Sing roeg ndaw suen singsing rwenz, nye heu gwnz faex riengz rumz bi, yienghndei seizcin haeuj lwgda, gingjsaek doenghnaz hawj vunz maij. Mboengqneix, bouxraiz byaij haeuj Aen Nungzcangz Gyadingz Daj- ndaem Mak Yungzsuij Cin Yungzsuij Myauzcuz Swciyen, yawjraen doengh- go mak seiqgeiq cungj mbaetsou ndaej haenx: Go makgam seizcin mak baenz gwn、go makyinghdauz seizhah mak baenz gwn、go makleizhenj caeuq go makleiznding Sinhsihlanz seizcou mak baenz gwn、go makcauj Daizvanh seizdoeng mak baenz gwn. Linghvaih lij miz 10 fanh caz lwgfaen gosisaux heuswdswd dem.

Aen Nungzcangz Cizcaij ciemq dieg 296 moux, dwg Yungzsuij aen nungzcangz gyadingz dajndaem mak daih’it miz gij funggek Meijgoz, aen nungzcangz neix comz guh’angq、youqndwi、yawj gingjsaek youq itheij. Hoeng, haujlai vunz mbouj rox, bouxcawj aen nungzcangz neix dwg boux mehmbwk miz 5 aen bouq cienmonz gai binjbaiz he, de couhdwg Liengz Yinzmeiz.

Roengzrengz Haujlai Bi “Dahdajgoeng” Baenq Ndang Couh Bienqbaenz “Daihlauxbanj”

Liengz Yinzmeiz youq lajmbanj okseng, mwh lij iq ndaw ranz hojndoq. Bi 1990, vih bang ndaw ranz, Liengz Yinzmeiz bae Guengjdoeng dajgoeng. Hoeng, couhcinj baenzlawz dwgrengz guhhong, souhaeuj cij dan doh gwn doh daenj, gij cengca loqsiengj caeuq yienhsaed, hawj ndaw sim Liengz Yinzmeiz gig mbouj fug.

20 sigij 90 nienzdaih, ginghci henzhaij hainduj hoenghvuengh, yawjraen gizgiz cungj miz gihvei guh seng’eiq, aen sim Liengz Yinzmeiz doengh lo: Vihmaz mbouj gag cauh- nieb, gag dang lauxbanj?

Naeuz guh couh guh, ginggvaq lai fuengmienh gaujcaz, Liengz Yinzmeiz yawjcinj gij hangznieb gai buhvaq ndaw yienhsingz Yungzsuij, couh baenzneix hainduj diuzroen cauhnieb bonjfaenh lo.

Baengh bonjfaenh roengzrengz guh, gij seng’eiq Liengz Yinzmeiz gveihmoz mboujduenh gyahung. Bi 2000, Liengz Yinzmeiz hai daih’it aen bouq bonjfaenh cienmonz gai haiz- naeng lo. Geij bi gvaqbae, de youh doenggvaq gyahaeuj laebdaeb hai le aen bouq cienmonz gai yindung binjbaiz caeuq aen bouq haiz meh- mbwk seizhwng, canh ndaej doengj gim daih’it ciuhvunz.

Bi 2013, Liengz Yinzmeiz gaenq miz 5 aen bouq cienmonz gai binjbaiz, de aeu ok 420 lai fanh maenz cienzrom bonjfaenh, gyahwnj 680 fanh maenz ngaenz caeuq ngaenzhangz ciq aeu haenx, hainduj banh aen nungz- cangz gyadingz dajndaem lo.

Seizneix, aen nungzcangz Liengz Yinzmeiz gaenq cuengqhaeuj 2000 fanh maenz ngaenz, ndaw nungzcangz ndaem miz makgam、makyinghdauz、makleizhenj、makcauj Daizvanh doenghgij mak neix, couh yienghneix, ndaw nungzcangz de seizlawz cungj miz mak ndaej gwn. De lij laebbaenz aen dieg byauhcunjva ceiq hung dajndaem gosisaux Yungzsuij seiz- neix, ndaem baenz ca mbouj geijlai 10 fanh caz lwgfaen gosisaux. Doengz- seiz, laebbaenz le aen lijgvanj nungzgyahloz gwn ninz doxcaez, ndawde miz dieg daengx ci, moix bi ciepdaih bouxhek daihgaiq 30 fanh vunz, seng’eiq ndei dangqmaz.

“Dahdajgoeng” doenghbaez Liengz Yinzmeiz bienqbaenz “daih- lauxbanj” caencingq lo.

Gij Raeblaeng Miznaj Cix Dwg Diuzroen Cauh- nieb Gig Ganhoj

Ngamq hainduj cauhnieb, gij cienzrom Liengz Yinzmeiz gya hwnjdaeuj gungh ngamq miz cien lai maenz, cienz co bouq caeuq cienz aeu huq mbouj doh haujlai, da yawj gij bouq gai buhvaq couh yaek deng co aeu liux lo, Liengz Yinzmeiz simgaenj lumj duzmoed gwnz rekndat nei.

Caenseih mbouj miz banhfap, Liengz Yinzmeiz cijndaej najna bae cam gyoengq beixnuengx baengzyoux ciq cienz. Ciq le haujlai, gij cienz yungh daeuj hainduj guh seng’eiq dauqdaej ciq doh lo.

Gij vwndiz cienz hainduj guh seng’eiq gaijgez lo, hoeng gij cienz yinyingz lijdwg gaenjcieng. Vihliux mbaet cienz, Liengz Yinzmeiz cijndaej gawq dang lauxbanj, youh dang bouxguhhong. Moix gek sam haj ngoenz, de couh aeu naengh hojceh bae gij hawciengz baefat Gvangjcouh aeu huq.

