Miz bien sinhvwnz daezmoeg dwg 《Song Boux Gauhcunghswngh Gouq Vunz Dauq Deng Laih Bungq Vunz》, de sijsaeq yawj roengzbae, yenzlaiz miz song boux cingq doeg gauhcungh hagseng, banhaemh gwn caeuz sat le, ok rog youzbyaij, sawqmwh, roen doiqmienh miz boux gwih dendanhceh ndeu gag conj laemx gwnz loh, ninz youq gizhaenx mbouj doenghdanh. Song boux hagseng mbouj miz saekdi yaemhywx, doq buet gvaqbae rex bouxlaemx hwnjdaeuj, baez yawj, dwg goenglaux 50 lai bi ndeu, song de mup raen heiqlaeuj gwdfwdfwd. Cam rox aen ranz goenglaux le, songde couh soengq vunzlaux dauqranz. Yaek doxbiek seiz, goenglaux gaem ndaet gij fwngz songde, lienzlienz naeuz docih. Byawz liuh, ngoenz daihngeih, daeglwg goenglaux daeuj daengz hagdangz, bangjlaih songde bungq laemx daxboh de, heuh songde boizcienz, doeklaeng caeklaiq miz vunz yawjraen, okdaeuj guhcingq, song boux hagseng cij ndaej duetseuq. Daeghaij ngeix, danghnaeuz mbouj miz vunz guhcingq ne? Daeghaij sawqmwh roxnyinh baihlaeng hwet caepcapcap. De caiq yawj diuz daihngeih,《Hauxseng Simndei Gouq Vunzlaux, Dauq Deng Vunzlaux Laih Bungq Vunz》…… Daeghaij yied yawj yied dungxcieg, de mbouj gamj caiq fan lo, de hixnaengz gvengvak dennauj ninz roengz congz bae. Siengj daengz gij vah daxmeh, caiq caen da raen gij saehlaeh neix, Daeghaij caen roxnyinh dwglau raixcaix. Lau deng haep aeu cienz, lij lau vaih mingzdaeuz. De 19 bi vunz, giyau ngamq bizyez, gig mbouj yungzheih ra ndaej faenh hong ndeu, hwnjban caengz rim buenq bi, diuzmingh lij raezrangrang, de mbouj ndaej aenvih gienh saeh neix vaih gij roennaj de ya.

Daeghaij ninz youq gwnz congz nyapswdswd, sawqmwh, “dingdung” aen soujgih veihsin yiengj sing ndeu, de deng hwk dwk doeksaetyat, doq lumj duz max rouxringx nei naengh hwnjdaeuj, diemjhai soujgih baez yawj, caenh raen ndaw baengz- youxgien fat diuz saenqsik ndeu yienghneix sij:

“Cimhra bouxguhcingq. Ngoenz- lwenz banhaet 8 diemj cung baedauq, daxboh gou youq henz gai deng vunz gwih danci bungq laemx. Boux- bungqvunz deuz lo, daxboh gou dauq deng gyoengqvunz hongznaeuz bungq- meng. Vih gienh saeh neix, daxboh simnyap dungxmbouq, mbouj gwn haeux, mbouj roengz ninz. Gouzgouz bouxdaraen, okdaeuj guhcingq, bang- bang daxboh gou! Gouqgouq daxboh gou! Miz cienzsinhoj. Docih! Dahlwg goenglaux goemzgingq hengzlaex!”

Daeghaij mbouj roxnyinh daengz raemxda youq ndaw da baenqloekloek. De, bouxcoz 19 bi, de caen mbouj rox baenzlawz doiqfouq gij saeh neix, caen cojgvaq lo.

