, gig ndaej vunzlai haenh; bi 2014 ndwen 8, camgya 《Ceng Daegbied Beij Ndeidingq——Aen Doxdax Ceng- ciengj Canghfwen Daeuzmingz Minzcuz Vunznoix Daengx Guek》Cunghyangh Densidaiz banh haenx ndaej “mingz daih’it senjsouj Yauz- cuz daengx guek”, bi 2014 ndwen 11 ndaej aenciengj it daengj daihcibroek gaiq CCTV daengx guek go bouxcoz daihciengj doxdax dieg Gvangjsih doxdax. Mungz Lizginh baengh conghhoz eu fwen rwenzrwz de, daj ndaw runghbya Mbanjyauz Duh’anh byaij hwnj daizheiq ciengqgo Gvangj- sih engqlij daengx guek, bienqbaenz “roegvenz” Yauzcuz mingzdaeuz gok doh Gvangjsih.

Mungz Lizginh naeuz:“Gij bya geizheih gij raemx gyaeundei Mbanj- yauz ciengx gou hung, gij vwnzva Yauzcuz yingjyangj gou, dangguh boux guh hong vwnzva ndeu, gwnz mbaq gou rap miz gij rapnaek cienzswnj vwnzva conzdungj Yauzcuz. Gou aeu dawz gij fwen nyuenz miz Yauzcuz eu bae daengz seiqgyaiq gak dieg, hawj seiqgyaiq roxyiuj vwnzva Yauzcuz.” Geij bi neix daeuj, Mungz Lizginh aeu fwen guh giuz, gaenxmaenx caeuq- faenh Dunghmungz vwnzva doxgyau, daibyauj Gvangjsih bae daengz Lauj- voh doengh aen guekgya Dunghmungz neix guh hozdung doxgyau vwnzva, daibyauj Gvangjsih bae daengz Hanzgoz guh doxgyau vwnzva. Youq laj Mungz Lizginh mboujduenh roengzrengz, gij fwen nyuenz miz Yauzcuz menhmenh byaij hwnj daiz- heiq gozci.