Cauhnieb mbouj geijlai nanz, Liengz Yinzmeiz couh miz lwg daih’it lo. Vihliux ciuqgoq lwgnyez, Liengz Yinzmeiz cijndaej bae Liujcouh gyaq- cienz baefat loq bengz aeu huq. Moix baez bae Liujcouh, de cungj aeu daiq lwgnyez caengz rim bi ndeu bae gyam, mboujdan bonjfaenh dwgrengz, lij hawj lwgnyez hoj dem.

Bi 2014 ndwen 11, nungzcangz cuengqhaeuj le haujlai cienz, caengz miz souhaeuj saekdi, 3 moux lwgfaen gosisaux Liengz Yinzmeiz ndaem haenx deng caeg, goem bae daihgaiq 18 fanh maenz ngaenz. Yawjraen gij lwgfaen bonjfaenh dwgrengz ndaem roengzbae haenx haemh ndeu cungj mbouj raen ngaeuz lo, Liengz Yinz- meiz sim’in dangqmaz.

Caeklaiq, youq seiz Liengz Yinz- meiz ceiq gunnanz, dangjveij、cwngfuj dangdieg gibseiz bang de, vih de banhleix diepsik ciq cienz, lij bang de hezdiuz reihnaz, gaijgez gij vwndiz yungh reihnaz dem. Nungzyez、fulenz doenghgij bouhmonz neix hix soengq cienz bangfuz daeuj hawj de, gij nanzdaez cienzyungh de ndaej gaijgez lo.

Gwn Raemx Naemj Goek Mbeilaux Raphwnj Sevei Cwzyin

“Bonjfaenh miz cienz mbouj suenq miz cienz, gyoengq cejnuengx doxcaez miz cienz cij suenq miz cienz.” Liengz Yinzmeiz dwg yiengh- neix siengj, caemh dwg yienghneix guh. Couh yienghneix, Liengz Yinz- meiz goq 50 lai boux mehmbwk louz mbanj daeuj ndaw aen bouq caeuq nungzcangz bonjfaenh guhhong, lij son’gyauq gyoengqde dem, mboujdan hawj gyoengqde miz souhaeuj, lij hawj gij dinfwngz cihsiz gyoengqde bienq ak dem.

Liengz Yinzmeiz lij leihyungh gijndei gwnndoet nungzcangz, gvangqlangh soucawx gij doxgaiq reihnaz vunzmbanj henzgyawj, daiq- doengh siugai gij doxgaiq reihnaz. Dan gaeqdoj hangh neix, moix ndwen couh gai ndaej 300 lai duz.

Youq gwnz roen banghoj, Liengz Yinzmeiz caemh caenhrengz bae guh gij saehcingz bonjfaenh guh ndaej daengz haenx. De haujlai baez ndaej cingj bae lajmbanj vih vunzmbanj hwnjdangz mbouj aeu cienz, vunz- mbanj gig angqcoux de; youq mwh lajmbanj miz maz saeh, de hix gaenxmaenx gien cienz gien doxgaiq, miz baez ndeu lij gien ok 5 fanh maenz bae coih diuzloh Mbanjgujsenj dem. Bi 2016, Hungzsuij Yangh Cinminz Cunh daengx mbanj feiz- coemh, de mbat dog gien ok gij buhvaq dij ca mbouj geijlai fanh maenz ngaenz. Lumj gij gien cienz gien doxgaiq baenzneix, Liengz Yinzmeiz bonjfaenh cungj mbouj rox gien gvaq geijlai cienz caeuq doxgaiq lo.

Miz ok couh miz haeuj. Bi 2015, Liengz Yinzmeiz ndaej aen cwngheuh mingzdaeuz “Yienghndei Bouxcoz Cauhnieb” Yungzsuij Myauzcuz Sw- ciyen. Bihaenx, caemh ndaej bingz- baenz “Biubing Sam Bet Hungzgizsouj Liujcouh Si”, ndaej cwngheuh mingz- daeuz “Biubing Laebgoeng Gangjvei Mehmbwk Hawsingz Lajmbanj Liuj- couh Si”; bi 2016, Liengz Yinzmeiz ndaej bingzbaenz “Bouxdaiqdaeuz Fuzbinz Cib Aen Lijyouz Liujcouh Si”“Sam Bet Hungzgizsouj” Liujcouh. Giyez youq laj Liengz Yinzmeiz daiq- lingx, caemh dwg aeundaej cingzcik ndei. Bi 2015 nungzcangz ndaej bingzbaenz “Dieg Guhyiengh Nungz- yez Gohgi Daihneix Mehmbwk Liuj- couh Si”; bi 2016 nungzcangz doengzseiz ndaej bingzbaenz “Dieg Guhyiengh Nungzyez Daegsaek Daih- neix Yienh Gaep Gvangjsih”“Dieg Guhyiengh Mehmbwk Vut Gungz Daengx Gih”“Dieg Guhyiengh Nungzgyahloz Domqgim Gvangjsih”“Nungzgyahloz Maenhndei”“Dieg Lijyouz Lajmbanj Miz Gijgwn Ndei”; bi 2017 ndaej bingzbaenz“Dieg Lijyouz Lajmbanj Seiq Singgaep”“Dieg Guhyiengh Lijyouz Lajmbanj Caeuq Nungzyez Youqndwi Gvangjsih”“Nungzcangh Seiq Singgaep” caeuq “Aen Giyez Lingxdaeuz Cungdenj Nungzyez Canjyezva Liujcouh Si”.