Daeghaij mumjmumj gyumq- gyumq ninz laep lo, hoeng bouxvunz cix lumj fouz youq byonghmbwn nei. Yaep he, de deng rumz geuj doxhwnj, yaep he de youh doek roengz gwnzdeih ma. De lumjbaenz cingq byaij youq gwnz gai, henz gai dauqcawq dwg faex heu va sien, bouqdiemq ciubaiz lwenqda myigmyig, vunz haeujhaeuj okok, bouxboux naj rongh bak riu. Hoeng, de mbouj miz sim ngonz gij luengqgai gyaeundei neix, ndaw uk de lumj miz gyoengz faiqnyungq ndeu saek dwk luenhsebseb. De doq byaij doq ngeix simsaeh, mbouj rox byaij daengz gizlawz, de baez ngiengx gyaeuj, caenh raen dangqnaj miz bang vunz ndeu humx baenz gvaengz, sing sang sing daemq ngeixlwnh foedfoed. De sijsaeq baenz yawj, yi, gizneix mbouj dwg gizdieg de ngoenzhaenx bungq vunz ha. De dungxcieg bubbub, guhmaz? Goenglaux lij naengh youq gizneix caengz miz vunz gouq de. Daeghaij ngeix, mbouj baenz, dangh- naeuz goenglaux deng dai bae, gou rap coih engq naek, gou yaek bae gouq de cij ndaej, mboujguenj baenzlai, boizcienz couh boizcienz lo.

Daeghaij doq bued vunz doq naeuz:“Veq di, veq di.” De gungj hwet baez yawj, boux ninz gwnznamh haenx, mbouj dwg goenglaux, cix dwg daxmeh de. Daeghaij simgip cam:“Meh, mwngz guhmaz baenz yiengh- neix la?” Daxmeh cengq hai lwgda, sing unqnemnem naeuz:“Deng ci bungq laemx, de deuz lo, vaiq bauq- gingj……” Daxmeh caengz gangj sat, couh maez gvaqbae. Daeghaij gotumj daxmeh daejnganga……

Sawqmwh, Daeghaij baez doek- saet, de ndiu gvaqdaeuj lo, daengj rwz baez dingq, lumjbaenz miz sing roq dou, de hai daeng cam:“Guhmaz la？Miz maz saeh?” “Haij ha, mwngz byonghhwnz hemq maz la?” Dwg daxmeh, Daeghaij bekbek najbyak, cij rox daengz haxbaenh bonjfaenh guh fangzhwnzloq. De doiq daxmeh naeuz:“Mbouj miz maz saeh, guh loq ndwi.” “Gaej ngeix lai, mbouj lau, ninz lo.” Daeghaij caiq hix ninz mbouj ndaek lo, de dauqngeix gij loq haxbaenh, danghnaeuz boux deng bungq haenx caen dwg daxmeh, bouxbungqvunz deuz lo, daxmeh dauqfanj deng vunz hongznaeuz bungqmeng, daxmeh baenzlawz guh vunz dem?

Daeghaij dauqdaej dwg boux vunz lauxsaed swnzsienh ndeu, guh saeh loek le ndaw dungx coux mbouj roengz, ngoenzngoenz deng gienh saeh neix nyaux dwk dungx fan uk luenh, ninz mbouj ndaek, gwn mbouj feih, guhhong mbouj haeujsim. Boux vunz caenh lumj gwn laeuj fiz nei fouzvangvang. Baez laep da, goenglaux aen naj hojlienz couh yienh’ok dangqnaj de daeuj. De cuengqsim mbouj roengz, de siengj bae damqcaz goenglaux seizneix baenzlawz yiengh lo.

Seiz gwn haeuxringz, de daeg- daengq daeuj daengz diegbungqci, youq henz gai bouqfaenj gwn faenj. De siengj cam bouxgaifaenj rox mbouj rox cingzgvang goenglaux de bungq laemx. De dawz vanj faenj naengh roengz- daeuj, ngamq siengj haibak cam, couh dingqnyi song dah gai faenj mwngz coenz gou coenz lwnh gienh saeh neix. “Caen cojgvaq lo, ndaejnyi naeuz, goenglaux geij ngoenz gonq deng ci bungq haenx, baenz bingh haeuj yihyen bae lo.” Dah ndeu naeuz. “Baenzlawz mbouj dwg, deng vunz bungq laemx lij ngaiz vunz naeuz bungqmeng, caen cojgvaq.” “Goeng- laux gek ngoenz daeuj gwn faenj, raen de vunz mienhsienh simsoh, gou mbouj saenq, dwg de bungqmeng.” Daeghaij cangguh gvansim cam:“Goenglaux haenx youq aen yihyen lawz yw bingh ha?” “Ndaejnyi naeuz youq caet yihyen. Daegmbauq, mwngz roxnaj de.” “Mbouj…… mbouj rox, gou hix dingqnyi gienh saeh neix, gou gvansim cam saek coenz ndwi.” Daeghaij geiq roengzdaeuj, gwn faenj sat, de youh ma gunghswh hwnjban.

Doengxhaemh roengzban, Daeg- haij caij danci de ngamq cawx moq coh caet yihyen buet bae, de siengj bae yawjyawj goenglaux, couhcinj youq bakdou liuq song da, ndaek rin ndaw sim de cij miz di onj.

Daeghaij daeuj daengz yihyen, cam husw rox aen congz bingh goenglaux le, couh laeglemx byaij daengz bakdou fuengzbingh. De cangguh ra vunz nei iet gyaeuj damqyawj haeujbae, caenh raen ndaw fuengzbingh miz 3 aen congz, de bae yawj couh rox aen congz henz dou dwg goenglaux haenx lo. Mehlaux ndeu cingq naengh youq henz congz caeuq goenglaux gangj vah, mbouj yungh cam, de wnggai dwg mehyah goeng- laux lo. Goenglaux ing youq gyaeuj- congz, saeknaj lij maqhuz rongh, yawj hwnjdaeuj bingh mbouj suenq naek. “Ae! Deng vunz bungq laemx, lij ngaiz vunz naeuz bungqmeng, gaemz heiq neix caen hoj ndwnj roengz, aen’aek caenh lumj rinndaek dienz.” Goeng- laux danqheiq naeuz. “Caih de lu, gaej youheiq lai, caiq youheiq, gij bingh mwngz engq naek lo.” Mehlaux hozraez nai de. “Ae, gij vunz seizneix baenzlawz bienqbaenz yienghneix simnduk.” Goenglaux yied gangj yied hozgaek. “Mwngz couh hozroengz di suenq lo, deng ci bungq mbouj sieng ndang, dauq youheiq siengsim baenz bingh, caen mbouj dij ndaej.”

Dingq daengz gijneix, Daeghaij nyaenx mbouj ndaej lo, de byaij daengz henz congz, coh goenglaux goemzgingq hengzlaex, naeuz:“Daxgoeng, doiq mbouj hwnj lo, ngoenzhaenx dwg gou bungq mwngz, gvaiq gou mbei iq lai, lau deng saeh haeuj ndang, vut mwngz mbouj goq, gag deuz ndoj bae. Gou loek lo.” Goenglaux bae doeksaet ngeizvaeg, doq ragdawz fajfwngz Daeghaij, lumj lwgnyez nei daejngoegngoeg, congh- bak ajhai cix gangj mbouj ok vah.

Daeghaij saeknaj bienq bieg, simvueng fwngz luenh. Ndaw sim de gag naeuz, baenzneix caen dai lo, deng nyex saeh haeuj ndang lo. De ienq bonjfaenh mbouj dingq gij vah daxmeh, gag soengq bonjfaenh haeuj fwngz vunz daeuj. Daeghaij ngamq siengj yut fwngz buetdeuz, dauq ndaejnyi goenglaux naeuz:“Docih mwngz lo, hauxseng. Docih! Docih!” Goenglaux caenh lienzrangh naeuz coenz “docih”, dauq hawj Daeghaij moengjdoengj lo, de ngeizvaeg cim- yawj goenglaux. Goenglaux daej- saekwk naeuz:“Mwngz ndaej daeuj naeuz coenz vah neix, dangq gouq diuz mingh gou lu. Mboujnex, deng vunz hongznaeuz bungqmeng, gou mbouj rox baenzlawz lix roengzbae……”

Daeghaij hix raemxda loenq- byoedbyoed.

(sat)